帶個半月囡囡去做Gym即被「報復」 陳柏宇：「怪唔知咁熱啦！」
撰文：Sunday Kiss | 圖片：陳柏宇IG | 編輯：東方新地
帶個半月囡囡去做Gym即被「報復」 陳柏宇：「怪唔知咁熱啦！」
愛女心切的Jason平日一收工就黐實囡囡Abigail，似乎呢位新手爸爸仲未學識放手，仲變本加厲。自從囡囡出世後，Jason日日返工盼收工湊女。早前開演唱會亦自爆：「依家我肥咗，生咗個女之後，少咗做gym嘅動力，成日都好想求其舉幾下就返屋企」
已經久未見做gym嘅Jason，近日終於肯出門運動。不過，竟然出去gym都要抱埋Abigail一齊去。Leanne喺社交網上載咗一張相，相中只見Jason旁若無人咁抱住囡囡置身健身室，完全忽略身邊做緊gym嘅肌肉男，對住囡囡又抱又錫，簡直在佢「眼中只有女」！
即「瀨屎上身」 陳柏宇：「怪唔知咁熱啦！」
不過之後Leanne再上載一段短片，片中Jason唔再係掛住抱女，而一邊笑一邊不停開口大叫老婆。原來係因為Abigail瀨咗「便便」落佢身上。片中見Jason好驚訝咁話：「唔怪之得咁熱啦」。奶爸上身嘅Jason就不停嗌老婆快啲幫手去攞尿片。有網友表示，睇嚟係囡囡唔鍾意睇「肌肉叔叔」，返屋企即「報復」爸爸。
自從囡囡出咗世之後，陳柏宇（Jason）就變成「晒女狂魔」，幾乎日日都會提起呀女陳羿辰（Abigail）。日前，Jason同老婆符曉薇（Leanne）帶住Abigail去影證件相，點知B女影出嚟嘅成品竟然成個憤世嫉俗樣咁，認真笑爆咀！
撰文：東方新地｜圖片：陳柏宇、陳羿辰、符曉薇Instagram
陳柏宇囡囡憤世嫉俗樣影證件相
自從今年9月陳柏宇囡囡出世後，Jason就有女萬事足，不時都喺個人社交網大晒B女Abigail嘅生活相。早幾日前，呢位新手老竇就帶咗呀女去打針，仲痛埋呀女個份，Jason真心體會到心頭肉嘅意思！
日前，Jason兩公婆就帶住Abigail去影人生第一次嘅證件相。平日喺老竇鏡頭下表情多多嘅Abigail今次影證件相就俾足驚喜父母，皆因張證件相見到佢喞都唔笑咁，連媽咪Leanne都話：「點知佢整個憤世嫉俗樣出黎」，認真搞笑！
雖然話媽咪對於呀女呢個不滿樣有啲投訴，但其實如果真係咁唔鐘意都可以同呀女再去影過嘅，咁就唔洗擔心呢個憤世嫉俗樣要用喺passport度5年啦！
陳柏宇太太 大嘆新手媽媽湊B心聲
早前，符曉薇就喺社交網大嘆新手媽媽湊B心得。佢上載了一張同囡囡嘅合照，並留言話：「近排發現最無聊嘅問題，就係問我做緊乜。」
leanne接著解釋，「我每日每三個鐘餵奶，撞正佢心情好個餐，半個鐘可以攪得掂。撞正佢心情差個餐，起碼搞成個幾鐘，之後仲要每三個鐘泵奶，自己都冇乜時間做自己野。有時大小姐仲唔肯訓，扭計要抱（其實望到佢，已經想抱佢），唔好講話自己時間，去個廁所都唔得。不過早上有陪月幫手，可以訓多兩個鐘同痾篤屎，所以話陪月有幾重要！」
唔少網友都同Leanne講「要好好珍惜同享受照顧BB嘅過程」，另有網民大讚符曉薇係好媽媽：「湊B唔假手於人！」
陳柏宇正式宣布囡囡中文名 網民：好深奧嘅字！
陳柏宇（Jason）自9月底榮升做爸爸之後，隨即化身做「晒女狂魔」，不斷瘋狂喺個人社交網上載囡囡Abigail嘅得意相外，仲幫呀女開埋個全新帳戶！今日，Jason更終於宣布囡囡Abigail有中文名啦！
陳柏宇正式宣布囡囡中文名
陳柏宇於呀女嘅個人社交網公布囡囡Abigail有中文名啦！Jason就上載出世紙上面寫有「羿辰」兩個字嘅相，並留言：「i now officially have a chinese name!!（我依家正式有中文名啦！）」
據了解，Jason太太符曉薇（Leanne）就透露呀女個名係搵師傅改，指師傅計過囡囡個八字，覺得佢重金，Leanne就覺得「羿辰」呢個名好靚，所以就揀咗呢個名。
自爆「爆笑」生產經過 陳柏宇太太：「條粉蛋喊到豬頭咁」
Leanne日前於社交網分享囡囡出世當日嘅「生產記」，佢留言話：「首先25號9點幾起身痾尿，點知好似唔識停咁，仲有少少血，心諗呢啲會唔會叫做穿羊水呢，我仲喺廁所大叫陳廣偉（Jason），點知條粉蛋以為我叫佢執屎執尿，佢扮聽唔到繼續瞓覺。」
穿羊水 | 陳柏宇懶理：「拍戲嗰啲唔係咁」
見老公繼續瞓唔理自己，Leanne唯有自己打畀醫生求助，醫生聞言即叫佢入院，然後：「我入房拍醒條粉蛋，出門口嘅時候我仲同佢講，攞埋個走佬袋出去，點知佢同我講話唔使，佢話唔似有啲乜，人哋拍戲嗰啲唔係咁，如果真係要生嘅先返嚟攞，最弊嘅係我竟然聽佢講。」
陳柏宇陪產 不忘搞爛gag
安全到達醫院之後，去到醫院姑娘檢查完確實係穿羊水，即刻call醫生返嚟接生。
Jason當時仲以為老婆未生得，好得戚咁同姑娘開玩笑：「條粉蛋仲同姑娘講，乜同拍戲咁大分別嘅，乜穿羊水咁平淡，姑娘同佢講嗰啲係做戲。之後入到手術室門口，條粉蛋換完套藍色手術室衫出黎，好正經同我同姑娘講，你好我係今日嘅醫生，呢個時候麻醉科醫生行過嚟，同我哋介紹自己，點知條粉蛋好厚面皮咁講，原來你係醫生，我以為我自己係醫生，啲醫生護士喺度好開心咁樣笑，仲同我講你先生好搞笑，我問番佢哋搞事定搞笑丫，之後我就推入手術室。」令Leanne哭笑不得。
陳柏宇陪產「喊到豬頭咁」
臨產一刻，Leanne開始好緊張，因為佢聽聞女人生B都要經歷超粗麻醉針同10級痛：「喺嗰個時候先開始緊張，因為聽好多朋友講打背脊嗰支麻醉針係好痛，啲醫生同護士好溫柔，一路叫我唔好緊張，話支針好幼 唔會痛。竟然真係唔痛，之後我下半身已經進入麻醉嘅狀態。」
「喺嗰個時候10分鐘唔使我個女就出咗世，成個過程我都唔係好感受到好痛的感覺。聽到佢（囡囡）喊果下真係滴咗幾滴眼淚，之後望佢條粉蛋（Jason）佢已經喊到豬頭咁。醫生仲問佢剪唔剪臍帶啊，佢即刻say no 。」
生B唔可怕 最可怕係…
最後Leanne仲話原來生仔並唔可怕：「手術半個鐘唔使就完成，原來生小朋友都唔可怕。最可怕係個老公日日夜夜對住你個女係咁影係咁影。」
陳柏宇「痴漢湊女法」 有女萬事足
自從B女 Abi出世後，陳柏宇日日夜夜都掛住湊女。老婆符曉薇形容「個女一出世就有個痴漢永遠跟著佢」
呢個男人真係好恐怖，佢自己影個女就算啦。仲要逼我幫佢同個女合照，你睇佢個樣幾滿意，你睇我個女個樣幾無奈。
符曉薇做母乳媽媽 嘆：「滴滴皆辛苦」
陳柏宇為愛女開live 老婆都頂佢唔順：「痴線㗎」
昨日傍晚，Jason更急不及待為一日大的愛女開live，喺個live入面仲會聽到Jason嘅一堆bb話！一開場就聽到太太符曉薇喺旁邊講：「第一日有live，痴線㗎」，Jason自己都笑言：「我自己都未開過live」
喺live入面，Jason簡直係花痴狀態咁，360度咁圍住囡囡轉，不停對著瞓緊覺嘅Abi say hello。
玩玩吓，發現囡囡好多頭髮，仲好抵死咁笑囡囡「含發量」好高，一心想畀網民睇真啲bb嘅濃密頭髮，突然又發現囡囡換個角度睇，頭髮好卷，好似「黑人」。
為咗畀粉絲一睹囡囡開眼樣，Jason不停同囡囡Say hello，又搞笑咁叫囡囡起身：「起身啦，夠鐘返學啦」氹到喺旁邊嘅Leanne不知幾開心。
然後，Jason又講到囡囡15分鐘後將迎來「人生第一餐」，不過就用好可惜嘅語氣話「餵奶無得開live，仲要係餵人奶」，相信在旁的Leanne望著花癡狀老公，應該相當無語。
老婆隔空呷醋：「佢已經唔記得老婆姓乜」
雖然愛女還愛女，都唔可以唔理個老婆嘅 ！Jason老婆都頂唔順老公淨係掛住理個女，結果Leanne就上載張老公甜望囡囡嘅相，留言：「Welcome to the world Abigail 係今日開始陳生眼入面 已經被另一個女人霸佔左 佢已經唔記得咗佢老婆姓乜」老婆擺到明呷梗醋喎陳生！
同時，有網友搞笑留言話：「你睇下佢短短一日post 左幾多個 果個女人張相」Leanne都回覆嗰位網友，指：「你睇到個重點了」，醋意極濃！
話雖如此，Leanne都知老公係錫個女係件超甜嘅事，皆因Leanne都喺自己個ig晒出Jason抱住B女甜笑個樣，相信呢位新手媽咪同人妻自己見到呢個畫面都覺得好冧嘅！
當爸第二日 頭號任務：繼續晒女
今日Jason又繼續晒女，並留言：「day 2 of my escape.」似乎意指見到囡囡就係「Escape」，可以幫佢逃離工作上嘅忙碌日程，有心靈治療嘅感覺！呢位新手老竇堅冧到爆燈！
呢位新手爸爸已經好熟手啦。
我家公主今日笑過兩次。兩次我都影唔到。真失敗
