卵巢生瘤 看淡名利｜李佳芯 密謀嫁 陳炳銓
與ViuTV藝人男友陳炳銓拍拖近4年，李佳芯遇上不少阻力仍意志堅定，二人感情穩定，今年初拍《BB來了》期間李佳芯更觸發結婚生仔憧憬，據知近月他們已四圍睇樓想置業築愛巢，有望明年搞場美女與野獸婚禮。愛情與麵包，唔係個個一線花旦都見錢開眼，李佳芯證明真愛是確實存在，仲話男友係潛力股，幾咁獨具慧眼呀！
撰文：東方新地｜圖片：新傳媒圖片庫、TVB劇照、李佳芯IG、陳炳銓IG
李佳芯 新手媽媽再上位
近年無綫不少一線花旦棄事業走去結婚生仔，先有鍾嘉欣，後有岑麗香，未來應該會多個李佳芯。最近在無綫新劇《BB來了》，李佳芯飾演本來野心勃勃的名牌買手，一次意外懷孕令她踏上人母之路，由港女變成港媽過程歷盡艱辛，湊B有血有汗有笑有淚，再加上與奶奶盧苑茵及母親陳秀珠摩擦出的火花，劇情寫實令不少已為人父母的觀眾身同感受，而李佳芯的生鬼演繹亦大受好評，與她過往所演的邪花角色好唔同，角色討好入晒屋。
其實新手媽媽這個角色本是屬於岑麗香，不過香香早已計劃婚後休息一段時間為生B做好準備，最終由李佳芯擔正女角。冷手執個熱煎堆的李佳芯去年成為《星和無綫電視大獎2017》視后，一鼓作氣繼續向前衝，不過去年其身體曾響起警號，奈何早已接劇未能長時間休息。據知李佳芯去年做例行婦科檢查時，驗到有個囊腫在卵巢附近，當時她因有工作在身未能即時做手術，但去新加坡出席《星和》回港後感到腹部很痛，最後入院發現個囊腫已有10cm大，要即時做手術割除。雖然卵巢瘤九成是良性，亦不會影響日後的生育能力，但手術後體內入了空氣又積了血水，令李佳芯全身腰痠骨痛，元氣大傷。之後李佳芯更因為工作辛苦壓力太大，要由好友車婉婉介紹中醫給她，為她好好調理身體。
睇樓趕入市
一直只管向前衝的李佳芯，開刀後只休息兩個星期便投入拍劇工作，再加上人氣急升，代言與廣告工作都接踵而來，知情者透露：「Ali本來係個工作狂，但去年做完卵巢手術，佢開始睇淡名利，會問自己人生為乜，佢亦體會到冇健康就乜都做唔到，嗰段時間Danny(陳炳銓)好照顧佢，雖然佢要開ViuTV 劇都很忙，但成日都做柴可夫車Ali出入。再加上拍《BB來了》同啲小朋友日對夜對，Ali本身都鍾意小朋友，佢都35歲係時候要計劃一下將來，佢都有同Danny傾，以佢哋呢幾年嘅收入同積蓄，都可以買個三房單位，等Ali今年拍埋套《殺手》，出年佢都想停一停，好好籌備人生大事。」有地產界消息 指，李佳芯與陳炳銓近月已放風搵西貢及將軍澳一帶的村屋或私人屋苑單位，雖然睇過多個樓盤，但仍未睇啱心水扑槌。
以往被問及拍拖結婚都會帶記者遊花園的李佳芯，病後心態的確有變，早前她出席公開活動時談及男友曾送首飾給她，但未送過鑽石，她更笑言：「可能一係唔送，一送就係求婚嗰隻。」可見李佳芯對男友求婚有所期待。至於想快點買樓做業主，李佳芯表示希望一擊即中買個風水好及有升值潛力的單位，仲話揀樓同揀老公一樣，希望自己工作同感情都穩步上揚有升值潛力。
愛得義無反顧
李佳芯形象亦正亦邪，是無綫近年難得一見可塑性甚高的女藝人，其外形討好早已被封女神，不過揀男友品味卻獨特，16年本刊記者率先影到她與男友陳炳銓於西貢南圍村屋同居，之後二人再搬到清水灣半島，出雙入對不知幾恩愛。男友雖有才華，苦無帥樣，李佳芯就是欣賞陳炳銓有內在美，而且男友對她呵護備至。早前本刊記者又目擊二人拍拖到銅鑼灣超市買牛扒返屋企撐枱腳，當日在超市內所見，買牛扒時陳炳銓把所有決定權都交由李佳芯話晒事，女友負責揀食物同埋單找數，而他就負責拎嘢，從生活細節上看到二人甚有默契。
雖然李佳芯已是無綫一線花旦，但其實陳炳銓周身刀都唔弱，既是ViuTV藝人及節目主持的他多才多藝，在舞台劇方面亦經驗豐富，近年更成為戲劇導師，又開製作公司搞幕後製作，絕對是李佳芯眼中的潛力股。女人始終都要搵個好歸宿，35歲的李佳芯亦唔例外，拍多幾年劇最多都係拎多個無綫視后，但嫁個好老公係女人一生最大成就，冰雪聰明如李佳芯，當然識得取捨。
甜蜜買牛扒
是日揀牛扒返屋企玩煮飯仔，李佳芯手指指揀完兩塊靚牛扒，由店員包好，陳炳銓即自動波拎嘢，全程有晒默契。
分頭行事
李佳芯與男友分頭行事，她繼續去買沙律與刺身，陳炳銓就負責排隊畀錢。之後李佳芯去揀沙律，幫男友慳荷包，爭住畀錢。
廿四孝男友
貴為無綫一線花旦的李佳芯，拍拖亦拍得低調，而陳炳銓亦好順得女友，李佳芯鍾意食乜就買乜，買完就由他負責拎嘢，廿四孝男友難怪令李佳芯讚口不絕。
女神好搶手
去年李佳芯憑《踩過界》於新加坡的《星和無綫電視大獎2017》首度捧走視后寶座，有指她拍劇資歷淺獲獎受到非議，但其付出的努力有目共睹。
李佳芯人氣急升深受廣告客戶歡迎，代言工作與商場騷不斷，吸金力甚強的她表示已準備好買樓上車，希望盡快有自己的安樂窩。
入院開刀
去年10月李佳芯在社交網上載身穿病人服，戴著手術帽及口罩等做手術的照片，原來她秘密入院切除成個拳頭大的卵巢囊腫，並表示手術後個人容易累，傷口有少少痛，但她很快就復工，有網民勸她應多休息，不應操勞死撐谷劇。
拍劇入戲恨生B
無綫新劇《BB來了》題材貼地寫實，劇中飾演新手媽媽的李佳芯獲觀眾高度讚賞，她表示拍攝 時曾想過做媽咪，又恨拍嬰兒用品廣告，更有新手媽咪觀眾將初生BB的相片與她分享，成功吸納媽媽級fans令她大感開心。
體力透支
繼去年卵巢生瘤後，李佳芯近年亦因工作壓力大要睇中醫調理，為應付日以繼夜的拍劇工作，其實她亦身心疲勞，不時被影到在將軍澳電視城攰到周圍瞓。
改變人生觀
自入院割瘤後，李佳芯的人生觀亦有所改變，唔理世俗眼光的她更加清楚自己追求甚麼，從其IG的post可見，李佳芯隨心、率性的一面。
你拍我拍它🌊 不知何時開始，只去想自己擁有的，不想那些不屬自己的。 晚安。 #ALife
Ali 李佳芯（@aliaime）分享的貼文 於 張貼
擺脫「邪花」演「港媽」 演技大躍進！李佳芯 學生時代已是美人胚子⋯⋯
TVB劇集《BB來了》播出街首星期，除咗劇情夠貼地外，飾演唐恬兒的女主角李佳芯，更演活女強人、準媽媽及新手媽媽的角色，雖然表情誇張搞到女神形象崩壞（連Ali都形容為自毁形象），但就獲網友讚佢演技大躍進！查實Ali點扮醜都仲係美女一名，睇番佢嘅學生照當時已經係美人胚子，又pure又true，絕對係位純天然美女！
《BB來了》講述女主角唐恬兒(李佳芯飾演)與男主角葉致廷(黎諾懿飾演) 新婚一年仍處於甜蜜期，二人正為事業拼搏期間，卻突然意外有了BB，結果將一切計劃打亂！李佳芯就完美演繹出女強人忽然做媽媽忐忑不安心情，喊哂口同老公講自己內心除咗不安、擔心外，其實仲有害怕的感覺！
一個湊女湊到傻、一個湊女湊到呆。。 #BB來了 #自毀系列 #ALife
Ali 李佳芯（@aliaime）分享的貼文 於張貼
李佳芯 出身有線
Ali自2008年起在有線電視擔任節目主持，當時仲係用自己本名李嘉馨，不過默默耕耘多年，發展依然平平。雖然未有代表作、名氣未算大，不過Ali都憑住標緻面孔成功吸納唔少支持者！
去到2012年，Ali由有線轉投無綫旗下，13年時與黃心穎、梁嘉琪等人主持《學是學非》，隨住節目大受歡迎，幾位「是非精」成功入屋，Ali亦從此廣為觀眾認識。
《倩女喜相逢》演九尾狐
之後在《倩女喜相逢》中飾演九尾狐，繼續老本行！
李佳芯上位快 備受力捧
過往多演「邪花」角色嘅李佳芯，在2016年勇奪「飛躍女藝人」後就受到無綫力捧，去年Ali已有多套擔正的劇集出街，包括《與諜同謀》、《踩過界》、《誇世代》，今年又有《波士早晨》和《BB來了》。
在大馬舉行的《TVB 馬來西亞星光薈萃頒獎典禮2017》上，Ali憑《踩過界》「我最愛TVB女主角」，之後又在《Yahoo人氣搜尋2017頒獎典禮》及《星和無綫電視大獎2017》，攞咗「人氣最愛女主角」及「我最愛TVB女主角」，難怪被譽為下一個衝擊視后的大熱人選。
李佳芯《誇世代》演刁蠻大小姐
去年李佳芯(Ali)在台慶劇《誇世代》飾演尚家四小姐Paris一角，是一位刁蠻又可愛的大小姐，同陳豪做一對「合約夫妻」，演出有笑有淚，觀眾好buy！
《踩過界》法官Never 演技大爆發
除咗《誇世代》之外，Ali去年最觸目嘅代表作當然就係《踩過界》入面嘅蒲精法官Never啦！呢個角色感覺亦正亦邪，畀觀眾睇到Ali演技嘅進步，話畀大家知佢唔係只應付到狐狸精角色！
話時話Ali其實都35歲，唔係十八廿二，但佢除咗樣貌娟秀、笑容甜美，仲散發出一種獨特氣質⋯⋯無錯，就係仙氣！早在大家睇《學是學非》時，可以見到Ali具備一種少女（同佢年紀不成正比）的傻氣；但在劇集中又可以展露成熟女性的嫵媚，令觀眾喜愛有加。
學生時代 證天然美女
學生時代的Ali已經美人胚子出晒嚟，絕對係天然美女！
著校服演出？Ali輕鬆啦！
素顏一樣好得！
