入行30年首次紅館開騷 10首趙學而必聽經典歌
撰文：東方新地
圖片：新傳媒圖片庫、YouTube
趙學而入行30年 首次紅館開騷
趙學而 (原名叫趙慧燕) 終於宣布下月喺紅館開騷，唔少歌迷都認為佢係紅歌唔紅人，但肯定係公認嘅唱得之人，而且係Hi-Fi界嘅寵兒。不過好多歌迷知道佢紅館開個唱，開心之餘又擔心買唔到飛呀！學而被問到會否加場，佢話唔敢講加定唔加，即使開一場紅館個唱，對佢嚟講已經係好滿足嘅事，而且一切視乎售票情況再考慮加唔加場，佢話佢本人始終喜歡「貴精不貴多」！
對於歌單及嘉賓名單，學而話一切仍未落實，但對於個唱嘉賓，佢傾向揀啲特別啲嘅嘉賓，例如曾經喺音樂上合作過嘅歌手。
1.《再見了》
94年趙學而推出第一張EP《反叛情歌》，全碟收錄五首歌曲，《再見了》係主打歌之一。首歌講述一位女孩跟男友分手後，用瀟灑心態離開這段關係！當年同學而同期的新人仲有張玉珊、曹永廉、陳山聰、吳倩蓮等，競爭好激烈㗎！
2.《每隔兩秒》
95年中，學而推出了首張大碟《每隔兩秒》，獲得金唱片銷量！由李敏作詞嘅《每隔兩秒》係該碟第二主打歌，首歌喺無綫及港台派台歌曲都攞到第一名，而喺商台都有第二名佳績。其實另一首同樣由李敏填詞嘅《終於可結束》都好好聽㗎！
3.《我恨我是女人》
同樣出自《每隔兩秒》大碟，也是受歡迎作品之一，首歌更係Cash流行曲創作大賽嘅亞軍作品，是一首很經典的情歌。睇吓啲歌詞講苦戀被折磨，「我願你是女人，戀愛不發生，不必求你再熱烈抱緊」
4.《談一場不後悔的戀愛》
張美賢嘅填詞嘅《談一場不後悔的戀愛》都有好多人鍾意同認識，因為係《創世紀2》插曲同配樂，好配合當中嘅劇情，「仍然不知道悔改 天與地隔開 信任奇蹟可以存在 如有幸留住你 純屬意外 因此更深愛⋯⋯」
5.《自欺欺人》
由才女梁芷珊填詞、伍樂城作曲嘅《自欺欺人》在當時非常受歡迎，句句夭心夭肺，「用我青春押一注，換你回頭停留是處，只想你到最後，心中會內疚，還後悔付出的愛不夠！」道盡女人心聲！
6.《尋開心》
「夕爺」嘅詞唔講得笑「我尋你開心 你尋我開心 我們還有甚麼可以恨」，「愛情求開心，沒有所謂敵人，快別要弄壞美好氣氛，別在乎甚麼，所愛非人，誰能讓你愉快，便算，合襯」道出愛情各取所需，到今日2018年依然啱聽⋯
7.《歉意》
《歉意》收錄在首張大碟，係第四主打歌，此曲亮點係由歌手黃凱芹一手包辦作曲及作詞，加學而演繹，冇得頂！
8.《誰明浪子心》
呢首唔使多講，當年唱K必點之一，無論係王傑嘅獨唱版，抑或同學而嘅合唱版本都各有特色！
9.《反叛情歌》
學而一出道無論形象同歌曲都好鮮明個性，一出道第一隻EP主打歌，呢套加大碼西裝無得頂，又合配到首歌意境「但我想，自主宰未來，無拘束戀愛，旁觀者評論放開夢，願衝開任何障礙，重回自我和反叛讓你深愛」
10.《尋人》
當年學而代言咗GAVIN服裝系列，仲拍攝咗一輯電視廣告，而男主角為前亞洲電視藝員袁文傑。《尋人》就係廣告歌，所以不時在電視播出！
