前度閃婚獨女拍拖！李麗珍傍實老友記開飯
撰文：東方新地 圖片：新傳媒圖片、Instagram
李麗珍前度閃婚
舊愛結婚了，新娘不是李麗珍，三十年感情敵不過撻著一年、志趣相投的新歡，潘源良高調晒婚照又同新婚太太Rita聯手為二次創作演唱會連月宣傳，放閃不停。上月初潛水多時李麗珍終於蒲頭，接受雜誌訪問承認大受打擊，睇新聞才知道舊愛婚訊、其時她與愛女倚榕身在加拿大：「我同個女對望，唔敢做乜特別反應，當時的確係空白一片。然後就開始鑽牛角尖，點解會咁樣呢？一定係我唔夠好，但有乜唔夠好呢？又諗唔到喎！」李麗珍更透露每次想起「男友結婚了，新娘不是我」而爆喊，更為此食咗兩年情緒藥。
孤單珍妹伴孤獨老人
多年來無論獨身定拍拖，都有女兒在旁相依為命，不過21歲的倚榕已經大個女，最近個人社交網絡被爆出大量火辣靚相，婷婷玉立深得媽咪遺傳，社交生活亦極精彩有男朋友仔又攬又拖。女大女世界、與其留在加拿大伴讀，不如提前回港習慣獨居生活。以前除咗獨力湊女就係愛情大過天，如今回復單身，愛女亦不在身邊，珍妹有時間精力可以關懷吓身邊長輩。日前就見素顏珍妹陪住年約七、八十的花甲伯伯現身跑馬地，陪完醫肚再陪散步，食飯時全神貫注做聆聽者，散步回家時則放慢腳步細心照顧。活了大半世，到53歲又再剩下一個人，對住孤單長輩想必感受特別深，所以特別能夠體貼又體諒。
體貼咬耳仔
飯後陪住伯伯慢慢在跑馬地散步，李麗珍知道老人家聽力不好，說起話來都貼近對方耳邊慢慢講。
茶記撐枱腳
陪長者一餐飯食足兩個鐘，大部分係伯伯講不停，而窩心後輩珍妹就全程細心聆聽。
李麗珍對於前度結婚，就表明冇回應，亦冇正式露面過。及後其好友張文慈喺社交網上載兩人合照，留言話：「好開心今晚見到珍妹，依然明艷照人#李麗珍」相中嘅珍妹淡妝上陣，的確好省鏡！
失戀令珍妹抑鬱
2016年跟潘源良四次分手，珍妹大受打擊，她在朋友的支持下才活躍起來。今年1月她在社交平台上寫道：「這七年來都沒特意慶祝，但今年生日過得特別快樂。之前過著一塌糊塗的感情生活，令自己抑鬱了很久，一直都不願意去面對大家， 把自己封閉著， 多謝一群朋友對我的用心，沒有放棄及離開我，令我終於都開竅。明白到日子總要過，失去了愛情，但原來身邊還有很多支持我的人，終於明白自己並不孤單，多謝朋友們，也希望大家像我一樣，可以走出黑暗。不用怕，再難過的都會過，謝謝#國峰督促我運動keepFit #坤哥有時指點我唱歌。」
女大十八變
與前夫許愿婚後四年離婚，多年來一個人照顧獨女許倚榕，最近倚榕私相簿外洩，原來女大十八變，21歲女極省鏡！
珍妹係一代性感女神,倚榕身材亦都深得媽媽真傳,再加埋識影相有角度呢,大長腿青出於藍。
中學至今被珍妹送到加拿大讀書，愈大愈靚的倚榕社交生活極精彩，男女朋友都唔少，仲有疑似男朋友仔攬腰又拖手。珍妹話囡囡都有帶過男友回家。
四離四合
潘源良與珍妹拍拖期間，經歷「四合四離」，潘早年接受訪問透露：「1986年我搵佢合作拍電影，大家相識後，很快有呢種(戀愛)感覺，不過最終冇繼續落去，各有各發展。」當年李麗珍跟潘源良拍《戀愛季節》傳出不倫之戀，有傳當年李麗珍介入令男方婚姻破裂，不過二人感情無疾而終！
92年當年珍妹憑神劇《大時代》方婷一角，事業漸有起色，二人雖然於公開場合中重遇，可惜當時潘源良因要到外國工作，未有重新發展！其後珍妹於1996年與香港音樂創作人許愿結婚，被傳媒冠以「美女與野獸」組合，婚後育有一女許倚榕，至2000年，李麗珍與許愿離婚，女兒撫養權歸其擁有。
兜兜轉轉後，直至2007年，潘源良同珍妹又再次碰面，雖然多年冇見，但雙方戀愛感覺仍在，加上大家都冇太大改變，於是感情發展神速！雖然有傳珍妹19歲女兒許倚榕唔希望佢哋一齊，但其實潘源良跟倚榕相處融洽，關係如朋友，而分手導火線，有指珍妹性格任性所致！
潘源良被分手感愕然：唔知咩事
2016年二人再次分手，李麗珍好友張文慈於微博貼上跟珍妹合照，留言：「傻豬~忘記他吧！鞋若不合穿，勉強著也是痛！」似叫珍妹忘記過去，之後齊齊到台灣旅行，相信順道為珍妹治情傷！
對於分手一事，潘源良當時大感愕然說：「邊度講㗎，張文慈講？咩人嚟？總之我了解吓佢講咩先，依家完全唔了解情況好難答你。佢(珍妹)好似呢兩日去台灣，好似話張文慈話幫佢睇醫生醫腳。我了解下先，佢又唔喺香港，我又唔知咩事。」
許愿護女兒：讓孩子享受年輕歲月
潘源良與珍妹再度分手，有指係因為珍妹與前夫許愿所生的女兒許倚榕唔接受潘當其繼父，但許愿接受訪問時就代女澄清，指倚榕絕對接受潘源良，而且潘係一個充滿才華、值得尊重的人。而且倚榕只得18歲，唔希望佢被傳聞影響。
愛女心切的許愿，呢日在微博再為女兒發聲：「很多事情，成年人也梳理不了，更何況是小孩子；有些事情，成年人也決定不了，更遑論小孩子能左右。讓孩子享受她的年輕歲月吧。」
