《兩個小生去camping》爆房事周柏豪：我同太太十幾年，每晚都拖住瞓

Jun 4 2020

周柏豪同袁偉豪兩個識於微時的好友，合作拍攝的節目《兩個小生去Camping》近日播出，「雙豪」除了在節目中鬥騷肌、鬥煮藝、鬥膽色之外，更來個深情剖白，周柏豪更激罕自爆同太太由拍拖到結婚一起十多年，到現在女都生埋，但每晚仍然拖住手仔瞓覺，勁冧豬﹗

撰文：東方新地

周柏豪以保護身邊人為由，私生活相當低調，在《兩個小生去Camping》激罕公開講同老婆的甜蜜房事。

周柏豪和袁偉豪相識廿年，無所不談，在節目《兩個小生去Camping》上山下海晒肌後，到了晚上「雙豪」來個深情對話，周柏豪激罕談及同太太一起十多年，每一晚都會拖住手瞓覺，柏豪話因為平常不能夠正常拍拖咁拖手仔，呢啲親密動作只能留在家中，柏豪話：「我哋要拖手嘅時間就係瞓覺嗰時，我都同佢講喺街先幾個鐘，但瞓覺八個鐘都可以拖住﹗所以我同太太到依家都仲係會拖住手瞓覺﹗」袁偉豪即抵死問：「你肯定八個鐘？」柏豪即笑笑口話：「有時起身痾夜尿，七個半鐘啦﹗」

周柏豪自爆想著西裝迎接女兒出世

周柏豪除了首度公開同太太的冧豬事，仲剖白初為人父的心情，柏豪同Stephanie（朱敏君）拍拖十年、結婚四年，另一半的真面目更是相當神秘，去年尾，老婆Stephanie為他誕下6.7磅小公主，初為人父的周柏豪喜獲女兒相當興奮，但老婆靚樣繼續絕跡他的社交網。柏豪於節目大爆去年陪太太入產房時相當緊張，為此前一天專程去剪髮，佢又話：「我真係諗咗好耐著咩衫入產房，前一日仲特登剪咗頭髮，啲朋友同我講：『入產房要戴浴帽㗎』。我有諗過係咪著套西裝入去見個女，但係其實要著保護衣，最後揀咗件粉紅色衫，因為係囡囡嘛。」

因為出道時要扮單身，其後拍拖又要玩低調，所以咁多年來，未試過如正常人一樣出外拖手拍拖。

佢當時同女友即現在老婆講，喺街唔會十幾個鐘都拖住手，但瞓覺就可以拖足八小時，所以呢個習慣一直維持到依家。

周柏豪同袁偉豪相識於微時，早在袁偉豪校草年代已經認識，相隔多年，大家各自入行，難得首次合作拍攝節目。

35歲周柏豪同老婆Stephanie（朱敏君）結婚三年，索妻真面目一直相當神秘。 — 35歲周柏豪同老婆Stephanie（朱敏君）結婚四年，索妻真面目一直相當神秘。

老婆大肚收收埋埋冇人知，去年尾周柏豪直至囡囡出世第三日，才開心向外報喜，並開心 share湊女甜蜜照。

其後繼續以保護屋企人為由，一直未有貼囡囡的正面相，只有額頭相睇住先﹗ — 繼續以保護屋企人為由，一直未有貼囡囡的正面相，只有額頭相睇住先﹗

周柏豪秘婚因有偶像包袱

「雙豪」第二集繼續晚上談心，二人邊睇《使徒行者2》邊吹水，周柏豪透露拍該劇時印象特別深刻，因為：「嗰時拍拍吓去咗結婚，但又唔可以畀人知﹗」袁偉豪問佢有冇諗過自己結婚後會令粉絲嘅幻想破滅？柏豪想也不想答：「係㗎﹗嗰陣時啱啱加入電視台，我都會諗啲投資者投資喺我身上，會唔會都諗點解我一直冇講結婚呢件事呢？我會有呢啲咁樣嘅顧忌，但係最後好彩大家都接受咗呢件事，或者歌迷都會好鍾意我嘅屋企人。」