前度現任隔空互片 磨心羅嘉良愁爆返港
前妻大戰現任
羅嘉良主演的百集長劇《創世紀》去年九月重播，帶動長駐內地的撈家人氣回升，不過同時卻觸動前妻方敏儀神經，在社交網貼出多段留言，「怨恨是一杯毒酒……用別人的錯誤來懲罰自己，是一件非常愚蠢的事情……快樂過自己的人生，就能贏多少人心」、「生活不容易，還是要堅強的活着」等，矛頭直指當年被指介入羅方婚姻的第三者、羅嘉良現任太太蘇岩！
同一時間，蘇岩在微博激憤留長篇文字「我從不抱怨、時時感恩，不跟別人計較，……輸贏我想無須評判，也不必評判」。之後連續數天，方敏儀連環貼文回話「激怒你的人不能再激怒你」、「人生珍貴不是得到或擁有，而是能把握幸福」、「人生如夢，得也好，也只不過是過眼雲煙」似指對方要好好握住眼前幸福，因為一剎那光輝唔代表永恆，只是過眼雲煙，句句言之有物，蘇岩則以「我有個好男人，愛我心切的女兒」用老公羅嘉良同囡囡詠婷來大晒幸福，夭心夭肺，言詞直插老公的前妻方敏儀。
蘇岩要求搬返港
據知蘇岩近日以女兒學業為大前提，要求撈家舉家搬返香港長住，令撈家煩上加煩！據聞撈家一直唔搬返香港，就係唔想兩個女人喺同一地方。當年再婚喺北京搞，就係唔想影響兩個家庭。不過近月北京霧霾好嚴重，加上囡囡長大，香港教育比較優勝，所以蘇岩提出搬返香港住！
返港搵老友吐苦水
撈家近日返港為新劇造勢，蘇岩未有跟隨，過去撈家返港宣傳、出席音樂騷、甚至早前到泰國拍網劇《無間道》，蘇岩都做跟得太太。這次撈家刻意安排獨自回港，無非想避免現任和前度又再開火。早前出席無綫活動，活動後更被大批fans包圍攞簽名及影相。
返回尖東酒店後，六時許再次出動，步行到佐敦、馬德鐘投資的日本餐館，約了老友馬德鐘、郭政鴻、前經理人，以及新紮陳庭欣、張曦雯，敍舊兼識新朋友吹水飲酒食飯本應開心，不過撈家當晚卻心事重重，全晚捉實馬德鐘大吐苦水，當眼前清酒如忘情水，一口飲盡再飲。羅嘉良不時單拖出餐廳外企街煲煙，每次連扯兩支煙，眉頭深鎖，前妻同現任隔空開火，唔愁就奇。
醉到Out Fo
凌晨十二時許，撈家腳步浮浮，由馬德鐘扶住上其保母車，落車時，醉意十足，行路呈S形，酒店門都冇力推開﹗撈家的煩惱，的確難以一時三刻可以解決，只有靠酒精來暫時麻醉﹗記者上前問佢係咪飲咗好多？滿身酒氣的羅嘉良答非所問「馬德鐘…佢個店…好食…好……」，行到兩邊擺、S字行入酒店。
