延伸閱讀︰

基因強大 索爆星二代逐個捉

繼Gary後 金鐘國 宋智孝離開《 Running Man 》

古法正宗粵菜

新節目從廚房用具、食材選購，到菜單設計等等，都係由鼎爺負責。究竟點解節目組咁放心俾鼎爺一手包辦呢？原來鼎爺已故的父親係一個大酒樓的東主，佢自小就已經接受父親嚴格的廚藝訓練，古法粵菜完全難唔到佢！「BB鴿藏膶腸焗飯」、「兩面黃煲仔飯」、「糖煎紅衫魚」、「移花接木」等，睇個名好似好難整，但今次由鼎爺出手教路，大家喺屋企都煮到呢啲懷舊的特別菜式啦！

黃腳鱲放在黑鱲上面一齊蒸？面及底都有飯焦的煲仔飯？紅衫魚煎後加黃糖食？小編實在太年輕了，聽都未聽過！

刀功、烹調手法樣樣掂

今次鼎爺在節目入面大顯身手，除了詳盡地解釋烹調步驟同貼士外，唔少觀眾都留意到鼎爺的刀功好純熟，揸起刀處理食物的時候功架十足，十足十大師傅一樣。原因就係鼎爺在現實生活中不時都會煮飯給家人食，所以自己煎炒煮炸炆燉蒸焗樣樣掂！鼎爺經驗老到，食譜又仔細，加上用心拍攝，難怪今次節目咁成功啦！

私伙鐵鑊夠鑊氣

一開頭都講過話個節目夠貼地，除了主持同內容之外，所選用的廚具都令觀眾刮目相看。今次節目所用的廚具並唔係以美觀為主，而係靠實用性。鼎爺所用的鐵鑊係平時有煮開嘢的「架生」，而非平常飲食節目所用的靚靚平底鑊，所以有網民估計鼎爺用的鐵鑊係「私伙嘢」，剩係火候都贏晒啦！望住平時經常演惡人的鼎爺親切教學，真係好似爺爺耐心教自己咁，難怪大家都睇得投入！

最後亦有不少觀眾喜愛鼎爺在節目中帶少許「懶叻」的口吻，不單唔會惹人討厭，反而覺得佢比平時更平易近人，亦係對自己廚藝信心十足的表現！

全文完