勁開6間魚蛋檔 貼地 譚小環 助年青人創業
廣告
94年冠軍港姐 譚小環 ，14年決定唔撈無線轉行賣魚蛋，日做八粒鐘，三年辛苦經營賣魚蛋終於捱出頭，繼去年在尖東再開分店，旺角弼街新舖亦將於九月開張，更會在年底前開足6間魚蛋檔！日前小環同老公蔡強榮去新舖巡視，被問到連開六舖，小環承認有咁打算：「年底前會開多幾間！希望藉住自己小小成績，可以鼓勵多啲年青人創業！職業無分貴賤，肯博一定有機會！」
譚小環港姐冠軍變魚蛋妹
譚小環 貴為港姐冠軍， 三年前唔介意放下身段落舖做魚蛋妹，篤魚蛋整燒賣一腳踢，夠晒貼地！生意愈做愈有，去年在尖東再開分店，兩間「渣哥」已經上晒軌道。大家以為小環這個老闆娘可以唔使做只係收錢，但佢堅持事事親力親為，員工見事頭婆都咁落力，自然會落力啲！據知如果遇到有員工請假或者唔返工，小環一定自動波落舖幫手！
親力親為巡舖
連月來，小環就密密四出睇舖，原來旺角新舖更會九月開張，日前本刊捕獲小環同老公，以及幾個員工去旺角巡舖，舖外已經圍晒版，有工人在貼poster，小環同員工在外邊有商有量傾唔停。有過之前開舖經驗，經營已經冇難度。小環同老公接受訪問時直認，打算今年內開夠六間舖，而夢想係希望全港18區都有「渣哥」！
助年青人創業
生意有前景，更引來唔少人想同「渣哥」合作做加盟店，不過兩人揀合作夥伴好謹慎，而且堅持食物，製作，營運一定要自己負責，務求保持質素。而今次旺角分店正是首間加盟店，就係希望幫助有理念嘅年青人創業！小環與老公深知現時香港營商艱難，希望憑現有的知識、技術及人脈幫助年青人。賺錢亦不忘回饋社會，幫助下一代，抵讚！
