中華小姐前哨戰 觀眾至Like才藝表演……
廣告
《2018國際中華小姐競選》決賽今個星期六就舉行，日前15位佳麗去到馬鞍山參與「現場觀眾至Like表演」活動，眾位靚女當然傾盡全力演出，喺寒冷天氣下都著得勁少布晒身材！最後贏出的係11號高詠堃脫穎而出，佢憑高難度鋼管舞贏得觀眾至歡聲。不過講到最出位，都肯定係表演草裙舞的「航空母艦」2號楊筑晶……
中華小姐前哨戰
近日香港天氣寒冷，市民出街都包到實，不過一眾華姐佳麗就未驚過啦！其中有「航空母艦」外號、來自夏威夷的2號楊筑晶表演熱情草裙舞，Bra Top配草裙打扮令身材表露無遺，38吋上圍加38吋巨躉真係超搶鏡……
香港代表雷莊𠒇出名身材fit，練出令女士們羨慕的一排腹肌，不過佢呢日唔晒身材而係正正經經表演歌劇，表現就一般般啦。
16號佳麗伍殷嬅樣貌標緻出眾，被外界視為大熱，呢日佢著上小背心熱褲跳HipHop，觀眾都幾受落，殺入現場三甲！對於雙腿較粗似乎有點失色，伍殷嬅就話唔會介意，因為自己做開運動，成日打籃球同踩單車！
呢日脫穎而出的係來自三藩市的11號高詠堃，佢喺咁凍天氣下泳裝上陣表演鋼管舞，表演高難度的「人體旗桿」，又連續自轉多個圈，舞技同腹肌一樣搶鏡，大家都拍爛手掌！高詠堃就話自己已學習鋼管舞兩年，決賽時會再次表演！
