【極道怪咖】「咪神」高海寧為新劇操拳 網友：好想畀佢打！

撰文：東方新地 圖片：微博、高海寧Instagram、新傳媒圖片

高海寧 操拳keep fit

日前高海寧喺社交網上上載咗多張打拳相，着上bra top配貼身Leggings，除咗露纖腰，當然亦賣大包，身材fit爆又惹火，她留言：「不是在每件事情上堅持付出，就一定會有回報，但至少在「減肥」這個課題，它是成正比的！」

「不是在每件事情上堅持付出 就一定會有回報， 但至少在『減肥』這個課題上它是成正比的！繼續努力，胖得不知不覺瘦得千辛萬苦，豬年第一個目標。」

做Gym引死人

高海寧之前上載自己做Gym的短片，片中可見到佢著上緊身V領低胸衫，內襯粉色運動Bra Top，表現一下努力得來的少少成果。上圍驕人的高Ling著住件咁窄的運動衫，企到咁埋個鏡頭度，除咗擔心佢抖唔到氣，網民都睇到抖唔到氣……

高海寧日練夜練 10kg啞鈴冇難度

素顏上鏡的高Ling指自己操練咗幾日，終於條腰返晒嚟，同時為咗上身整體線條更靚，即場舉起重達10KG的啞鈴，鍛鍊手臂和背脊肌肉。又指自己因為鍾意在夏天著露腰裝，所以要為馬甲線再加把勁咁話喎。點都好啦，網民們應該都無留心高Ling講咩，睇到眼定定~

IG粉絲突破40萬 福利圖益大家

成為一個出色嘅藝人，除咗睇平時演技同待人接物有幾好之外，粉絲都係一個重要嘅指標。現今有好多嘢都靠網絡，所以社交平台嘅追蹤數目已漸漸取代現實世界粉絲人數。而藝人高海寧（高Ling）自08年參選港姐後加入TVB。入行十年，高Ling Instagram近日達40萬粉絲，緊係Po返張寫真照多謝粉絲啦！發布少少兩個鐘，就已經獲得2萬幾Like！

擁有D Cup上圍嘅高Ling不時都喺IG上大PO噴血照，呃到唔少Like㗎！

剪咗短髮嘅高Ling顯得更爽朗同富有女人味，IG啲相經常都露纖腰同曬優質股。

高海寧陳敏之鬥性感

上星期一眾藝人到上環出席餐廳開幕活動，人人盛裝打扮，不過就被高海寧及陳敏之搶晒鏡，瘋狂謀殺菲林！咪神高Ling以一襲低胸緊身短裙示人，谷出深長事業線，下半身則晒修長美腿，索呀！而人妻兼人母敏之則大Deep V中門大開，勁呀！

索爆低胸緊身短裙

高Ling接受訪問時表示，呢條裙佢其實已經買咗好耐，今日終於有機會著，而且自己除了TVB台慶外，已經多時未有作性感打扮，竟然有少少緊張！佢笑說有人問佢凍唔凍，但其實佢緊張到出晒汗，又不時都會低頭望望，確保無走光。

男友同場未有合照

其實呢晚高Ling男朋友鄧智偉亦在場，佢表示自己係透過經理人獲邀，而男友則受餐廳老闆邀請，所以未有合照及一同受訪。

重溫高海寧性感之路 十年前選港姐

南京姑娘高海寧今年31歲，喺十年前參選2008年港姐競選，由於身材實在太突出，高Ling入圍不久已經備受關注，並被外間視為大熱。最後高Ling三甲不入 (三甲為張舒雅、陳倩揚及馬賽)，不過隨即成為無綫旗下藝人，踏入娛樂圈。

「象鼻頂胸」超經典

既然身材係最大賣點，高海寧當然唔會吝嗇，次次見人都谷到盡，2009年時高Ling去泰國拍攝《美女廚房》特別版，著住低胸吊帶背心的高Ling被象鼻夾起，洶湧上圍即「奪衫而出」，非常誇張，堪稱經典！

與「咪神」、「性感女神」劃上等號

高海寧出道後幾乎與「咪神」、「性感女神」劃上等號，無論出席活動、拍戲拍劇集還是綜藝節目都定必性感示人，大家亦清一色將焦點集中在其身材上。

高海寧：封胸有得有失

高海寧近年開始漸漸收起性感，佢希望大家唔好過份注重係佢身材上面而忽略佢演出嘅努力，雖然「封胸」導致佢少咗工作機會，但係佢就話唔介意有一段時間可能會失去一啲job或者角色，因為唔跨過，永遠都唔會有進一步嘅路、行得再遠啲。

雖然高海寧唔係話包到實晒，久唔久都輕輕晒身材，不過相比以前已經保守咗好多啦！

圈中出名孝順女

高海寧工作向來不錫身，毫不吝嗇大晒豐滿身材，難免令人有啲負面印象，但其實佢係圈中出名的孝順女、好家姐！高Ling永遠把家人放在首位，每逢大時大節都一定將時間留畀家人，聚埋一齊食飯，更不時於網上分享家庭照，非常孝順！

高Ling在娛樂圈打滾多年，一直願望儲夠錢買樓同家人同住，佢2015年時買入油塘一個新盤單位，去年終於由買家變業主，正式收樓，難怪與家人一起興奮晒V！

外婆是一生中最愛

高Ling時常惦念遠在南京的婆婆，就算要拍劇的時候都會趁空檔跟婆婆視像通話。放假時，更加會飛返去南京探婆婆，仲話見到婆婆的笑容就乜都值得！每次一談起外婆，高ling總顯得特別感性：「你陪我長大我陪你到老」，亦祝福婆婆健健康康，可以繼續陪著佢，這份跨越兩地的婆孫情實在教人感動。