成軍15年 三月紅館開騷 Shine：我哋唔係失蹤人口
廣告
組合Shine徐天佑與黃又南，繼2012年的《Shine Passion Live》跨年騷後，敵逢今年係佢哋出道15年，兩人覺得ready可以再喺紅館開個唱，於是入紙申請6次，終成功取得紅館檔期，Shine將於3月2及3日再踏紅館舉行第二次《Shine Moments Live 2018》紅館演唱會，佢哋話依家正不斷造新歌，以及為演唱會操肌，雖然停咗五年冇一齊開騷，但Shine兩人都話自己一路有拍戲，稍後仲會合拍一套港產片，絕對唔算係失蹤人口！
撰文：東方新地
圖片：新傳媒圖片庫
Shine 三月合體開騷
問到Shine演唱會準備成點？又南話：「今次時間充足，上次演唱會得兩個月時間綵排，今次我哋主動同公司講攞五至六個月準備，因為想向我哋嘅弱項挑戰，表演畀大家睇。」天佑就話：「上次演唱會我哋係突然間攞到個期，因為上次Sammi(鄭秀文)放咗期出嚟，今次係我哋自己入紙申請，前後申請咗六次先批。我哋本來想上年搞，因為上年先係我哋十五周年！」
為除衫晒肌 特別加操
Shine已有五年時間單飛，更有數年沒出新歌，天佑指：「所以依家要不斷造新歌，先至行到落去，冇理由淨唱舊歌！」又南笑言：「有啲歌唱得太多，終於感受到Eason(陳奕迅)講嘅『由好鍾意隻歌，變到好憎隻歌。』」而問到演唱會會否除衫騷肌？Shine就賣關子暗示說：「先嗰兩次都有除，今次我哋要練得再犀利啲！」
將合演地道港產片
五年冇出新歌亦冇開演唱會的Shine，一度被列為樂壇的失蹤人口，天佑笑指自己一路都有拍戲，又南補充話：「喺大家嘅角度，可能覺得我哋失蹤咗，但其實一路有做嘢，我有三年簽咗海潤電影，搬咗上北京！」
又南笑言：「三、四年前真係冇諗依家會再一齊開演唱會，因為中間我哋停咗五年，各自各拍戲、各有作品，係Concert YY(黃偉文作品展)又喺番埋一齊，嗰時諗住幫阿Y做好佢，點知反應好好！」又表示二人將再合體一同合演新片：「由沙士講到金融風暴，係好地道嘅港產片！」
Shine近日宣傳新歌《老花前必做10件事》，問到老花前有甚麼事是要必做的？他們異口同聲認為趁年青要去不同國家遊歷，徐天佑提到去年已遊歷冰島，現在計劃遊秘魯，而黃又南就想去到加拿大黃刀鎮看極光！
