簡淑兒簽約無綫做親生女！揭「仙氣女神」七年變靚史
撰文：東方新地 圖片：東方新地、簡淑兒微博及IG
簡淑兒簽約無綫做親生女
簡淑兒18年底和經理人公司的合約問題被無綫雪藏，所以即使有份演《大帥哥》及《救妻同學會》都冇得出席宣傳活動，不過簡淑兒同前經理人公司約滿後，成功獲無綫簽約成為「親生女」。
簡淑兒《平安谷》演淼淼
回顧簡淑兒喺大台都算多演出機會，而且都係演鄰家女孩嘅角色。佢喺劇集《迷》扮田蕊妮女兒，學生妹look又pure又true。而喺《平安谷之詭谷傳說》飾演一個天真可愛的小女孩淼淼，不過就有個獸父鄭子誠，仲差啲被侵犯！紥一對孖辮、楚楚可憐的樣子，簡淑兒真係無得輸！
《波士早晨》
喺《波士早晨》簡淑兒飾演一個初級秘書仔，怕怕醜又驚青咁，由佢演繹就適合不過！
簡淑兒：我以前只係黑同肥
現年31歲的簡淑兒雖然佢出名樣子甜美，但其實整容傳聞停不了，由佢16年加入《愛回家之八時入席》出演秘書仔時已經傳到㷫烚烚。當時簡淑兒經已反客為主，自post 11年回流前美國留學舊照，自嘲曾經又肥又黑、再自嘲EQ差、話傳媒專揀妝頭出事的相片對比，水蛇春咁長hashtags，曲線自辯係女大十八變唔係整容囉！
真面目判若兩人
對於簡淑兒的變靚疑雲，本刊曾獲得一批2012年香港小姐競選官方照，當年簡淑兒20強不入，一早做咗炮灰。係同屆黃心穎、朱千雪、湯洛雯等太高質，還是簡淑兒方面、細眼、扁鼻實力差太遠？雖然話女大十八變啫，點解事隔多年冇人話心穎BB同千雪BB唔同晒樣嘅？又點解可以變變吓變咗撞埋Baby樣呢？
簡淑兒愈大愈靚
事隔多年，竟面目全非，愈大愈靚，簡淑兒就曾經解釋係當初官方妝頭出事喎！
簡淑兒變靚史
12年：面型尖咗，個鼻直咗，不過本來輪廓仲喺度，當年仲有小小似張慧儀。
13年：明顯下巴更尖，鼻型筆直，對眼都比選港姐時圓咗又深咗。
14年 多咗大眼仔美化對眼，不過明顯雙眼又大又圓，已見腰果眼初型。
16年：進化成功再加埋全新化妝，簡淑兒連pose表情都有意無意以Baby為藍本，正式變身成為新一代女神。
17 – 19年：新一代女神地位奠定，腰果眼笑臉已成招牌，整體樣貌都無咩改變，最多都係齊陰髮型有時會變吓。
所以話變變變生命力，真係好神奇呀！
原來係富家女
由美國回流返港的簡淑兒，入行以來都甚少談及自己的家庭背景，只知道佢有6兄弟姊妹，但原來佢家境相當不俗！簡淑兒父母經營珠寶生意，在上水及將軍澳都有專門店。另外喺紅磡一幢工業大廈亦購入兩個單位作寫字樓，生意規模唔算細。簡淑兒亦曾經幫屋企生意做生招牌，擔任代言人兼模特兒，甚至贊助過TVB及亞視藝人鑽石首飾出席活動。
強調自己純天
簡淑兒之前出席活動，被問到疑似變樣的傳聞，佢就話用人生最核突的舊照同現時相比，分別當然大，所以點講都冇用。之後佢強調自己係純天然，自己選美後就去拍劇，如果有整大家都會留意到。但問題係，依家真係好多人留意你唔同咗樣喎……
簡淑兒呢個Look，清純到加零一！
提到被爆係有錢女，佢就話屋企只係做一啲小生意，自己出入唔會有司機接送，平時返電視城或者出席活動都係搭巴士。另外又稱自己雖然同家姐住，但就唔係住凱旋門，絕對唔係有錢女。
