文：東方新地

金句一：天文台被鬧死

《天與地》中，曾出現了打風情節，劉俊雄(林保怡)即天文台台長上身，指再掛八號波機會極微，之後雷耀彬(張國強)直指：「天文台一定會被鬧死」，寸爆天文台經常因掛錯波，而飽受市民批評！

金句二：鍾意食蛇就轉會

工會職員Alfred：「人哋啲大型工會組織，佢哋啲活動就好喇，食蛇宴啦、摘荔枝啦，買啲平價米、平價油咁樣。我哋淨係可以搞家居電器維修興趣班咋。點樣join人呀？仲話join多啲人，心照啦！」區海晴(李思雅)即直斥：「係咁鍾意食蛇，咪轉會囉！」寸爆見利忘義的人！

金句三：政治世界係污糟邋遢嘅世界

劉俊雄於街邊為選舉拉票時說：「無論係香港定世界任何一個地方，政治世界就係污糟邋遢嘅世界，從政手段就只有卑鄙、奸詐，除咗呢樣，就只有更卑鄙、更奸詐。大家如果想得到公義嘅話，我可以話比大家聽，一個公義嘅人，絕對、亦無可能幫你哋達到目的。」

金句四：做人唔係本來應該係咁？

Dr. Dylan(Joe Junior)解釋Rock & Roll精神：「獨立嘅精神、抗拒建制、自由、愛、勇往直前，其實何止係Rock & Roll，我哋做人唔係本來就應該係咁嘅咩？」

金句五：香港人最善忘

對於大部分人變得唯利是圖，劉俊雄感慨說：「香港人最擅長係咩？就係善忘，除咗錢，咩都忘記晒！忘記身邊所有一切，忘記舊樓、碼頭，忘記曾經喺街上喊過嘅口號。」

金句六：窮人最想黐有錢佬

成功進入立法會嘅劉俊雄，認為另一議員埋有錢佬堆搵着數，結果被對方拋窒：「窮人最想黐有錢人，有錢人最想黐啲官！我可能搵錢冇你咁多，但我有嘅係權！好多工商政策我有份投票，所以啲有錢佬驚我唔嚟飲飲食食！」

金句七：大家只接受偽善嘅人

劉俊雄向江兆泉(劉丹)坦言好人難做：「你唔覺得呢個城市唔歡迎好人o架咩？大家都只會接受一啲偽善嘅人，反而啲好人，佢哋會驚！」

金句八：和諧唔係一百個人講同一句話

葉梓恩(佘詩曼)講出對和諧睇法：「今晚喺呢度，我呼籲警方、外邊嘅市民、所有傳媒，無需要恐懼我哋嘅聚集。因為喺呢度，每一個支持同追求獨立音樂嘅人，佢哋都代表住每一種獨立同自主嘅做人方法。呢啲並唔係唔和諧嘅表現，和諧唔係一百個人講同一番說話，和諧係一百個人有一百句唔同說話之餘，又互相尊重。」

金句九：點解人長大咗，就要咁多妥協同考慮？

面對殘酷現實，葉梓恩無奈說：「點解人長大之後，就要咁多妥協、咁多考慮？咁多理由去面對現實，咁先叫正常咩？

金句十：This city is dying, you know？

Dr. Dylan向葉梓恩慨嘆香港人金錢至上：「你睇吓我哋呢個世界，睇吓我哋呢個城市係乜嘢樣，除咗錢呢個字之外，我哋已經分辨唔出是非黑白，我哋每個人都被環境訓練到，好似倒模出嚟咁。鍾意食同一樣嘅嘢、鍾意同一樣電視節目、支持同一種政治立場，信奉同一種生老病死嘅做人方法，this city is dying, you know？」

全文完