余文樂冧妻 停工陪坐月 火速追女
周一(14日)晚，本刊記者直擊余文樂撲去醫院接老婆同囝囝出院，雖然忙完工作個樣有啲憔悴，但首次抱仔見人的樂仔，慈父樣出晒嚟，做咗爸爸果然唔同晒。
余文樂 為老婆改變
36歲余文樂榮升人父一索得男，太太王棠云於上周四(10日)於港島港安醫院誕下7磅重兒子Cody，樂仔即急不及待在社交網站率先讓兒子的嘴仔及小手曝光，可見樂仔很想與大家分享這份喜悅，余家上下都非常開心，樂嫂王棠云的父母更從台灣來港探孫，老人家雖然喜上眉梢，但封口不提有關孫仔的提問。
王棠云的出現及兒子的出世，徹底改變了樂仔的世界，對於閃婚，樂仔曾表示是「適當時間遇到對的人」，他更在訪問中承諾日後會揀可以較多時間陪老婆的工作，讓她擁有另一種快樂，兒子出世後依舊有二人世界。知情者透露：「樂仔性格雖然我行我素，但佢家庭觀念好重，凡事都以屋企人行先，依家有咗老婆同仔就更加啦，佢應承呢兩個月會停工陪老婆坐月同幫手湊B，可以嘅話都唔會飛。之前樂嫂陀B佢成日周圍飛，不過一返香港就陪實老婆，班老友都覺得佢變得成熟咗。樂仔好鍾意小朋友，尤其係女仔，佢成日同樂嫂講點都要生個女，仔就陪佢玩車打波，女就愛嚟錫同寵，仲話要盡快生多個女，最好就似媽咪咁有氣質咁靚，樂嫂冧爆點會唔應承喎！」樂仔坦言一切會以家庭行先，即使犧牲休息時間也要陪家人。
樂仔果然講得出做得到，向來篤信密宗的他早前找高人為老婆擇好吉日時辰開刀，上周四王棠云入院準備剖腹生仔，他全程在旁陪實，見證完女人生仔的痛苦，他即日在社交網開po感謝太太，繼分享囝囝的嘴仔及小手的照片後，再晒囝囝的腳印照，留言道：「One of the best moment in my life.(我人生其中一個最好的時刻)」浪子樂盡顯感性的一面。
親自抱仔出院
兒子出世前，樂仔曾被本刊直擊與大住肚的王棠云外出食麵醫肚，期間只顧打機冷落老婆，打機大過天的他，未來的日子應該都冇時間再打機。連日來樂仔都有去醫院探老婆同仔，周一(14日)，他一早就返公司為其時裝品牌生意開會，工作至晚上8時，一臉憔悴的他趕去醫院，原來是為了接老婆同仔出院。現場所見，樂仔在醫院逗留15分鐘便率先抱住兒子離開，見他小心翼翼雙手抱住包到冚的B仔，新手爸爸一臉緊張，登上一早預備好的七人車，而一身黑衣打扮的樂嫂王棠云亦緊隨其後步出，可能開刀傷口加上子宮收縮的雙重劇痛，她以右手撳實下腹，慢慢上車。
接完老婆與囝囝返家後，樂仔應該有排忙，不過他不忘在社交網再出po歡迎囝囝返屋企，希望佢唔會大細超，錫囝囝之餘都唔好冷落仲要靠佢追女的王棠云啦！
