公開劉青雲郭藹明十句愛情金句 愛情婚姻保鮮秘訣！
原文:more- Janice｜編輯：Kiki Chen、東方新地｜圖片來源: Instagram
劉青雲夫婦 帶你食好西
除咗演技出眾,劉青雲性格隨和默默耕耘唔造作,更令他贏盡觀眾歡心,即使戲接戲收入豐厚,早已是隱形富豪,但這位猛料影帝,仍追求簡樸生活,同低調樸素的老婆郭藹明同樣貼地。美國南加州大學機械工程碩士畢業的郭藹明,甘為老公放棄做航天工程師,婚後做全職劉太的她,最大滿足就係持家照顧老公,不單理財有道幫老公滾大身家,更負責打理屋企日常,只要青雲在港,例必親自下廚煮飯,細心又能幹!據知情者透露:「青雲有先天性高血壓, Amy(郭藹明)好緊張老公嘅飲食,成日會研究啲有益餐單,等老公可以食得健康啲,只要青雲唔使開工,佢就會親自下廚煮飯煲湯,整一餐好味嘅住家飯畀老公食,咁就覺得好滿足!」
恩愛21年
恩愛如初戀,兩口子一有時間就拖手散步逛街,仲會諗盡方法互氹對方,去年本刊就拍到郭藹明煙韌箍實老公落電梯,甜蜜到爆!
雖然外表睇落有啲 cool ,不過青雲卻好識冧妻,除咗公開講「太空船」愛的宣言,平日亦最愛同老婆拖手散步。
日前,郭藹明由司機接載到九龍城買餸,萬能老婆更加係識途老馬,一支箭行上街市二樓,一間出名賣優質牛的檔口買牛肉,相信是為牛癡老公青雲下廚炮製愛心餐,買完牛肉,她又行過隔籬檔口買豬肉煲湯,早前內地豬出現問題, Amy買豬亦專登揀本地豬肉,絕對係精明好老婆。
落區買餸
持家有道的郭藹明,買餸煮飯冧老公早已係生活日常,日前她一個人去到九龍城街市買餸,51歲的她打扮樸素,素顏依然索爆!
只買本地豬
Amy在主打賣本地豬的檔口買豬肉煲湯,保證老公食得健康。
揀靚牛下廚
明顯是九龍城街市熟客,郭藹明極速行上街市二樓幫襯馳名的新鮮牛肉檔,年輕檔主一見劉太已經好好招呼!
愛搵平民嘢食
老婆入得廚房出得廳堂,劉青雲對食亦有心得,不過,並唔係要大魚大肉先開心,反而係鍾意搵地道好嘢食。據知情者謂:「青雲同Amy兩公婆都唔注重物質,食嘢更加隨意,不過就好鍾意捐窿捐隙去搵好嘢食,就算佢哋咁出名,都唔介意食茶記同大牌檔,唔少人喺大坑撞過佢哋食十幾蚊一碗粥,又會喺深水埗食腸粉,去沙角邨大牌檔撐枱腳,食嘢好平民,因為佢哋兩個都咁純樸,咪咁夾囉!」
能夠婚姻保鮮21年,當然唔係一朝一夕,好似近日忙完電影工作,較為得閒的青雲,日前亦專登到九龍城買酥皮蛋撻慰妻,肯定令老婆未食已經甜入心。
買撻慰妻
同老婆一樣係九龍城地膽,劉青雲日前專登去九龍城侯王道,買馳名酥皮蛋撻,相信是買回家同老婆一齊分享。
火速歸家
買完蛋撻,青雲急急上車趕返屋企。
親民影帝
本來入咗759揀飲品,不過格價專家最後都冇買到嘢,行出舖頭時發現記者,親民的青雲離遠同記者揮手打招呼。
電影大收
同張家輝林嘉欣合演的《廉政風雲 煙幕》大收,有指電影將拍續集,睇嚟主角劉青雲真係有排忙。
轉行賣撻
80年代同鄭敬基合唱〈酒杯敲鋼琴〉爆紅一時的黃寶欣,隱世二十年後，17年變身老闆娘在九龍城開舖「酥妃皇
后」，賣酥皮蛋撻。店舖主打全人手製造，製法源自老餅店大同的退休師傅，號稱有368層的港式酥皮盞，要師傅半夜三四點開工，壓製9小時，才製作成千二個酥皮蛋撻。開舖初期，黃寶欣不時落舖監工做「生招牌」，吸引唔少人慕名幫襯!
劉青雲 郭藹明 恩愛24年
結婚20年，劉青雲和郭藹明這對今年步入「瓷婚」的圈中模範夫妻，至今行街仍會甜蜜拖手，恩愛羨煞旁人，能夠令婚姻保鮮，劉青雲坦言全靠老婆郭藹明功勞，他大讚老婆說：「太太係我人生最好嘅禮物，佢好聰明，我鍾意咩、唔鍾意咩，唔使講佢都一清二楚！」
人生最大膽一次
事實上，當年鼓起勇氣追求現任劉太，劉青雲曾表示這是他人生最大膽一次。據知情者透露：「青雲同Amy 拍《大時代》嗰時仲未拍拖，佢兩個喺埋一齊都係多得周慧敏撮合，94年Vivian開演唱會，因為知道青雲對Amy有意思，就邀請佢兩個一齊去睇演唱會，幫青雲製造機會，不過之後青雲再約會Amy，都要鼓起好大勇氣，始終當時Amy有學識又靚，而青雲事業先啱啱起步，冇車冇樓，第一次約 Amy去街，青雲仲硬住頭皮叫Amy揸車去接佢，然後一齊食飯，所以到依家佢都成日提起，好感激老婆當時冇嫌棄佢！」
復出要問准老公
眾所周知，郭藹明是美國南加州大學機械工程學雙碩士，當年Amy為青雲放棄工程師工作。想不到人妻婚後至今，仍然為陪老公放棄復出；三年前《大時代》翻播，一眾演員被炒熱，當時就有唔少人邀請Amy復出。Amy友人透露：「嗰時同無綫都出嚟傾咗幾次，不過除咗睇角色， Amy最著重係時間，講明一定要就咗老公檔期先，最後都因為怕困身陪唔到老公，所以傾唔成！」事事老公行先又識得撒嬌，相信就是郭藹明維繫甜蜜婚姻最佳秘技！
激罕當街摟錫
劉氏夫婦出名恩愛，兩人曾被本刊捕獲拍拖到九龍灣MegaBox睇戲，散場離開搭扶手電梯時，郭藹明激罕公開施冧功，兩手從頸環抱老公撒嬌摟錫，甜蜜儼如新婚，睇青雲望住老婆嘅眼神，就知佢完全被老婆降伏！
拍拖行超市
兩公婆由司機接載返回西貢，先到市中心超市上糧，入到超市，郭藹明極速去攞手推車掃貨，青雲就跟在後面，唔會乜都等老公服侍，Amy這個超級好老婆真係邊度搵！超市上完糧，兩人坐車返回西貢西沙小築寓所，已經是傍晚六時多，相信Amy又會親自下廚炮製美食，同老公留家撐枱腳。
拒翹埋手等服侍
郭藹明這位碩士港姐老婆，除咗高學歷有內涵，更加是個賢內助，溫柔又善解人意，賢淑能幹兼備。據Amy好友透露：「Amy份人好溫柔隨和，同老公結婚咁多年﹐相處仲係相敬如賓，同老公講嘢仲會講唔該、麻煩晒，青雲受老婆感染，都會同太太講多謝、唔該，相處會互相尊重，而且Amy對住老公仲好識撒嬌，保持住拍拖嗰份新鮮感！做咗少奶奶咁多年，老公又搵到，但Amy都唔會翹埋手等人服侍，佢知老公喺出面工作辛苦，唔想青雲仲要為屋企事費心，自己會將屋企啲嘢搞得妥妥當當，執屋煮飯完全唔使老公操勞，好似屋企要換燈膽，或者簡單嘅髹牆，Amy都會自己落手搞掂，雖然有啲事可以用錢請人做，不過Amy唔想亂花老公啲辛苦錢，會應使得使，平日生活都好平民化！」
兩年幾打造4千萬堡壘
持家有道的Amy，一直手握青雲財政大權，十多年來負責幫老公投資，先後買賣超過十個物業，除咗買樓，亦有買舖及商廈，幾乎每次都賺錢離場，成功幫老公滾大副身家。劉氏夫婦鍾情西貢區，之前租住西貢龍嶺獨立屋多年，14年底以3,280萬買入現居的西貢西沙小築獨立屋，現市值近4千萬，由於該屋苑樓齡已經三十多年，青雲夫婦要將新居全面翻新，裝修工程搞足兩年幾先完成；雖然間屋面對無敵西貢海，但二人卻放棄裝落地玻璃，更封閉唔少窗位，貫徹其低調作風。
據知情者透露：「佢兩個都鍾意住郊區，特別鍾情西貢 區，不過西沙小築好少有放盤，嗰次佢兩公婆一齊去睇樓，Amy 一睇已經好鍾意嗰度嘅無敵海景，就即刻扑槌買，但因為嗰度樓齡已經有三十幾年，間屋要大翻新，Amy仲搵咗設計師同風水師幫手，喺高人教路下，刻意喺大廳唔裝落地玻璃，裝修搞咗兩年幾先完成！」
為打造安樂窩 單拖去旺角揀建材
影帝背後女人一啲都唔簡單，知道老公在外拍戲相當忙，郭藹明就一個人為西沙小築新居搞裝修，兩年多來，經常一個人落上海街，親自買裝修物料，過去曾被本刊拍得打扮樸素去睇裝修材料，當日Amy無論揀地磚、櫥櫃、浴室材料甚至門柄都非常細心，再落手落腳度尺，完全係完美妻子典範。
劉青雲郭藹明十句愛情金句
1.「選愛人不需要太多標準，只要三樣﹕不騙你，不傷害你，和願意陪著你。」
對劉青雲來說，愛情十分簡單，也沒有很高的標準，只要對方懂得愛你、珍惜你，在有困難的時候在身邊陪伴就已經足夠。
2.「我想要的愛情很簡單。我說話時，你會聽。我需要時，你會在。我轉身時，你還在，這就夠了。」
會聆聽和陪伴對方是很重要的事，有些情侶或夫妻連溝通、聆聽對方的時間都沒有，這段關係當然也走不長久。
3.「如果可能，找一個你願意跟他說話的人結婚，愛一個人，就是願意跟他說話。」
愛你的人就是會願意一輩子聽你說話的人，和他在一起你們總有永遠聊不完的話題，不論是開心還是悲傷的事，對方都會在你身邊聆聽及支持你。
4.「在這個世界上，什麼事情都可以將就，只有結婚這件事情沒辦法將就。」
愛情從來都不能夠將就，愛就是愛，不愛就是不愛，結婚更不是為了取悅家人而做的，若將就愛情、婚姻，到最後苦的只有自己。
5.「總有那麼一天，你會不需要轟轟烈烈的愛情，你想要的只是一個不會離開你的人。」
愛一個人並不是口上說「愛你」那麼簡單，反而是處處著緊你，難過時給你安慰、孤單時陪伴在你身邊的人才是真正的愛。
6.「愛情就是你沒有辦法理解的一樣東西，是命運。」
愛情是很難捉摸的東西，有些人相愛卻不能愛，而劉青雲則很慶幸命運讓他遇到郭藹明，讓他們一路走來可以互相依靠對方。
7. 「有的人，是拿來成長的；有的人，是拿來一起生活的；有的人，是拿來一輩子懷念的。」
人生會經歷多次的戀愛，而每一次的戀愛都讓你成長，心底也會分辨得出哪個人是自己值得依靠終身的人，哪些人只是愛情經歷中的過客。
8.「有的人把心都掏給你了，你卻假裝沒看見， 因為你不喜歡。有的人把你的心都掏了，你還假裝不疼，因為你愛。」
真正愛你的人會為你付出一切，若然你清楚自己對對方無意，也無謂勉強二人在一起，倒不如花更多時間及心思尋找適合自己的另一半。
9.「男人的邏輯永遠是『如果你愛我，你就不會走』。而女人是『如果你愛我，你會來找我』。」
很多時候就是因為男女的愛情邏輯不同而導致雙方越走越遠，一方以為對方不會走，一方以為對方會挽留，也許大家仍然相愛，但是亦因此而分開。
10.「模範夫妻這個稱號的壓力好大，我們就是一般的夫妻，很多夫妻都是平平淡淡過一輩子，我們也是平平凡凡。」
說到底，愛情及婚姻還是要靠雙方同時付出、愛彼此才能走得長久，而劉青雲郭藹明多年來靠的就是互相扶持才能走到今天！
