吳剛師傅疑患新冠肺炎 涉拖欠陳奕迅個唱門票退款
撰文：東方新地 圖片 ：新傳媒圖片
吳剛疑染疫 肚瀉氣喘
上世紀九十年代，一講吳剛師傅,全港電視觀眾無人不識。招牌油淋淋爆肌、同東華指定自虐環節年年都係全城話題、焦點所在。近年升呢做酒樓集團董事、一手創辦婚宴王國分店遍布港九新界，之後因合約糾紛而轉到另一酒樓集團任宴會部總監。今年65歲的吳剛師傅除咗兩年前友情客串張致恆、許靖韻MV外，已極少露面。今日突傳出吳師傅感染新冠肺炎的消息，並有指他稱自己檢測呈陽性，肚瀉氣喘且胸翳全身痠痛乏力。
去年露面 全家潮爆出巡
吳剛個人標誌濃密假髮、日常厚粉舞台濃妝、筆挺西裝同西裝袋內不可缺少的白色手巾仔實在獨特，一旦出巡,正如漆黑中的螢火蟲咁鮮明、咁出眾。去年吳剛師傅被本刊捕獲，帶埋老婆同個仔出巡，一家三口造型出位由頭潮到落腳，隆重而有台型，九十年代童年記憶瞬間返晒嚟！
登台look食便飯
吳剛師傅一個出現已吸睛,更何況激罕帶埋老婆同囝囝,一家三口同框出現。果然係一家人,品味同潮流觸覺都同出一轍,就近在寓所樓下商場食個便飯,都盛裝出席各有特色:吳剛一身黑色西裝十足國內大騷春晚主持、吳太綠底金線繡花套裝再襯埋白邊黑色女士帽、現年二十一歲兒子則是牛仔乾濕褸窩釘長褲腳踏短靴、日光日白戴埋帽同圓框黑超,cool爆神情唔講以為韓星出沒。一家人招呼完朋友食平民上海菜後,吳剛帶埋囝囝先行返回樓上君臨天下豪宅寓所,吳太就同友人在超級市場掃埋日用品再返歸。話說一對兒女早年都被吳剛師傅送去英國讀書,兒子滿十八歲後回港先至曝光,吳剛師傅雖然否認兒子有意出道,不過阿仔星味拍得住老竇!
傳拖欠陳奕迅演唱會門票退款
今日除傳出吳剛師傅染上新冠肺炎，亦被爆料指他去年為人代購三十四張，每張價值980元的《陳奕迅Fear and Dreams香港演唱會19/20》門票，不過陳奕迅演唱會最終取消，而主辦單位亦已在今年4月底完成所有退款手續，不過吳剛一拖再拖都未退環款項，涉款$33,320, 最終涉事人報警求助。
20歲仔 扮韓星
私生活成謎嘅吳剛育有一子一女,兩年前他首次帶仔現身,一齊睇鄭少秋演唱會,一身造型同潮味深得父母精髓。
吳剛轉投另一家酒樓集團任宴會部總監,連婚宴、晚宴司儀都要做埋,早前跟宴會嘉賓薛家燕喜相逢。酒樓的宣傳單張都印上佢嘅嘜頭作招徠。
經典回帶
拍過電影、做過亞視,90年代吳剛師傅跳槽到無綫,以一身精鋼身形同食油搽勻全身表演東華節目殺出一條血路,成為年年東華籌款重點項目。曾經食過炭、飲過熟油、纓槍插頸又心口碎大石,雖然被踢爆用特備道具以假亂真,不過始終都係一代人回憶。
