歷屆港男冠軍做緊乜?盤點 TVB 香港先生近況
07年港男冠軍袁偉豪 |近況:成「億萬駙馬」再升呢做人父
07年港男冠軍袁偉豪,其實早在97年當選《Yes!》校草,做過model亦拍過唔少電影,最有印象係同謝霆鋒、吳鎮宇拍嘅《新古惑仔之少年激鬥篇》。相隔10年他更成為港男冠軍,但袁偉豪加入TVB後都唔係一帆風順,做咗N咁多套劇嘅大茄,慢慢開始升做配角,到近年《飛虎》、《鐵馬戰車》開始上位,《三個女人一個因》更擔正第一男主角。2020年,他迎娶前港姐兼「內衣大王」千金張寶兒,成為「億萬駙馬」,並於去年11月誕下囝囝「袁咕碌」袁晞祐,升呢做人父。
![港男 選港男時的袁偉豪。(圖片來源:新傳媒照片庫)](https://imgs.orientalsunday.hk/wp-content/uploads/2016/07/nhv4dxh3MJN7gxp/616-325x1024.jpg)
05年港男冠軍高鈞賢|近況:失「億萬千金」後再有新戀情
而第一屆 (05年) 港男冠軍高鈞賢由加拿大回流香港參選,但加入TVB多年來都撈唔起,雖然曾經做過兩套劇集《幕後大老爺》及《女警愛作戰》第二男主角,但始終徘徊二、三線,反而14年約滿TVB後北上發展,即狂搵人仔,現時微博已有超過280萬粉絲!到近年高鈞賢回巢TVB,演技開始受賞識,先後在《法證先鋒5》、《新聞女王》和《逆天奇案2》等劇中也有不少戲份演出。 2021年,他被爆與「億萬千金」吳玥彤約會,更傳為對方回流香港,但最後兩人僅拍拖1個多月就分手收場。今年5月,他自爆已有個拍拖1年的圈外女友,感情穩定,隨時閃婚。
06年港男冠軍黃長發|近況:曾戀「鞋王三奶」現成暖男爸爸
06年第二屆港男冠軍黃長發,發展就認真麻麻。雖然生得鬼鬼哋識法文,又有個同係港男嘅大佬黃祥興照顧,但黃長發將大部分時間拎去拍拖,負面新聞多到嚇親人,尤其被「鞋王三奶」譜出姊弟戀最經典!負皮形象搣唔甩,連TVB都唔敢重用,最後在09年離巢轉行,曾經做過會計師,近年則去Elite模特兒公司做經理,之後又成立了模特兒公司,15年在布拉格同捷克籍模特兒女友Zuzana結婚,2022年誕下囝囝黃恩(Kimi),一家三口不時放閃,更有指他一個人打三份工養家,令家人可以住上海景豪宅,修身養性成為好爸爸兼好老公。
08年港男冠軍朱允崇 、羅天宇|近況:一失蹤、一上位
07年港男冠軍係袁偉豪,至於08年冠軍朱允崇,贏咗港男後竟然冇簽TVB,返美國完成埋大學學位課程。反而同屆少年組冠軍羅天宇發展唔錯,《愛回家》戲份甚重,「馬子仁」一角入晒屋,近年愈來愈多劇拍,備受TVB重用!
![港男 朱允崇(圖片來源:新傳媒照片庫)](https://imgs.orientalsunday.hk/wp-content/uploads/2016/07/nhv4dxh3MJN7gxp/244-683x1024.jpg)
09年港男冠軍許家傑|近況:做「送水輝」攞獎
09年冠軍許家傑,當選後拍過大量TVB劇,但全部係大茄,直到近年飾演《愛回家》「送水輝」一角,才成功入屋,2021年,他和「大小姐」林淑敏更獲得TVB《萬千星輝頒獎典禮》的「最受歡迎電視拍檔」獎。
![港男 選港男時的許家傑。(圖片來源:新傳媒照片庫)](https://imgs.orientalsunday.hk/wp-content/uploads/2016/07/nhv4dxh3MJN7gxp/29_resize1-682x1024.jpg)
2010年港男冠軍翟威廉|近況:離巢搞清酒生意
10年冠軍翟威廉應該係繼袁偉豪後撈得比較掂嘅一個,但其實都唔算好紅咋!選港男前,翟威廉05年選過亞洲先生,獲得亞軍,後來去過日本韓國留學,再於10年回港選港男。有份拍《飛虎》系列,但唔夠袁偉豪、羅仲謙搶鏡,最為人熟悉是曾與陳庭欣拍拖5年,以及自爆性史等,近年代表作可能係拍住張秀文等去日本拍旅遊特輯,今年他更宣布離巢TVB,專心做KOL及經營其日本清酒生意。
![港男 選港男時的翟威廉。(圖片來源:新傳媒照片庫)](https://imgs.orientalsunday.hk/wp-content/uploads/2016/07/nhv4dxh3MJN7gxp/38_resize-683x1024.jpg)
2011年港男冠軍李晉強|近況:完約回流加拿大
2011年後TVB一度停辦港男選舉,因此當屆冠軍李晉強曾被稱為末代港男,他亦是歷屆最不知名嘅冠軍。李晉強在11年連奪冠軍及「最佳台型獎」,之後參加25期藝員訓練班,拍劇做演員,可惜角色真係非常唔起眼,晌《EU超時任務》入面做朱千雪個宅男細佬,已經算比較突出,到2018年李晉強選擇完約離巢,回流加拿大。
![港男 2011年港男冠軍李晉強。(圖片來源:新傳媒照片庫)](https://imgs.orientalsunday.hk/wp-content/uploads/2016/07/nhv4dxh3MJN7gxp/49_resize-683x1024.jpg)
2016年港男冠軍黎振燁|近況:停工4年約滿離巢
2016年TVB復辦了一屆港男選舉,冠軍是黎振燁,他早在09年便透入讀TVB藝員訓練班,在TVB當了3年茄喱啡後,離巢轉投香港電視,及後又轉型做model,直到2016年打敗人氣王丁子朗奪得港男冠軍後,才回巢TVB,但一直未受重用。2020年,他被爆背著大肚妻偷食朱智賢,因此形象插水,更被TVB勒令停工休息,原定參演的電視劇《拳王》及《七公主》亦被易角,之後他一直「潛水」,到今年4月首度受訪,透露這4年間一直有監製搵他開工,甚至連高層曾勵珍都肯見他,但他自覺未準備好,到近期他才約滿離巢TVB,計劃重新出發。