十月初五的月光｜石修自貼74年樣貌進化史 一文睇清歷年影視風采

撰文：東方新地｜圖片：東方新地、《十月初五的月光》劇集截圖、石修IG、陳宇琛IG

豪華花園慶生

早前，石修就聯同太太、仔仔陳宇琛以及媳婦林佑蔚一同慶生，乖仔和媳婦都有出IG祝石修生日快樂：「Happy Birthday to our superhero（祝我們的超級英雄生日快樂）！《The Incredible sheksau》」。只見相中74歲的石修依然非常有型，點睇都唔似有「長者咭」！而且他們慶生的地方亦相常豪華，除了有靚夜景之外，花園後方還有一個私人泳池，不過就未知是否石修的屋企。

74年進化史九宮格

另一方面，石修早前亦在個人IG上分享了一張九宮格黑白相，分別記載了9個不同階段的他，由童星至近年。只見相中的石修多年以來都保持童顏，五官和輪廓與童星時期的他亦相差不大，不少網民都留言大讚他保養得宜！

重溫74歲石修歷年影視風采

｜62年 童星扮牛仔

1958-64年做童星嘅石修，62年首次拍國語片《鍍金世界》夥拍關之琳老竇關山，片中呢個西部小牛仔造型，有型又有格。

｜68年 偷食小丈夫

石修喺電影《聰明太太笨丈夫》中演小鮮肉丈夫，同一班好色之夫如曾江等人商議成立「 丈夫走私協會 」，東窗事發後成為老婆奴。

｜76年 叛逆富家子

76年無綫改編瓊瑤同名小說劇集《心有千千結》，講述李琳琳演嘅護士同石修演嘅叛逆富家少爺之間愛情故事，過程轟烈又充滿波折。

｜79年 至型花無缺

79年石修喺古裝劇《絕代雙驕》演花無缺，造型優雅中帶帥氣，飄逸又俊朗，係至型嘅花無缺。

｜81年 正義棄富貴

石修喺81年劇集《火鳳凰》演鄭裕玲前度，為正義棄富貴，大義滅親出庭頂證富家子兼大舅苗僑偉誤殺妻子陳秀珠，最後仲同周潤發爭Do姐。

｜81年 剛猛洪熙官

81年TVB劇《英雄出少年》，由石修飾演洪拳始創人洪熙官，洪拳以剛猛勇悍見稱，修哥耍起上嚟亦勁度十足、似模似樣。

｜82年慕容復爆紅

82年版《 天龍八部 》石修演慕容復，風度翩翩、氣宇軒昂、高傲俊美，被譽為「永遠的慕容復」而紅遍中港台，套劇83年台灣大 hit，爆紅嘅修哥於84-86年間到台灣發展。

｜85年 戀上藍潔瑛

石修85年偷閒回港拍劇，喺《六指琴魔》中演玉面神君東方白，同藍潔瑛大婚之日，六指琴魔以琴音令由吳啟華演嘅東方白徒弟亂了性而同藍潔瑛親 近，三人關係亂到九彩。

｜86年 返娘家弄權

86年石修由台灣返港回娘家無綫，隨即參演集周年台慶劇《黃金十年》，佔戲頗重，劇中為人工於心計，為奪權不惜玩弄感情。

｜87年 型到爆刑警

石修喺警匪劇《大班密令》演除暴安良，殲滅國際性罪行嘅國際刑警，西裝骨骨，左手插褲袋右手揸槍，係至型嘅國際刑警。

｜01年 演荷李活片

01年石修參演由嚴浩執導嘅中美 合拍荷李活電影《庭院裡的女人》， 《蜘蛛俠》「綠魔」威廉達福演嘅30年代家庭教師竟然愛上石修太太，而石修個造型望落真係幾似方力申。

當然唔少得…《隔世追兇》：「石修催眠術」

當年《隔世過兇》中，石姓心理學家驚鴻一瞥的神級催眠術。

當時石修在戲中被人追殺，於是用槍手的鼻血來對他進行催眠，結果槍手像木偶一樣被他完全操控，此事堪稱膠劇一絕。