伍樂怡遊關島晒小蠻腰 3日2夜性感又陽光
撰文：東方新地 ｜ 圖片：TVB截圖、Instagram
《3日2夜》遊關島晒身材
一直唔少有潛質靚女都會喺無綫節目《3日2夜》跑出，而最新一輯就有「氣質女神」之稱嘅鄺潔楹（Judy）及伍樂怡（Kelly）同遊美國關島啦！呢對仙氣Twins唔單止外形討好，仲着上泳衣、短衫熱褲，全程帶著燦爛嘅笑容享受關島嘅陽光，除咗係「風光如畫」之外，就只能夠係「心鄺神怡」啦！
流露真性情 好動加Fun
伍樂怡喺節目入面展現出活潑好動嘅一面，出海睇海豚更以「海豚音」超高頻叫聲試圖與海豚交流，流露童心同真性情，引嚟唔少笑聲，觀眾都對佢哋呢個組合非常受落。Kelly亦直認同Judy合拍，自己就直腸直肚，佢就大情大性，怪唔得之成個節目都可以一唱一和咁老友啦！
仙氣Twins變真閨密
首次去關島嘅仙氣Twins，拍完《3日2夜》之後，更變成了閨蜜。伍樂怡話自己其實極貪玩又好即興，同Judy走埋一齊好多火花。佢哋可以做返自己大玩特玩，感覺就最自然啦！咁就真係變咗真正嘅閨蜜遊喇～
晒完小蠻腰喺關島食到腫？！
閨密同遊的話，當然要享受美食啦。原來經常露出小蠻腰的伍樂怡，就因為今次拍攝而肥了幾磅。不過佢就話自己除咗條腰都冇咩好露，亦冇特別keep過，去到關島仲要食咗咁多嘢，好彩拍到尾聲先開始腫出嚟！
健康性感！運動風女神伍樂怡
其實Kelly不嬲行運動風，返到香港冇耐就瘦返晒，食多少少都冇有怕啦！佢當年參選時已經狂騷腹肌，身材靚又有線條，唔係剩係得男仔先會睇，好多女仔都勁羨慕Kelly個身形。
Kelly受訪時，曾表示身形咁Fit，唔需要特別節食，相反佢話要多食多運動，所以平時成日都會跑步鍛鍊。
雖然Kelly望落斯斯文文，不過原來佢幾鍾意戶外活動，成日有唔少騎馬、行山等等的靚相，生活都好健康！其中一張「回眸一笑」圖中，仲令人清楚睇到其玲瓏浮凸身材……
港姐大熱倒灶 做美女學徒有望跑出
2017年落選港姐伍樂怡(Kelly)雖然去年三甲不入，最近除咗有得拍《3日2夜》，仲成為美女學徒之一，Kelly表示自己喺加拿大時都經常下廚，三餸一湯無難度，節目中則會以「開心果牛油果焗三文魚」參賽！
大台力捧 疑被杯葛
《美女廚房》每集會有5分鐘的下廚時間讓3位學徒上鏡，其他學徒就變成人肉佈景板。有指頭兩集播出後，有外援組學徒沒有上鏡機會，而大台親生女伍樂怡、王卓淇、單文柔等就有大特寫同對白。
其實，伍樂怡作為親生女在大台發展得算是不錯，在藝員訓練班培訓了幾個月，就已經安排她主持《Think Big 天地》、《3日2夜》、《安樂窩》等節目，待遇甚至比同屆港姐冠軍雷莊𠒇更好！小編亦好期待Kelly日後嘅表現，唔知大家點睇佢嘅發展呢？
