《超時空男臣》「三妹」 陳偉琪 封胸做自己
陳偉琪 港姐第五名
陳偉琪演出《超時空男臣》時26歲，曾經參選2011年溫哥華華裔小姐競選成功奪得亞軍，之後再戰2013年度香港小姐競選，當時被封為「翻版陳妍希」， 同屆有陳凱琳、蔡思貝及劉佩玥等人。Vicky最後喺決賽排名第五位，更獲得現場最受歡迎佳麗獎。佢其後參加無綫藝員訓練班，正式成為合約藝人。
當人人將重點放喺Vicky嘅身材上，其實佢嘅學歷同樣值得注意。原來Vicky喺University of British Columbia (UBC) 畢業，主修政治及哲學系，絕對係美貌、身材與智慧並重！
靠 「 三妹 」一角入屋
入行短短幾年，其實Vicky都拍過唔少劇集，包括《賭城群英會》、《與諜同謀》、《幕後玩家》等都見到佢嘅影子。不過，今次喺《超時空男臣》入面佢終於可以收起性感形象，戴起冷帽，着返衛衣長褲，做返佢認為真實嘅自己。佢喺劇中飾演「 三妹 」，經常孖住田蕊妮、朱晨麗等人出場，戲份都唔少㗎！重點係佢今次終於唔係演又貪錢又袒胸露臂嘅無名小花啦！對於「初次從良」，佢自己都話好開心，可以發揮自己實力，感動到差啲喊出嚟，誇張到連監製都叫佢唔好咁激動呀！
運動型女孩 － 陳偉琪
私底下嘅Vicky係一名運動型女孩，平日除咗做Gym、打拳、行山、游水、沙灘排球，仲會打籃球，唔係玩玩吓，佢係香港藝人籃球隊成員之一，真係有份出場打慈善賽㗎！
Vicky話自己性格男仔頭，性格爽朗率直嘅佢喺選美期間俾其他佳麗改咗個名叫「傻蛋琪」！
無綫咪神有苦自己知
Vicky曾經講過好身材都曾經為佢增添煩惱。除咗比較難買衫，佢細個嘅時候曾經因為介意他人奇異眼光而寒背。到咗大個，又覺得人人都只係集中眼光喺佢嘅胸部，所以佢希望大家可以認識真正嘅 陳偉琪。
佢亦都表示自己試過俾人性騷擾，例如喺Instagram傳訊息希望佢影多啲性感相，又向佢直言話：「好大個胸」。除咗啲寫得好露骨、好肉酸嘅留言之外，佢仲會收到陌生男子Send嚟嘅「肉照」，令佢覺得好驚同好尷尬。
唔介意健康性感
Vicky講過自己唔介意健康性感，不過覺得有時係過份咗。上兩年仲係新人嘅時候，不斷有人叫佢着泳衣，當時佢唔介意，不過依家到已經三年，佢都希望可以向其他方面發展下。
有份拍《溏心風暴3》嘅Vicky 係劇中同黃宗澤有床戲，Bosco仲大讚佢當日十分敬業，為咗效果除剩NuBra！
私底下係慳家妹
雖然Vicky係大台經常被角色設定為拜金女，但其實私底下嘅佢係點嘅人？原來未入行前佢喺一間律師樓度做到經理級，薪金可以去到三至四萬蚊，點解佢又會捨棄高薪厚職入娛樂圈搵食呢？佢話自己平時都唔多追求物質，着嘅波鞋大多數都係贊助商送俾佢，佢覺得做藝員得到嘅滿足感係其他工作俾唔到佢嘅。眾所周知，無綫藝員薪金不高，接爆騷先得萬零兩萬蚊，如果接得少Job，可能只得三千蚊。佢話：「呢個唔使錢嘅性格先可以喺無綫捱」。
收入咁唔穩定，Vicky又有冇擔心過財政問題呢？原來Vicky屋企人已經退哂休，加上佢係屋企獨生女，要擔起照顧屋企人嘅責任。
Vicky間中都有做司儀，賺吓零用錢外，同時簽咗經理人公司，遲吓有機會喺電影大銀幕見到佢嘅演出。另外佢都考咗健身教練牌照，希望可以靠多幾個途徑賺錢。
打工達人 做過球證
Vicky話自己由大學讀書嘅時候已經開始做各類型嘅兼職，除咗好似普通大學生一樣做吓侍應、補習老師，仲做過球證㗎！而為咗慳錢，Vicky仲將本來要四年先讀完嘅大學課程縮短到三年就讀完，慳返唔少海外生活費！
鐘意成熟才華型男生
Vicky鍾意思想成熟，有才華，對工作有執著嘅男仔。出道至今緋聞不多，不過就曾經俾人影到佢夜蒲攬大隻仔。
佢話唔抗拒外籍人士追求，而且亦有唔少圈外追求者。
