《堅離地愛堅離地》龔嘉欣化身女僕谷收視 美腿完勝高妹劉佩玥

撰文：東方新地 ｜圖片：《堅離地愛堅離地》截圖、東星圖片

劉佩玥驚現象腿

龔嘉欣在新劇《堅離地愛堅離地》的角色性格粗豪男仔頭，但日前為宣傳新劇，以女僕裝上陣大玩遊戲，身高160cm的龔嘉欣無懼寒冷天氣，騷腿現身，相當吸睛，跟同場在劇中飾演張振朗眼中女神的劉佩玥平排而企，龔嘉欣明顯矮大半個頭。身高174cm的高妹劉佩玥，同樣一身女僕裝束現身，不過穿上白色絲襪時驚現象腿，相當失策，當場被嬌小的龔嘉欣KO。同場還有在劇內跟黃心穎在女僕餐廳打工的葉蒨文，以及劇中飾演龔嘉欣下屬的吳嘉儀亦齊齊女僕打扮一起為劇集宣傳，為谷收視博到盡。

倉底劇《堅離地愛堅離地》出土黃心穎扮女僕

黃心穎扮女僕又做PTGF 與謝東閔丁子郎有感情線19年4月爆出安心醜聞，黃心穎形象掃地前途盡毀，多套劇集被抽起甚至易角重拍，女主角亦迅速逃走美國消失於公眾眼前。事隔年多，黃心穎於TVB的遺作《堅離地愛堅離地》終於出土。個個都話香港觀眾有樣好，夠善忘，19年尾無綫將《牛下女高音》、《丫鬟大聯盟》逐套解封試水溫，夾好時間，黃心穎都同期喊住回港，兼夾領養唐狗博洗底，一年過去，黃心穎去到邊仍然是吸嬲嬲磁石，最近亦頻頻傳將於短期內與無綫正式解約，而其最後作品《堅離地愛堅離地》安排於周一（12月28日）重見天日，timing夾得啱啱好！在劇中，黃心穎孖裕美等扮女僕，唔知觀眾buy唔buy！

龔嘉欣、張振朗首擔男女主角之作

其實又唔使下下將焦點放喺安心女主角身上嘅，17年拍攝嘅時裝愛情科幻喜劇《堅離地愛堅離地》實情張振朗、陳智燊、龔嘉欣同劉佩玥至係男女主角，龔嘉欣同張振朗更加係第一次擔正女一男一。劇中靚仔慣嘅張振朗當年瞓晒身做晒功課都係為咗演好IT毒男丁信希一角，邊拍邊話對呢套劇期望好高，本來安排好19年4月播出……你懂的，結果去年尾變咗炮灰海外首播囉，等足一年，終於可以喺翡翠台播出。