中年好聲音6強｜吳大強71歲最年長參賽者 跑步練氣備戰：會盡力而為！
《中年好聲音》最高齡的參賽者吳大強（71歲）表現凌厲，大獲評判稱讚，人氣急升變城中關注！
即睇《中年好聲音》6強參賽者背景起底懶人包吳大強跑步練氣迎決賽！ 沿途粉絲密密影大讚真人更後生
《中年好聲音》比賽進入白熱化階段，大熱之一的「Bill哥哥」吳大強賽前戶外跑步練習，分享比賽經歷及信心，沿途大受市民歡迎，更有不少大強粉絲打氣要求合照。有粉絲大讚吳大強：「睇電視覺得有啲年紀，真人唔覺喔，原來咁靚仔！」更有粉絲直言為收看節目不外出吃飯，大讚喜歡吳大強唱英文歌，輕輕鬆鬆好動聽！吳大強亦坦言其他選手都會使出渾身解數，自己亦當然會盡力而為。
中年好聲音6強｜吳大強勁吸415萬Views成「點擊王」
根據「TVB綜藝」Youtube頻道數據所得（截至昨日早上9時），綜合六強選手過往演唱歌曲的觀看次數，「點擊王」頭三甲順序為吳大強、龍婷及顏志恒。
Bill哥哥吳大強個人單曲及合唱歌曲總觀看次數突破415萬，當中《浪子心聲》勁吸48萬觀看次數，該集Bill哥哥首度Solo獻唱廣東歌和出動吹口琴秘密武器，表現搶眼；而《情憑誰來定錯對》和《Quando Quando Quando》的觀看次數同樣超過46萬，共有三首單曲突破45萬Views的大強，名副其實是「中年點擊王」。
吳大強︱71歲最年長參賽者 其子為無線力捧小生
在《中年好聲音》參賽者當中，吳大強以71歲最大年紀參加，首輪比賽唱英文金曲《Unchained Melody》，表演高難度的震音同高音，得到肥媽大讚。吳大強曾表示只當自己17歲，凡事做到最好，永不言敗，專唱英文情歌的他次次出賽都攞高分，人氣高企全城都識。
吳大強同太太都係公務員，不過已經退休多年，二人育有4個仔，三仔就係無綫力捧小生吳偉豪，即係劇集《愛．回家之開心速遞》嘅朱凌凌。吳大強夫婦4個仔都靚仔又有成就，大仔係消防隊長，二仔係飛機師，依家仲讀緊書嘅細仔就係part time model，一門四傑。吳大強曾自爆同譚詠麟當年「踢過波」，因他曾是流浪足球隊隊員，吳大強當年是青年軍，譚校長是預備組，二人一見面大講波經之外，仲會講埋無綫總經理曾志偉「壞話」。吳大強憶述曾經同曾志偉落場比賽踢足球，大爆對方「好茅」，試過被他剷波剷中！
吳大強｜口琴自吹自唱廣東歌 肥媽嗒糖撩爆讚人靚仔
71歲的吳大強唱功向來出眾，多集成功俘虜評判的心。向來唱開英文歌的吳大強，上集罕有挑戰廣東歌《浪子心聲》，表現依然無可挑剔，唱到一半他出動兩大秘密武器拉分：「吹口哨」和「吹口琴」。最終吳大強獲得89分佳績，更自爆：「呢個口琴，其實係一個禮拜前先買，所以我都鼓起好大勇氣。」吳大強表現贏得全場掌聲。68歲的肥媽被冧到嗒糖，出口大讚對方靚仔：「靚仔好有舞台風範同經驗，You belong to the stage！」隨後蘇永康盛讚吳大強：「呢位長輩雲淡風輕咁講咗佢人生經歷畀我哋聽，聽得好感動。」
吳大強｜具舞台王者風範 無懼高齡挑戰邊跳邊唱牽高潮
71歲的吳大強除在去集有亮麗的表現，他在節目第三部曲次回合《影視金曲生死鬥》，同樣表現出色。吳大強在此回合獻唱英文老歌《Quando quando quando》，他無懼高齡限制，大膽邊唱邊跳，憑住自信十足的表現，帶領全埸氣氛步入高潮，獲得在場評判認同，張佳添更稱：「Bill哥哥，一個字，Professional！」周國豐更指吳大強如同行走的CD：「今日聽第一句，已經有聽CD嘅感覺，唔似係唱live嘅版本，非常之好。」
吳大強｜初賽已表現耀眼 瘋狂表演震音聽出耳油
早在《中年好聲音》頭陣100強出場時，吳大強的表現已經耀眼。吳大強頭炮是演唱電影《人鬼情未了》的主題曲《Unchained Melody》，演唱時他中氣十足，大晒震音和高音，令評判對眼前71的吳大強刮目相看，肥媽指：「好多人可能話佢好多震音，但唔震音點唱呢隻歌啫，佢用舊嘅Way唱番舊嘅歌，Feel到佢嘅Passion。」周國豐更指吳大強令他憶起亡父：「我爸爸喺我好細個就已經離開咗，好多謝你頭先嘅2分幾鐘，令我有番同爸爸嘅回憶。」
吳大強｜育有三子同樣靚仔 細仔為《愛回家》爆肌小生
吳大強年屆71歲，育有三子，細仔就是為人熟悉的無綫力捧爆肌小生吳偉豪（Ricco）。早在亮相《中年好聲音》前，吳大強曾隨Ricco及三位兄弟為《思家大戰》錄影，隊名自居「吳條煙」，一家人的高顏值更成熱話。網民讚吳家四子靚仔時，吳大強表示：「我都唔錯呀！」後來吳大強錄影《中年好聲音》時，Ricco有到錄影廠替爸爸打氣，見證其父出色的表演。
