《超時空男臣》擔正做 太監 何廣沛 ：我本身就似公公
Text – Arika Photo – 新傳媒資料庫、TVB、何廣沛@IG
棄做會計師 擔正《超》劇做 太監
28歲嘅何廣沛 喺2012年加入TVB藝員訓練班，短短5年間由茄喱啡做到第三男主角，認真叻仔。何廣沛喺美國嘅大學修讀會計，但佢放棄做專業會計師，毅然加入娛樂圈。回到2014年，佢仲爭啲成為MK POP跳唱男團「天堂鳥」嘅成員，但大台希望佢專心拍劇，好彩佢最終聽旨決定留低，唔係宜家都唔會晚晚見到佢嘅演出。回想入行初期，Matthew捱過唔少苦頭，佢以最低工資去接拍劇集，甚至俾唔到家用，面對工作及家庭的壓力， 何廣沛總算捱出頭。
機會不斷 孖住江嘉敏上位
喺藝訓班畢業冇耐，何廣沛就畀吳啟華揀中喺《女人俱樂部》飾演佢嘅年輕版，啟華當時仲話：「做我年輕版，當然要揀個最靚仔。」而喺《女》劇中，何廣沛飾演校草得到七位少女嘅仰慕，艷福無邊，而對於新人來說，這演出機會是相當難得。何廣沛後來拍過不少劇集，在《律政強人》中飾演大狀方中信嘅徒弟仔Nick，戲份甚重；喺《財神駕到》中做有錢仔王招財，劇中就算同好多老前輩交手，佢都表現淡定，逐漸受關注。之後， 何廣沛喺《親親我好媽》入面做反叛學生哥，同另一位大台靚女新星江嘉敏成為熱捧年輕螢幕情侶，因而成功上位。
青靚白淨似太監
何廣沛今次在《超時空男臣》中挑戰做不一樣的太監，要宜古宜今，難唔到佢！佢話自己有做公公嘅特質，由細到大都比較似女仔，「唔麻甩、比較姿整」，何廣沛又話：「監製就係睇中我青靚白淨、少少斯文，把聲可以輕柔。」
就算骨子裡似公公，何廣沛仍然深入研究個角色：「我唔會用把好乸嘅聲講對白，觀眾都唔想聽，會覺得好煩；所以待選擇用一個比較輕聲﹑溫柔﹑斯文啲嘅聲線去演繹依個角色。」認真做足功課，抵你人氣急升！
文弱書生型嘅何廣沛其實都可以好man，佢話自己喺剛拍完嘅《天命》入面做個man爆正氣二品官，而拍攝中嘅《跳躍生命線》就做麻甩佬，所以希望大家唔好當佢係「御用公公」，知道佢嘅演技範圍可以好大！
