口罩小姐選舉｜40強佳麗才藝表演鬥騎呢 ERROR成員公然爭奪《試當真》女神保錡上台搶女

口罩小姐選舉由ERROR四子揀女

ViuTV《最後一屆口罩小姐選舉》由周一（3月22日）起，逢星期一至五晚上9時30分播出，節目將會以真人騷結合固有選美形式兩部份進行，佳麗們會分成四組，每組五人，由ERROR四子成為每組隊長，透過不同項目及考驗，每回合每組淘汰一人，共三次淘汰，最後八人進入總決賽選出冠亞季軍，而總決賽將會在4月11日（星期日）晚上8時進行現場直播。

口罩小姐選舉｜40強佳麗才藝表演鬥騎呢 ERROR成員公然爭奪《試當真》女神 — ERROR四子肥仔（梁業）、阿Dee（何啟華）、193（郭嘉駿）同保錡成為《口罩小姐選舉》的分組隊長，負責挑選和淘汰佳麗。保錡（右）表示希望找到適合做綜藝節目、講嘢好、夠放得開的人選，唔知最後有邊啲女畀佢揀中？

網民罷睇保錡

Error四子要各揀五人入自己組別，保錡一直在台下只顧睇手機，與三子無乜交流，全程印住腳，但一見心水佳麗，立即猴擒上台搶人，相當進取。第一集《口罩小姐選舉》播出後，不少網民留言指有保錡便罷睇，又指「有女嘅地方就有保錡」、「保錡都係鍾意啲MK女」、「又話雪佢？點解仲見到佢？」、「cut走保錡啦」等。

保錡話如果有佳麗唱出泰文版幪臉超人就好，044佳麗投其所好即場表演，更得到保錡為她伴舞。

070一出場，保錡九秒九衝上台同對方握手，話一定要入佢嗰組，Error三子忍唔住叫保錡唔好咁性急，先讓070表演。

070表演跳舞，露出小蠻腰，070號被指是外號「米媽」的《啱Channel》米露迪。

佳麗表演拔罐

入圍的40名佳麗的表演種類相當騎呢，連摺紙、跳彈床、拔罐都有，更有佳麗當場跪地，非常騎呢！

阿慈被指貌似阿Dee女友

在睇過眾佳麗的才藝表演後，ERROR四子就要鬥快舉牌搶人，但在揀女過程中，阿Dee同193卻為女起爭執，搞到幾乎大打出手！被兩人爭奪的對象，原來係《試當真》女神之一的阿慈（倪安慈）！

《試當真》阿慈（倪安慈，Kathy Ngai）現年22歲（去年開始參選時21歲），在大學時期已曾擔任香港電台實習記者及於無綫電視新聞部兼職導演，去年畢業於香港城市大學媒體及傳播系榮譽文學士（主修數位電視及廣播、副修創意媒體）後，開始做模特兒接拍不同廣告，以及擔任網台節目主持及演出工作，並在今年加入YouTube頻道《試當真》擔任常駐幕前成員。

阿Dee在挑選過程中一早明言欣賞086（阿慈），直言覺得對方有性格，而086表演的棟篤笑，亦令Dee留下深刻印象。但193大爆086貌似阿嫂，更中途突然舉牌搶人，殺阿Dee一個措手不及！當時阿Dee大叫：「佢跟住我，可以更好㗎！」並嬲到踢凳，之後阿Dee更打算出錢收買193，但193整蠱阿Dee一輪後，仍然拒絕交出隊員。