不婚即「分」 唐詩詠 洪永城正式分手
廣告
唐詩詠 近日盛傳與男友洪永城情變，兩人異口同聲避談感情事，詩詠早前回應時更講到眼濕濕，話適當時候會向大家交代。但今日有消息指出，詩詠與洪永城其實已正式分手，原因係婚期上未能達到共識，不婚即「分」！
唐詩詠 含淚回應
詩詠早前出席TVB新劇《棟仁的時光》造型及拜神儀式，被追問與洪永城的感情狀況，佢堅持沒有多講，只係一直重複兩人需要更多時間，有共識會喺適當時候先公布。不過講吓講吓，詩詠對眼就愈來愈紅，眼泛淚光，不斷努力擠出苦笑… 冇問題就奇啦！
承認受感情困擾
而昨日詩詠出席《不懂撒嬌的女人》宣傳活動，再次被追問感情事，佢首先向大家講聲唔好意思，因為自己唔太識得處理感情事，令到大家有誤會。而感情係兩個人的事，需要尊重雙方，同時需要時間處理，所以希望大家俾空間佢哋。外界估計佢一係結婚一係分手？詩詠回答：「唔講啦，我寧願一次過講。」但佢就點頭承認呢件事令佢好困擾，並希望短期內可以解決。
婚期有分歧 和平分手
詩詠與洪永城已經拍拖兩年多，兩人都已屆適婚年齡，尤其詩詠已經36歲，心急想結婚亦無可厚非。但消息指33歲的洪永城仍然未定性，更自認「冇本事」養老婆，最後兩人在婚期上未能達成共識，更因此經常有爭拗，所以最終決定和平分手！
稍後正式公布
不過詩詠與洪永城「分」後再見亦是朋友，佢哋已經向無綫備案，亦希望之後有機會一齊交代呢件事。詩詠早前承認受感情困擾，話佢哋兩人需要多啲時間，並會喺適當時間同大家公布，如無意外就係分手一事了……
「不能錯過的女友」情路坎坷
人美心善身材更好的 唐詩詠 ，被喻為「不能錯過的女友」，可惜在愛情路上屢受創傷，被前男友余文樂、崔建邦背棄出賣，令佢對愛情缺乏安全感。早年詩詠同洪永城拍劇互生好感，花了近半年時間觀察期始接受對方追求，但執到寶的洪永城未有好好珍惜，拍拖期間被爆跟前度藕斷絲連，又多次跟同劇拍檔傳緋聞，不過詩詠一一投以信任一票。
