再做老襯 鄭敬基閃婚

早前本刊拍得53歲鄭敬基與細佢19年任職地產女友Angie拍拖濕平，二人相識約半年，基仔宣布今年同34歲女友Angie拉埋天窗，婚禮定於5月7日喺北角國際神召會堂區舉行。基仔坦言女友俾到佢安全感，由拍拖開始已第一時間同一對仔女開心share，更獲仔女支持。雖然今次是鄭敬基第二次結婚，不過依然保留接新娘儀式，而新郎哥一對仔女更會擔任兄弟團，至於圈中老友錢嘉樂亦會出席婚禮。

鄭敬基兒子鄭家揚與女兒鄭依揚

據知基仔對未婚妻Angie為人讚不絕口，大小事都由Angie話事！而基仔坦言對未婚妻感覺一見如故，信仰同價值觀都一致，更欣賞對方爽朗簡單性格：「我有同佢講話我年紀大，可能過兩年會坐輪椅，佢就叫我唔使擔心，無論點都會一齊去面對！」問到婚後會否立即造人，基仔笑言：「我就順其自然，反而女友問過我介唔介意佢唔生！」

如欲率先接收資訊，請讚好我們的FB專頁並於「已讚好」選單設定「搶先看」，多謝支持。

網址：www.facebook.com/orientalsundayhk