談事業 講愛情 余德丞：我好運！
撰文：東方新地｜圖片：新傳媒圖片庫、余德丞IG
余德丞 幕後走到幕前
余德丞坦言細個夢想係做足球員，入行係因為TVB四年前請人做2014世界盃，問佢無經驗，TVB點解會請佢？余德丞笑言：「人工低！唔係，因為對體育充滿熱誠，我最初入公司係做寫稿記者。係開心嘅，但呢個都係我想轉做幕前嘅原因，因為我既然寫埋稿，咁點解我唔自己講埋？我咪自己出埋鏡。」問佢點由幕後轉去幕前？「佢本身請我係想我做幕前，但我對自己冇咩信心，申請咗做幕後，到我想申請做幕前，自然容易啲。」點睇《體育世界》停播？余德丞直言：「慘啲囉，因為我一三年七、八月入公司，嗰時入去就係做體育，班同事由一三年相處到依家，好多大型賽事一齊做，有啲可惜、傷心囉！」歡送會當日有無依依不捨？「都係影張相、食個飯，都係形式嘢嚟啫，但如果第日有機會幫到手咪再幫吓囉！」
想做足球員，點解會加入香港游泳代表隊？余德丞表示：「我好細個有做兩樣運動，游水同踢波，兩樣運動發展落去，發現游水嘅成績好啲，就專注咗游水，但踢波我都好鍾意，所以由細到大都有踢波同睇波，所以我依家都係一個足球評述員嚟㗎！(笑)」游水最好嘅成績係點？「我游水最好嘅成績就係代表香港參加過青少年奧運會，但未有資格參加亞運同奧運會。」但入咗TVB，反而有機會去巴西奧運，嗰次好興奮？余德丞直認：「係，因為我自己運動員嘅夢想都係去到奧運呢個大舞台，但係我未有資格同能力去奧運，我都希望可以用另一種模式去參加奧運會，我自己可以去到一六年嘅里約奧運會做採訪，其實我係好開心，最緊要見到一班香港運動員，曾經都出生入死訓練過，見到佢哋成功同得到認可，係一件好開心嘅事，都總算圓咗自己心願。」
條路好運又平坦
去完奧運，有咩體會？「首先見到好多世界各地嘅傳媒，見到開幕禮同閉幕禮淨係綵排都用兩日由朝到晚，見到當地嘅人有幾瘋狂，好少睇場足球或者游水比賽，感受到咁嘅氣氛，另外，節目廣播嘅規模，媒體中心好大，啲人出出入入、點樣set up衞星⋯⋯所以成件事係一個見識。」去完里約奧運，返嚟就開始拍劇？「係，返嚟就接咗《誇世代》，嗰時監製都同我講：『你喺嗰邊如果無中寨卡 (病毒)，就返嚟拍劇啦！』當然佢同我講笑，但都係幾大嘅轉變嚟。」入行到依家，覺得自己發展點？余德丞笑言：「我諗用兩個字去形容，係好運！我諗比起好多藝人同事嚟講，條路嚟得好運同平坦啲，一開始體育節目，跟住兒童節目，之後有得做世界盃，跟住奧運，之後有機會拍電視劇，去發展一下，最近仲有一個旅遊節目，途中仲有飲食嘅節目，好開心、好好彩公司畀我做我鍾意做嘅嘢。」
5 年，一加入 tvb 就係同你地合作，多謝你地成就了今天的我🙏🏼 #tvb #sports #體育世界 #一切盡在不言中 #說再見了吧 #所有的第一次都給你 #jengs #hk #hkig #yuts
Dickson Yu 余德丞（@yuduck）分享的貼文 於 張貼
講開拍劇，《誇世代》係將所有嘅focus擺喺除衫戲同埋余德丞嘅四十二吋胸肌度？「唔係，都有坤哥 (吳業坤)、麥明詩、張繼聰、森美，都好紅吖，有人focus其實我當初都估唔到，因為監製本身想我游水，都係希望係我好勝任嘅嘢，我會容易做啲，都係想畀我容易啲handle嘅嘢畀我做，都估唔到會有咁嘅效果。我諗能夠有一件事畀人認得你，都係好事嚟嘅，當然件事唔好太負面啦，講真我游水成日都係咁㗎啦，所以我唔覺得有咩大件事，著條泳褲游水好合理啫，無理由著件潛水衣去游水㗎，當其時我亦都無諗咁多，OK啦、正常嘅一件事。」依家啲劇，成日要除衫？「我覺得就唔使除咁多，我唔係太鍾意將焦點擺喺身材上，反而大家可以欣賞吓我啲爛gag，雖然我知大家都唔太欣賞，哈！或者欣賞吓我嘅內涵，可能我會仲開心啲，好過不斷留意我胸肌四十三定四十六吋。」
余德丞又透露：「最近啱啱拍完民初劇《危城First Lady》，合作嘅係松松姐姐 (陳松伶)、阿Ben黃智賢、徐榮、江嘉敏同陳瀅，應該年尾會播，我做一個爛撻撻嘅車夫，有查案情節，後尾會變咗做西裝骨骨嘅管家。」車伕咪又唔著衫？「熱啲啦，但未必唔著衫㗎嘛，你去到天星碼頭見到以前啲車夫都有著衫啦。」年尾播，通常年尾都係頒獎禮爭獎時期，問余德丞對獎項有咩睇法？「其實由頭到尾，我由做運動員開始，獎項對我嚟講都唔係一件咩嘅事，因為做運動只要快過自己，就係好開心嘅事，攞唔攞到獎唔係好大嘅問題。有咪bonus，無都要繼續做㗎啦，到時就算佢唔畀獎你，但全香港都認同你嘅時候，都係一個成就嚟嘅！但我覺得唔使諗到咁遠住囉！」
隨住 #危城Firstlady 拍攝完成，游池同丁曉堯都要同大家講再見啦👋🏼 藉此送上我地最後一條短片俾大家… 笑下… 我既歌喉 😂 *由於我地竟見不合，我覺得第一段好啲，@kaman_kong 覺得第二段好啲，所以我決定整合一齊播 #游池 #丁曉堯 #女鬼出沒注意 #今次睇我啲片都要開喇叭 #歡迎提出邊段好啲 #丞意推介 #Yuduckxkaman #余德乘嘉敏 #等埋位之最後
Dickson Yu 余德丞（@yuduck）分享的貼文 於 張貼
郭富城鄰居
通常新人都要捱窮、捱餓，或者銀行存款攞唔到一百蚊出嚟，但余德丞名校出身、屋企又幾富裕，應該唔使過呢啲日子？佢話：「又未去到一百蚊都無，未去到農夫首歌搭地鐵都唔夠錢、要用特惠 (車票)，但都係自己賺錢自己使，同埋如果得嘅話，由大學畢業出嚟，每個月賺嘅人工，我都有畀家用，因 為我覺得係一個男仔對屋企嘅責任。」好多人對余德丞嘅家底有興趣，話佢係郭富城嘅鄰居、屋企係做物流生意？「我的確係郭富城嘅鄰居，因為大家都係住同一棟大廈，其實仲有周秀娜㖭，哈，不過家底方面，屋企人其實唔係太鍾意我講屋企啲嘢，但話做物流生意，其實又唔係，都係打工啫。」
問余德丞自細點理財？佢表示：「細個屋企人會畀零用錢，嗰時其實都有個習慣，就係比較鍾意儲低啲錢，我投資方面唔係好叻，但我都鍾意畀番家用屋企人，如果屋企人想做投資就投資，講真嗰句，去到最後，佢哋又唔會害我、想謀我啲錢㗎，所以我覺得錢嘅嘢唔使睇到咁重，同埋我唔係太大使嘅人嚟，你見我成日畀人影到都係就咁著件tee，講緊都係五十蚊，當然有需要使嘅時候當然會使，尤其是買波衫，買波衫好貴，印埋名要成千蚊一件。所以我其實都想開一間賣波衫嘅舖頭，都係我一個夢想嚟，但好多人話賣波衫嘅舖頭要壓好多貨、好容易蝕錢，所以我最近都諗緊可能喺日本搵代理攞貨、點搞盤生意。」
講到余德丞係獨仔，問屋企人對佢有無期望？入行到依家，有無畀壓力佢？余德丞否認：「屋企人無同我講過希望我飛黃騰達賺幾多千萬，亦都冇乜畀壓力我，最緊要我做得開心，同埋唔好畀人呃，哈哈！因為我個人比較天真一啲，由細到大由華仁小學讀起，同學都係嗰班，一路到大個，屋企人就提醒未必個個好似你咁攞 個真心出嚟對人，可能有時都要提防一下，呢個都係佢哋對我嘅忠告，同埋希望我做自己開心嘅嘢。」有無見到娛樂圈陰暗面？「我又無見到陰暗面，但我當初同屋企人講想轉做幕前，佢哋都會有擔心，佢哋都聽過娛樂圈係五光十色嘅一個地方，所以都提醒我知道自己想做乜，如果目標係好清晰，都唔會受到其他嘢影響嘅。所以依家做做吓，佢哋都放心咗。」
緋聞好合理
提到余德丞啲緋聞file都幾厚！由麥明詩、港姐劉穎鏇 (Tiffany)、江嘉敏到蔡思貝，同佢合作過都有新聞出，余德丞笑言：「係囉，點解會咁嘅呢？係咪因為我襯到佢哋定佢哋襯到我呢？哈！我唔知喎，咁啱得咁橋咋嘛！哈哈哈！你諗下拍劇對住佢成三、四個月，一齊食個飯都好合理吖，畀人影到亦都無辦法啦，所以成件事其實都係⋯⋯無辦法囉！我都係一笑置之，哈哈，好輕鬆嘅方法應付。因為又唔係有啲咩事，使咩尷尬或者咩，唔需要吖，唔通為咗驚影相就唔食飯咩？又唔會吖，所以我都係以平常心去面對。所以可能因為咁，我咪次次都畀人影到，我就係次次keep住去食飯，就係咁畀人影到 嘞。」
傳過咁多個，邊個係真、邊個係假？「全部都係假㗎，全部都係好同事同好朋友，如果唔係就唔會一齊食飯啦，如果有尷尬就唔會食飯啦，如果真係想收埋，亦都唔會出嚟食飯啦，係咪先？所以都係正常食餐飯啫！」咁真嗰個係咩類型呢？「你意思我希望真嘅另一半係咩類型？我覺得開朗係好緊
要，唔好成日愁雲慘霧咁，比較開朗啲，同埋我鍾意食嘢，所以我希望我嘅另一半同我一樣，都係鍾意食嘢。唔好呢樣又唔食、嗰樣又淨係食一啖，咁就唔好。因為食嘢係好開心嘅一件事。」
「港姐收割器」唔威
余德丞直言自己目前係單身，問佢有無人想追？佢話：「依家唔好嘞，都係工作為先囉！但如果有一個啱，咁都OK嘅！講真做藝員，時間比較難控制，兩、三日前先知自己使唔使開工，所以依家做嘢先啦，同埋我依家28歲，如果都未發展到自己嘅事業，就係一件大問題，所以盡力去嘗試多啲唔同嘅嘢， 睇吓觀眾鍾意啲咩。」點睇被指為「港姐收割器」？係邊本雜誌咁寫？「我唔記得邊本，唔通要裱起佢咩？」威嘛！「如果真係威，下次叫年宵夜市整啲咕𠱸，寫『港姐收割器』，咁真係威嘞！哈！」
同蔡思貝夾
而講到余德丞主持旅遊節目大家都讚好，問佢節目中嘅gag係咪自己度？余德丞直指：「啲gag全部都係我同Sisley (蔡思貝) 兩個自己度嘅，因為我哋去之前都有傾過，我哋諗點樣用輕鬆啲嘅方法，成件事可以開心啲、得意啲，但我好衰，好多時收埋啲gag到真嗰下至用出嚟，咁啲反應就會再真實啲。好在呢個拍檔記嘢能力都幾高，通常我個人有少少專注力失調症，你叫我背好多嘢，我背唔到，有啲硬資料佢都幫我講咗，一個好清晰明確嘅分工，同埋我哋嘅性格啱啱好可以做到呢件事。我同佢性格好似，都係好直嘅人，有咩唔啱都會講，佢初頭都對我啲爛gag好抗拒，但後尾覺得唔係喎、都幾好笑，就接受咗件事，個默契好快就建立咗，同埋佢影出嚟都幾靚女吖！」
最後講到余德丞身形非常之好，問佢做幾多運動？佢答：「講真由細到大都做運動，但入咗行真係少咗去游水，依家做gym同踢波比較多啲，大概一個禮拜最少做兩次，得就三次，跟住踢一、兩次波，仲有跑步囉！跑步會練到氣同心肺功能再好啲，得嘅話夜晚會再跑吓步。但如果你明知嗰套劇係要展示你嘅身形畀觀眾睇，嗰輪就要再操多啲、再弗啲囉！但唯一一個好大嘅障礙就係我唔鍾意節食，好多人會選擇淨係食雞肉、菜，去再收緊啲線條，但我就唔鍾意，因為始終我覺得食嘢係好緊要嘅一件事，所以我從來都唔會節食。」
訪問後余德丞即到南華會做gym，有興趣見男神甚至看男神操肌的讀者，現在知道門路啦。
陽光暖男的外表，經常大晒42吋胸肌，是名副其實的童顏巨乳，但余德丞話：「我唔覺得自己好大隻，我亦唔希望變得好大隻，絕對唔係『The Rock』(荷李活動作巨星狄維莊遜) 嗰啲類型，我游水出身，可能修身啲，唔係爆肌嗰種。」
做過DJ，入無綫後最初被派任體育節目主持。
入行前為港隊泳將。
於《誇世代》做回自己，演高富帥，當然唔少得晒健碩身材。
訪問時的小插曲，當說到「攞唔攞到獎唔係好大嘅問題」時，余德丞突然說：「但佢炒飯就好似係好大嘅問題，啲聲好似唔係收得好好！」原來他留意到餐廳廚房傳出的炒菜聲，當告訴他不影響收音，他說：「對唔住，我係一個主持，習慣留意周圍嘅嘢，哈哈！」
緋聞名單極厚，被拍得跟麥明詩一杯雪糕兩份食，被傳假戲真做。
夥拍蔡思貝主持旅遊節目《緬甸奇幻旅程》，網民大讚自然又貼地，人氣進一步攀升。
問到自幼就讀名校華仁，成績是否同樣頂尖，他卻不卑不亢輕描淡寫：「學校勁啫，唔代表我個人勁，OK啦，過到關、入到大學囉！」
訪問中，愛笑余德丞經常瞇起一雙眼，臉上堆滿如太陽般燦爛溫暖笑容，加上思路清晰轉數快、風趣幽默及爽朗笑聲，足以用可愛爆燈來形容，且有禮貌得連對工作人員也連聲道謝，有條件又識做人，難怪極速走紅。
