全民造星5｜評判激讚藍組依然落敗少爺占「造星論」辣㷫網民

藍組「重量級」組員落力演出泳兒力讚「態度差」Adam

藍組擁有三位「重量級」組員Mark Chan、Adam和樂樂，雖然身形龐大，不過跳起舞上嚟都唔輸蝕，就連被指態度差的Adam都落力完成表演。Taco的Rap，加上Jason Loi的電眼，藍組的表現令後台的排舞師耀Sir同寶姐以為他們贏梗。加上表演後，泳兒點名讚Adam落力：「其實佢喘晒氣喺後面，但佢冇放棄跳到最尾，見到你哋好辛苦」，Ariel Lai又表示很欣賞藍組的努力：「睇得出唔係好擅長跳舞，但佢搏盡」，後台的導師Rosa同釗峰激動拍手認同。

全民造星5 viutv Adam被組員指態度差，但他都落力演出。 — Adam被組員指態度差，但他都落力演出。（圖片來源：《全民造星5》截圖）

全民造星5 viutv 被泳兒點名力讚，Adam非常激動。 — 被泳兒點名力讚，Adam非常激動。（圖片來源：《全民造星5》截圖）

紅組以3比2取勝少爺占發表「造星論」辣㷫網民

至於紅組，評判均認為成員的身形較輕盈、動作較為瀟灑，但就沒有就唱功或舞技作出評論。正當大家都以為藍組會勝出時，紅組卻以3比2取勝。Ariel Lai、陳詠謙及少爺占撳紅燈，陳詠謙指：「好難揀，兩邊都有好好嘅特質。紅組呢5位朋友睇落已經準備做明星、做藝人。」少爺占更發表「造星論」：「因為都係『造星』，紅組嘅Package好啲，可塑性高啲。」一句講晒，就係要靚仔。至於撳藍燈的泳兒就直言被藍組的鬥志打動：「如果佢哋有呢個鬥志，形象、身形而家未夠好，如果需要減磅或者執下個造型，佢哋都可以做得到。」

全民造星5 viutv 評判認為紅組成員身形較輕盈、動作較為瀟灑。 — 評判認為紅組成員身形較輕盈、動作較為瀟灑。（圖片來源：《全民造星5》截圖）

全民造星5 viutv 紅組贏係靠外形？ — 紅組贏係靠外形？（圖片來源：《全民造星5》截圖）

全民造星5 viutv 少爺占發表「造星論」，網民就唔多Buy。 — 少爺占發表「造星論」，網民就唔多Buy。（圖片來源：《全民造星5》截圖）

評判準則講外表網民唔Buy留言鬧爆

藍組導師Jay Fung直指評判的準則是要「造星」：「剩係講外表，個Package囉」，音樂人T-Ma不同意評判的考量：「但其實有好多唔同種嘅星」，Rosa老公、導演兼演員的German反問：「點解我哋唔可以Define一種星出嚟？」，釗峰續指：「希望自選可以係一個證明咩叫Talent」。

不單只藍組導師激動，就連網民都一樣戥藍組唔抵，湧入ViuTV Facebook洗版式留言鬧爆少爺占的「造星論」：「評判講嘅評語真係難以想像，要講外型，咁一早叫人唔好嚟參加啦！人哋唱得好、跳得好，唔明點解都係紅組贏」、「頭75秒真係耳朵流產…有咩可能唔係藍組贏？個個就算索氣都keep到個音準，反而紅組跳到尾加速段都甩得幾勁…定係我睇錯咗咩」、「其實使乜靠實力，靠身形就得」。睇嚟評判同網民意見兩極，仲懷疑係咪同評判睇緊同一樣嘢。