余文樂 新婚3個月 冷待孕妻

撰文：東方新地｜圖片來源：新傳媒圖片庫、余文樂IG、王棠云IG

余文樂 要老婆服侍

余文樂同台灣「皮帶大王千金」王棠云拍拖不足一年閃婚，男神封盤，唔少人羨慕王棠云成功箍實爛玩的余文樂，不過，原來新婚才三個月，不但熱情、浪漫不再，余文樂更不時冷待嬌妻，令陀住樂B的樂嫂一肚氣，不停搵好姊妹訴苦。

樂嫂一肚氣

據Sarah(王棠云)好友透露：「Sarah自細屋企人已經當佢公主咁，樣樣照顧周到，直至出嚟做Model，Sarah先開始獨立，但自從同咗樂仔一齊，佢改變好多，為咗氹男友，唔單止學煮飯煲湯，又學埋整蛋糕甜品，經常製造驚喜畀樂仔，樂仔拍拖時不時飛去台灣製造驚喜畀Sarah，但冇諗過結咗婚之後，樂仔成日掛住打機，乜都等人服侍，拍拖時嘅溫柔體貼都冇晒，話咁快變成老夫老妻冇晒火花！」

情緒起伏大

由於家人全在台灣，婚後移居香港生活的樂嫂，自然乜都依賴老公。知情人士透露：「陀住BB，梗想老公呵護自己多啲，而且Sarah屋企人、朋友全部喺晒台灣，大肚婆情緒又容易起伏，特別需要人關心，但樂仔仲未定性，好多時仲要Sarah反過嚟照顧番佢！好多細微嘢都唔識做，Sarah梗係唔開心啦！」

樂嫂唔快樂

本刊連日來追訪發現，余文樂放假都會陪老婆外出吃飯，現場所見，新婚才三個月，余文樂已經冇戴婚戒，唔似老婆咁珍而重之婚戒不離手，而兩人撐枱腳期間更全無交流，余文樂點完菜已低頭玩手機，食物上枱，都要老婆服侍夾麵，完全冇照顧老婆意思，新婚甜蜜欠奉！話晒大肚婆唔可以動胎氣，余文樂偏偏搞到老婆黑面開餐，真係食咗都唔長肉啦。而明知老婆陀B，本刊更發現他對住老婆照吸煙，變相逼老婆同肚裡BB吃他的二手煙，如此唔體貼老公實在少有。

有咗先結婚

先後同過黃伊汶吳雨霏拍拖，有傳因偷食及貪玩弄致分手收場，兩個前度最終搵到當自己如珠如寶的另一半，偏偏余文樂有過失敗經驗仍未汲取教訓，仲未明白女人係要錫，今次肯結婚定落嚟，亦只因王棠云突然有咗。據知情者透露：「樂仔根本冇諗過咁早結婚，佢成日覺得男人四十幾歲結婚都唔遲，樂媽知佢唔逼得，加上佢阿哥細妹都有小朋友，所以都冇特別催佢，只不過Sarah突然有咗，樂媽都想快啲飲呢杯新抱茶，要佢快啲娶人入門。」難得娶到又靚又肯同你生B嘅好老婆，余文樂要好好珍惜，學吓錫老婆至得㗎！