入行16年 升呢做男二 33歲鄭俊弘捱出頭
廣告
在2013年《星夢傳奇》中 鄭俊弘 感性一句：「只求觀眾講得出我個名。」大灑洋蔥，令不少觀眾都深受感動，最後鄭俊弘贏得冠軍，加入星夢娛樂做歌手，不過成功做到歌手後，鄭俊弘拍劇就變得好揀擇，自2014年拍完台慶劇《名門暗戰》後，至今只在去年拍了一套《與諜同謀》，劇中當然唔使再做茄喱啡，而係做羅嘉良個仔，首次擔正做男二，戲分勁多，仲同無綫力捧的花旦李佳芯(Ali)做一對，真正捱出頭！
相隔兩年 做復仇chok男
鄭俊弘自01年17歲時已參加全球華人新秀歌唱大賽入行，得以簽約華星唱片公司，但同年10月就因華星宣布停止除版權管理外所有業務而被解約。02年他加入無綫第18期藝員訓練班，同班中人有胡定欣、黎諾懿、蔡淇俊等。到03年，鄭俊弘開始拍劇， 每年都拍攝多部劇集，不過都只係一些小角色，直到06年，鄭俊弘在《法證先鋒》飾演蒙嘉慧細佬梁小剛一角，先至有較多戲分，但觀眾仍叫不出他的名。
一路捱到2013年，在《星夢》中彈起後，鄭俊弘終於成功入屋，仲加入星夢娛樂，一圓歌星夢。近年鄭俊弘專注做歌手，已經兩年無拍劇，今次回歸演員角色，一改暖男形象，大玩chok爆復仇路線，唔知觀眾又buy唔buy呢？
