事業起飛 多仔吼實 曾國祥倒箍王敏奕
不過，風水輪流轉，昔日工作量不多，日日留家等男友收工的王敏奕，近日就憑新劇《飛虎之潛行極戰》上位，事業起飛大量工作撲埋身，更有唔少仔對純情女神吼到實，加上去年與黃宗澤傳緋聞，令曾國祥開始緊張，為箍女友早前更豪租貝沙灣一個千多呎海景單位築愛巢，又經常管接送mark實女友，隔絕異性埋女友身。
王敏奕 人氣急升
憑住清純煞食外表，近日在《飛虎之潛行極戰》中演黃宗澤督察女友的王敏奕，因為做飛虎隊員演出夠自然被網民狂讚，成為劇中極受歡迎女角，劇集在內地點擊衝破32億，王敏奕亦人氣急升。以往工作量不多，經常要掛住曾志偉「新抱」之名活躍圈中的她，隨著劇集熱播成功上位，連內地人都開始認識佢，工作接踵而來。
據知情人士透露：「自從《飛虎》播出之後，好多人都讚Venus (王敏奕) 做女飛虎演技自然又逼真，好多私人活動同埋內地工作都自己搵上門，呢排又要為劇集宣傳，Venus真係忙到無時停，唔似得以前成日要喺度等男友收工， Derek (曾國祥) 以前對佢唔緊張㗎！依家女友紅咗，工作好多，連Derek想約佢都要就時間先得，真係風水輪流轉嘞！」
Some people are just magical ❤️
V E N U S ♡（@wongmanyik）分享的貼文 於 張貼
狂蜂浪蝶獻殷勤
事業起飛，王敏奕身邊亦出現唔少狂蜂浪蝶， 令曾國祥大為緊張。據Venus身邊友人透露，因為之前傳出同曾國祥分手，就有唔少男士趁機攝位想追求Venus：「近期Venus工作多咗，連社交圈子都擴闊埋，工作上成日會接觸到好多事業型嘅男士，身邊多咗唔少狂蜂浪蝶主動向佢獻殷勤，Venus又純又省鏡，呢啲好女仔圈中已經買少見少，啲仔梗係吼實佢啦！」
豪宅氹女友
見女友多仔埋身，大女友12年的曾國祥亦怕貨比貨不敢怠慢，就算唔肯定落嚟落實娶女友，亦不時製造驚喜為求箍住搶手女友，今年初就同女友一齊搬入貝沙灣一個千幾呎的望海單位。
據知情者透露：「上年Derek大部分時間喺台灣做嘢，掉低女友喺香港，搞到Venus冇晒安全感，兩個仲一度冷戰，Venus搬返去媽咪度住咗一輪，之後同Bosco傳出緋聞，Derek收到風都開始緊張，前排特登陪女友周圍睇樓，揀貝沙灣呢個新竇，就係想畀女友住得舒服啲，嗰度望到海又有會所，活動空間好多，就算做運動都唔使專登去外邊，Derek想女友多啲留喺屋企，仲一得閒就會揸車接送Venus，監控女友嘅行蹤，唔要畀啲狂蜂浪蝶有機會埋到女友身。」
隔絕觀音兵
早前王敏奕接受訪問，就承認近日多咗唔少工作：「上年佢 (指男友曾國祥) 開始忙，自己就比較得閒，反而依家自己多咗好多工作，同佢各有各忙，大家可以一齊搏殺吓先！」事業起飛又青春無敵，王敏奕亦唔再心急想嫁。
上月底，王敏奕和黃宗澤一齊到電台做訪問宣傳新劇《飛虎之潛行極戰》，當日不用開工的曾國祥，就一個人揸車到九龍城開餐，食飽再去櫃員機撳錢，之後校啱時間揸車去電台接女友。其實當晚適逢《飛虎》亦搞慶功，王敏奕同黃宗澤都有同場，曾國祥如此緊張，應該係唔想兩個活動中間空檔期畀其他人攝到位，就算當日全程做柴可夫兼跟得男友亦在所不計。
老爺讚口不絕
性格純過蒸餾水的王敏奕，同曾國祥拍拖四年一早入晒屋，更獲未來老爺曾志偉開綠燈，可惜男友花弗性格多年未變，對結婚一直得個拖字。
Happy bday 老爺！Love u!!
D….（@lajah）分享的貼文 於 張貼
好姊妹愛收兵
同陳瑩、糖妹拍劇變老友，出名係乖乖女的王敏奕，即使眼見好姊妹陳瑩鍾意收兵，仍對曾國祥一條心！未有樣學樣，王敏奕這個絕種好女友真係當之無愧！
變小粉絲
王敏奕同黃宗澤在《飛虎》演情侶，劇中有唔少親暱場面，入世未深的王敏奕更被情場老手Bosco氹到變成小粉絲，經常在社交網留言大讚對方是個很好的學習對象。
演戲並非一個人的事，演員靠的是另一位演員，大家不斷交換驚喜，謝謝你🙆♀️ @boscomine 超級無敵好的學習對象。
V E N U S ♡（@wongmanyik）分享的貼文 於 張貼
網民大讚美臀又圓又挺！呢位索爆女星做Gym出股惑⋯⋯
做藝人靠樣搵食，所以時刻要保持最佳狀態！做運動、做gym修身都係基本，好似呢位女藝人咁，日前喺其ig上載做gym短片，見佢踎低起身咁做咗三幾下動作，不過一眾網民錯重點，大讚佢「八月十五」又大又圓又挺⋯⋯
之唔係26歲嘅最索女飛虎王敏奕 (Venus)囉！日前佢喺其IG上載做gym短片，見佢踎低起身咁做咗三幾下動作，不過一眾網民錯重點，大讚Venus「八月十五」又大又圓又挺⋯⋯
做運動keep fit
佢喺無綫新劇《飛虎之潛行極戰》中飾演唯一一個女飛虎隊員，要上演大量動作戲，巾幗不讓鬚眉，獲讚為「最索女飛虎」，平日Venus都會成日做運動keep fit，偶爾會上載吓啲運動照，真係流汗都咁靚啊！
舒服晒💦🏋🏻♀️
A post shared byV E N U S ♡(@wongmanyik) on
王敏奕事業得意，感情生活都好甜蜜，屋邨出身的她最近升呢與男友進駐三千萬貝沙灣豪宅，早前更被傳媒影到同男友曾國祥煙韌買餸玩煮飯仔。其實佢的確煮餸有一手，平日佢不時上載「作品」，三餸一湯絕對難唔到佢，如果《美女廚房》搵佢做嘉賓表演就啱喇！
溫泉蛋日式冷麵、櫻花蝦炒飯都做到！
王敏奕脫貧 演最索女飛虎
TVB播出與邵氏及優酷合拍的《飛虎之潛行極戰》，演員陣容鼎盛，包括有苗僑偉、黃宗澤、吳卓羲、張兆輝及王敏德多位猛男主演，而王敏奕就係飛虎隊唯一一個女隊員。今次王敏奕放下一貫斯文靚女的形象，親身上陣拍攝大量動作場面，叻女！
王敏奕 中學做model入行
原來王敏奕中學時已開始入行：「如果part time影相開始計係15、16歲時 (其實係06年14歲時)，中間返學都有停吓。之後發展都順利，同埋每年都好似有啲新嘅嘗試、挑戰，由初初part time影相到後來有機會拍電影，拍完之後覺得好開心、好鍾意，我就諗不如試吓用呢個做自己職業，一路用咁嘅心態行，我一路用一個積極準備自己、然後順其自然嘅心態，同埋演員始終比較被動，好多嘢冇得強迫或者強求，只可以不斷備戰，希望機會嚟可以把握到。」
問到入行以嚟，有冇唔開心或者遇到挫折嘅時候？王敏奕答：「當然有，因為演員係好被動，成日喺度等畀人揀嚟用，我同其他演員朋友傾偈分享，大家都有共同問題，就係今次casting冇揀我，係咪因為我唔好呢？但慢慢會學識發現每個角色都有適合嘅人，今次冇揀你唔代表你唔好，只不過你未係最適合嗰個角色嘅人，心理要不斷去調節，好彩我身邊有一班好姊妹，大家都係做演員，大家都明，會互相去扶持。」
試過戶口冇錢
搵唔搵到食？夠唔夠自給自足？王敏奕表示：「自給自足係冇問題嘅，當然有辛苦嘅時候，演戲唔係成日都有得演，同埋演員一開頭都未必搵好多錢，都試過朋友約出街食飯，連搭車出去嗰個地方嘅錢都冇，銀行戶口要有一百蚊先攞到出嚟，但連一百蚊都冇，都有呢個時候，咪留喺屋企囉！」
2010年拍過講援交嘅電影《囡囡》之後，係咪都可以接受一啲大膽嘅題材？王敏奕說：「我覺得演員就係會不斷遇到一啲特別嘅戲，電影就好似dream work、fantasy，亦都可以好貼近社會現實，如果喺一套戲發生，而嗰套戲係需要你，我覺得作為一個演員，唔應該計較太多，暫時都未遇到一個要諗除唔除嘅難題。」
冇收服曾國祥
問佢同男友曾國祥點開始？王敏奕笑言：「我同佢一齊拍過《囡囡》，但拍《囡囡》時，我係唔識佢，因為戲入面唔係同一條線，後來發現原來首映嗰陣一齊影過相，之後喺電影節同拍戲時識佢，再互相了解，覺得佢幾好吖，好自然就開始。」而對於被指收服以往形象花弗嘅曾國祥，王敏奕則說：「我覺得我冇收服佢，佢本身都係一個好乖嘅人！可能係隨住年紀增長settle down。」
而講到男友嘅優點，王敏奕就讚不停口：「我覺得佢係一個好有氣質嘅人，哈哈！我欣賞佢有才華、對朋友好好、好有義氣，甚至乎佢有時會話我冇義氣，有時我同佢講：『我約咗人，但我又想陪你喎，咁點？』佢會話：『你唔好咁冇義氣啦！出去啦！』哈哈！佢唔會刻意製造驚喜，但佢覺得我會開心嘅嘢佢就會做。」
Always 💘
V E N U S ♡（@wongmanyik）分享的貼文 於張貼
志偉一視同仁
問到對「未來老爺」曾志偉嘅印象，王敏奕就表示：「係好好嘅一個前輩，對所有後輩都好提攜，係一個好好嘅人、非常值得尊重嘅前輩、老人家。」問佢上過《獎門人》，志偉有冇特別優待佢？王敏奕笑言：「如果你睇番，你都知冇吖，哈哈！佢好識面對所有娛樂圈嘅嘢，基本上佢對所有嘢都一視同仁，唔淨止我，對Derek都係！」
對曾寶儀又有咩印象？王敏奕大讚：「佢好犀利，我都有細佬，我都覺得我細佬好buy我啦，但我見到Derek望住佢家姐嗰種仰慕嘅神情，我覺得『嘩！呢個家姐真係犀利！』，佢好叻、好叻，係一個好有才華嘅女仔，我諗佢對Derek嘅影響都好大，好少見佢咁在意一個人嘅comment，Derek成日都講：『我家姐真係好叻！』佢真係好欣賞佢家姐。」
清純外表夠煞食
王敏奕今年只係26歲，擁有標緻五官，清純外表夠煞食，14歲時已經做模特兒出道，做模特兒期間拍過唔少廣告。
之後慢慢進軍幕前，近年都拍過唔少電影，不過比較為人認知的應該都係2014年《女人俱樂部》！
經典廣告記唔記得
雖然一向唔係行性感路線，不過王敏奕身材其實相當有睇頭，偶爾一露更吸引！尤其當年嗰張火紅泳衣廣告照，真係睇到小編… 好想買多幾枝！
女神心早有所屬
可惜女神心早有所屬，同曾志偉大仔曾國祥拍拖四年幾，人前人後sweet到爆。雖然近年曾國祥專注在台灣發展，兩口子聚少離多，不過感情穩定，志偉都當佢係新抱仔㗎啦！
演學生妹無得輸
唔少女藝人都演過學生妹，不過唔係人人扮得好，但王敏奕就無得輸啦！去年青春電影《初戀日記：賤男蜜擾》中上映時，王敏奕頻頻喺IG晒學生妹劇照，有啲穿起校服展示pure一面，又着體育衫Show性感長腿，張張都影到好似寫真咁，認真令人流鼻血！
少女版李麗珍
其實王敏奕早年喺《女人俱樂部》亦有好大發揮，飾演年輕版朱莉(李麗珍飾)，劇中都有頻頻穿上校服，仲要係旗袍裙！無論係西裙定旗袍裙，佢都輕易駕馭到！網民都覺得佢有幾份似李麗珍，甚至比李麗珍更加適合朱莉呢個角色。
