《不懂撒嬌》大結局 Cherry Saving樓梯街重逢
廣告
無綫4K劇 《不懂撒嬌的女人》 昨晚終於播出大結局，早前劇情講到Cherry (唐詩詠飾) 唔想強迫Saving (王浩信飾) 結婚，而且希望佢可以創一番事業、改變世界，所以決定犧牲自己，在對方的世界消失。兩年間Saving一直苦苦等待，但再遇到Cherry時，對方已經結咗婚… 不過TVB可能怕大家太sad，所以補拍一個彩蛋，結果觀眾反應鬧多過讚，唔知你又點睇？
風雨不改地等等等等
其實早前有唔少網民認為，Cherry個分手藉口其實稍嫌牽強，破壞咗之前咁好的劇情鋪排！事後Saving一直尋尋覓覓，風雨不改地、兩年間喺同一個地方自拍，希望Cherry明白自己的心意，可以回心轉意。
咫尺之間 緣慳一面
來到大結局，超級洗腦歌〈陪著你走〉仍老是常出現，再冧的歌都真係會厭… 已經兩年幾冇見的Cherry同Saving齊齊喺街頭聽馮允謙唱歌，雖然兩人企喺咫尺之間，但都發現唔到對方，道出世事無常、人生就係咁無奈… (好似係)。
新娘結婚了 新郎不是我
點知Cherry好似玩捉迷藏咁，的士錶都未跳就落咗車，跑番轉頭搵Saving。當大家以為兩人終於可以喺埋一齊時，Saving發現Cherry 手上已經有訂婚戒指，所以邊強忍淚水邊為對方戴上自己的禮物，實在令人感到無限心酸……「新娘結婚了，新郎不是我」。
樓梯街重逢
不過TVB可能怕觀眾睇得太傷心，所以喺片尾曲播完後追加一個彩蛋，講述Cherry同Saving喺老地方樓梯街再相遇。隨住〈陪著你走〉奏起，兩人互相向對方笑說：「望超過五秒，真係會有嘢發生咩？」「係囉，望多過五秒會少咗忽肉咩？」
戒指不見了？
而呢個彩蛋的重點係，Cherry手上已經冇戴戒指，只係得Saving送俾佢的手帶。兩人一番深情對望後，劇集就正式結束… 劇組似乎係想俾觀眾一啲想像空間，不過唔少人大鬧呢一段戲未免多餘，仲將Cherry塑造成一個「為結婚而結婚的女人」，浪費Saving的寶貴青春；而當Saving苦等多年、事業有成之後，Cherry就冇再戴結婚戒指咁出現，即係佢又為咗Saving而同不知名老公離婚？呢個就要靠大家想像了……
