千奇百趣無喱頭翻譯！爆趣！
廣告
《 千奇百趣 》系列不經不覺已經係第十輯，今次《千奇百趣特工隊》喺香港、日本同台灣取材，除咗有兩位索特務朱智賢及馮盈盈外，節目入面嘅日文同台語翻譯一樣係千奇百趣，創意十足！好笑在於對白完全無厘頭，一時唱歌一時搞gag，你地又有冇留意到？
講嘢變唱歌？
第三集同第十二集入面嘅真實對白被改成本地歌詞，玩味十足。話說台北萬華區係不少風箏發燒友嘅聚集地，佢地所玩嘅款式非比尋常，當訪問一位台灣叔叔時，對白竟然變成〈風箏與風〉嘅歌詞：「當風箏遇上風，即使快樂的痛…」你地鐘意台灣叔叔定Twins嘅版本多啲呢？
而日本福岡縣一輛「唱K的神」，的士車廂內藏小型卡拉OK音響系統，男男女女都上車一解「唱K」癮！點知日文歌竟然變成梁漢文同楊千嬅嘅〈滾〉：「請你滾，滾出去！」；以及張學友、湯寶如嘅經典金曲〈相思風雨中〉：「啊… 記相思風雨中 啊… 記癡心風雨中……」而且表情亦相當一致，毫無違和感！
而第十二集就分別有日本東京同大板嘅長眉毛伯伯。日本東京代表嘅眉毛有15cm，連佢老婆都感到非常驕傲：「我老公係全日本最長㗎，好幸福呀！」隨後二人開心拍掌，真係交足戲喎！但就有來自日本大板嘅粗眉伯伯嚟「挑機」，伯伯嘅姪女仲話佢嘅眉毛好玩過手機：「長無用㗎，咁幼！我伯伯又長又粗，好好玩！」從一班妹妹口中講出，真係更加爆笑！
㗎妹扮「偽ABC」？
第十二集就有借外套俾學生哥嘅愛心婆婆。但呢位㗎妹就好似有啲不滿：「Well呢度住咗個好神秘嘅婆婆，好鐘意借嘢比人㗎 You Know？借柴米油鹽我ok，但借呢樣嘢，Kind of（有點）奇怪囉。」㗎妹扮「偽ABC」真係第一次見，但配音出神入化，爆趣！
