黃子恆三度邀35E女歌手上門女方鬧爆「唔係男人！」

Dec 6 2018

36歲TVB小生黃子恆，日前被爆出搭上一名內地女粉絲，二人兩度發生性行為後，女方更發現懷孕，但黃子恆卻一直玩失蹤。黃子恆後來承認與對方發生關係，但自稱做足安全措施。不過今日又嚟多單，有對話截圖流出，黃子恆原來曾三次邀請呢位擁有35E火辣身材的女歌手上佢屋企，想對方「提供服務」……

撰文：東方新地｜圖片：東方新地、Instagram、微博

前文提要：黃子恆被指搞大女粉絲肚

不過今日有報道指，一位名為Michelle的28歲內地女子，自稱係黃子恆的忠實粉絲，透露去年4月在廣州粉絲聚會中，首次與偶像見面，之後二人一直透過微博聯絡。Michelle稱一星期後有禮物送俾黃子恆，所以相約於深圳一酒店式住宅會面。

Michelle向傳媒爆料時表示，當時佢認為黃子恆係一個公眾人物，唔覺得對方係壞人，所以放心前去。最後兩人先後洗澡後，在床上發生關係。不過在發生關係後，黃子恆半年來都未有同佢見面，只係間中閒聊幾句，亦未提及二人關係。

報道稱，Michelle與偶像發生關係後卻被冷待，傷心得足不出戶、茶飯不思，後來事件在粉絲群組爆出，黃子恆為平息事件，承認雙方是好朋友，不過中間發生了誤會。Michelle聲稱今年1月時二人回復朋友關係，7月又再相約在深圳見面，並發生了第二次性行為！

發生第二次性行為後，黃子恆再次玩失蹤，但Michelle不久後卻發現自己懷有身孕，但男方至今都未再有任何回覆。Michelle直斥黃子恆係一個「渣男」，誓要搞大件事，揚言要男方連工都無埋！Michelle表示手握對方做錯事而哭訴的語音檔案及留言，又稱將會選擇墮胎。

Michelle又大爆黃子恆的語音檔，原來兩人玩facetime時，黃子恆曾以普通話及廣東話喊晒口道歉，內容大致上係講對唔住、好抱歉做出傷害對方之事，佢唔知道點面對，唔知道點樣去彌補。

事件曝光後，男主角黃子恆接受傳媒訪問時，承認的確曾與Michelle發生性行為，但就只有一次，而且有做足安全措施，不介意去驗DNA以證明自己的清白。黃子恆又謂控制唔到對方做啲咩，只希望謠言唔好再散佈。

昨日黃子恆為新劇《機場特警》開工，被大批傳媒追訪，黃子恆稱與該女粉絲已經年半冇見面，不過如果對方所說的事真係有發生，佢會負責任。又會如果有需要驗DNA，佢亦都會配合。

另外有報道指無綫高層樂易玲已叫黃子恆暫時先冷靜及專心工作，《機場特警》劇監製陳耀全亦表示唔會刻意刪減其戲份，但兩年前佢介入歌手裕美婚姻，如今又再爆出負面新聞，無綫方面隨時唔再容忍，黃子恆演藝生涯危危乎！

日前繼續有關於黃子恆的桃色新聞爆出，有指佢曾經睇中過擁有35E火辣身材的歌手迪子，曾經喺半年內先後約過迪子三次，氹對方去佢屋企「提供服務」！雖然迪子拒絕，但不久後黃子恆又搵新藉口，話邀迪子上佢屋企喺Big Big Channel開live，不過迪子再次拒絕。

其實黃子恆都唔係第一次出現負面新聞㗎啦，2016年時佢被指介入裕美與老公林恩浩的婚姻，兩人被拍到一齊到街市買餸，期間男方更主動攬實女方腰！親蜜關係不言而喻。兩人買完餸後就返到男方位於西貢的村屋，兩人夾手夾腳準備晚飯，裕美留低過夜之餘，更被拍到在露台晾Bra！

當時裕美個講法係當日係假期，所以一大班人開大食會，同行亦有其他幕後人員。一行人大約在八、九點離開，佢並沒有留低過夜。裕美又話自己正拍攝劇集，雖然同劇沒有黃子恆，不過自己好多嘢唔識，要向對方請教。最後佢話唔會理其他人點講，正如有人話佢整容一樣，佢唔會去理。

之後被問到老公會否介意，裕美就驚爆已經搞緊離婚！佢話自己已單身半年以上，現在辦離婚手續，不過就唔回答是否出現第三者，只係話兩人性格出現問題，曾經試過挽救呢段婚姻，但最終都係解決不了。

裕美現任男友Alex係英意混血兒，家住半山豪宅，身家豐厚而且事業有成，曾在一間大型私人銀行任投資工作，現在是本地一間外語學校的創辦人。

不過裕美近日於網上暗示甩拖，喺IG一張相打上「一個人也能好好過」、「Enjoying the solitude(享受孤單)」、「Lonely Christmas(寂寞聖誕節)」等hashtag，裕美向傳媒表示兩人已分開一個月以上，話因為兩人分隔兩地、自己又要照顧媽媽，最終和平分開。

黃子恆早年曾力媾當時上位中的李佳芯(Ali)，出動靚車接載對方到西貢撐枱腳食燭光晚餐，雖然最後齊齊返男方寓所，但據知Ali當時嫌對方仍是七線奀星，所以緋聞無疾而終。其後，Ali專心拍劇，更憑《潮流教主》人氣急升，現已為大台一線花旦！

黃子恆又曾被拍到與吳若希去赤柱食飯而傳緋聞，不過事後吳若希即落閘說：「朋友食飯，冇咩特別，我哋識咗好多年，佢好似哥哥咁。」黃子恆見未能得手，亦惟有認命只表示跟對方係朋友。

關鍵詞