事隔七年再合作 黃子華佘詩曼拍《楝篤特工》
廣告
七年前的無綫劇《絕代商驕》贏得不少好評，有男神之稱的 黃子華 與佘詩曼（阿佘）事隔七年再度合作拍戲，兩人日前在上環為新片《楝篤特工》開鏡拜神儀式，原來今次兩人合作係阿佘主動邀請黃子華！子華同阿佘話兩人劇中有感情線，笑言會激烈啲！新劇中，阿佘角色十分特別，經常「嘴藐藐」，形象大突破！
戲内關係似「冤孽」
戲外就好鬼老友，戲内就關係「冤孽」？新片《楝篤特工》中，子華受聘於阿佘，會使晒阿佘啲錢，所以子華就用「冤孽」形容二人關係。今次阿佘飾演高權重的人，劇中經常展露「嘴藐藐」嘅表情。阿佘話，試過問拍劇照嘅工作人員有冇影得自己正常啲，但結果得黑口黑面，一臉不屑嘅相！
子華就話今次阿佘做一個大家應該未見過嘅角色，係一個好「衰格」嘅人，仲讚呢個係一個「好睇」嘅角色。至於被問及是否影射香港官員？阿佘就回應係新造型：「唔係影射，但係有呢個職位，但唔係為咗啲政治嘢！」
黃子華：親熱戲對我嚟講微不足道啦！
提及起有無親熱戲，子華同阿佘就話要視乎對方。子華之後直言：「我好被動，觀眾都唔想睇呢啲，係要激烈啲嘅！（打戲？）我係受聘於佢，使晒佢啲錢！」阿佘續說，劇中角色一生都為了追捕對方。至於感情線方面，子華笑稱：「我同阿佘一行埋就係情侶啦！」至於被問及有無親熱戲，子華就話：「唔係想像中咁一般，嗰啲對我嚟講微不足道啦！」
子華擔正編劇 籌備劇本一年
子華透露，原本受到阿佘邀請合作拍電視劇，但后因時間關係決定拍電影，而子華笑言並沒有預料原來拍電影花的時間更多。擔任編劇的子華直言原本一年前就要拍，但不斷改劇本，改足一年！當中阿佘要求更十分高，子華同導演度好劇本后要比呀佘審批，過程十分認真。而宜家已經係第十稿喇！子華稱劇本貼近社會得來，不失少少離地風格，佢喺電影裏面會頻頻閙出笑話，笑指：「我係007師傅。」
