吳浩康憶亡母落淚：父母期望我上番台唱歌
母親2007年離世
從前Deep一家六口，上有三個家姐，而身為家中幼子，可謂萬千寵愛集一身，深得媽媽疼愛也是理所當然。但去到2007年，Deep過了有生以來最心情最沉重的生日，因為媽媽在佢24歲生日前6日因肝癌病逝，享年59歲。當時Deep傷痛說：「24年前，最辛苦最勞苦功高的女人已不在人世，沒她分享我的喜悅，生日都變得沒意思了。」
強忍着喪母之痛 繼續工作
Deep媽媽早年曾患乳癌，情況雖一度好轉，但數年後卻發現癌細胞已經轉移至肝臟，更已是末期。媽媽離世時，正值是Deep新碟宣傳期，據知佢當時只係休假兩日，然後強忍着喪母之痛，在鏡頭前裝出笑容繼續工作。對人歡笑，背人垂淚。
Deep曾經講過好希望媽媽睇到自己開演唱會，讓佢覺得自己兒子係成功的，而其實在母親離世的一個月後，Deep真的會和關智斌開一個小型音樂會，可惜媽媽已經等不到。
想跟媽媽說的一句話…
昨晚在《東方新地》FB直播的《DeepNiteShow》live show中，Deep在言談間重提自己為昔日做過的錯事後悔，也談及媽媽的離世。原來媽媽一直希望佢可以做到一件開心的、自己想做的事，最喜歡在舞台上的兒子。如果有機會再跟媽媽說一句話，眼泛淚光苦笑道：「媽，我真係唔係好搞得掂… 不過我知道我要走落去，就要面對…」Deep很想對媽媽說其實自己並唔係咁堅強，但一切都只是空想，因為媽媽早已不在。
而媽媽的離開帶給佢最大的啟示，就係令佢明白要更珍惜和爸爸、姐姐的關係… 「珍惜眼前人」。Deep更會覺得媽媽以前無論係發脾氣，還是講過任何的難聽說話，如今通通都變成可愛的回憶。
父母期望 再一次上台唱歌
留着鬍子、西裝骨骨的Deep現時予人感覺成熟穩重，演唱時真情流露，唱功更上一層樓，早已唔係當年那個壞孩子。在Deep而言，點解會繼續在娛樂圈努力，再次走出來唱歌，堅持在FB開live？佢表示父母好期望自己再一次上台唱歌，唔係期望兒子得到的掌聲有多少，只係想兒子開心。有着如此疼愛自己的家人，Deep亦稱無論日子多艱難，都一定可以站起來。因為佢深深明白，媽媽最想見到的，係一個健康樂觀，不再犯錯的吳浩康。
給媽媽的一首歌
早年Deep所屬樂隊「Closer」的一首歌〈你就在身邊〉，歌詞已盡錄兒子希望對媽媽說的話：
〈你就在身邊〉
天 浮在塵世以外
雲層下有人
人在某秒某地終歸向天
就算分別的最終 終會相連
仍然未會願意一刻相隔
你 別去或者都有天意
我 獨自去認知
天已註定世上每人一次
一個故事過後永別縱沒法相見
你像在身邊
相信你共我連結著一線
傷痛快樂也在每日記住你的臉
你就在身邊
心 仍舊常去發夢
模擬是你在
圍在某個快樂的憶記中
是我當天不愛惜相處每一年
隨後再沒有一刻相見
信 若我能緊握你心意
你 像在我旁邊
