【書展重溫】懷念暑假奇才盡出！ 書展10大經典騎呢事
盡數書展騎呢事
香港書展其實由1990年開始舉辦，本來活動旨在推廣香港人閱讀文化，同時讓出版商大展拳腳。不過近10年來，書展亦成為唔少女藝人及模特兒出版寫真嘅場地，唔少網民視之為「每年焦點」。大量女星寫真「入侵」後，網民以至社會各界開始重新定義「書籍」一詞。加上後來討論區、社交網絡興起，越來越多人將自己作品於網上連載，而部分備受好評嘅作品獲出版商青睞，成功令網絡作品走入市場，令網民搖身一變成有實體著作嘅「網絡作家」。到底𡃁模速銷寫真、FANS為買心頭好可以有幾盡？一齊睇睇！
1. 怪風襲傅穎露阿婆底
2008年時傅穎時尚未北上發展，外表只由ver 1.0「短髮少女Look」變成ver 2.0嘅「大眼仔濃妝」，當年更於書展推出首本個人寫真。點知喺會展門口宣傳時，一陣怪風令現場變得「春光無限」。原來，靚女原來都會著「阿婆底褲」嘅。
2. 「零」FANS簽名會
喺2007年書展，曾經同李克勤合唱《合久必婚》嘅歌手「陳逸璇」（原名：陳苑淇）出咗本寵物新書《牠們不是名牌》。當然亦有喺書展舉行簽名會，不過當簽名會正式開始後，等完再等、等完再等都係無乜FANS過去。反觀其他簽名攤位都擠滿人，結果佢亦成為歷屆書展簽名人數最低紀錄保持者。
3. 男人出寫真老闆掃晒
以為出「寫真」只係女明星專利？非也。其實喺2013年時周秀娜3位師弟「鴨王」何浩文（Dominic）、顧又銘及趙勁皓（King），都各自推出8,000本、合共24,000本嘅爆肌寫真。不過最估唔到嘅係，啲寫真喺書展推出前1晚，就被被1名自稱「劉先生」嘅男士豪花230萬全面收購。最後令3位猛男到首日書展現場宣傳時，手上連一本寫真書都冇本，只可以SHOW下自己肌肉，佢哋更公開答謝「劉先生」大力支持。
4. 書展史上最「紅」宣傳
同樣2013年時，當時𡃁模孫旗（Keiko）推出個人寫真，不過寫真人人都識性感，真係無乜特別。最特別嘅係佢為咗喺宣傳時引發大家注意，竟然使出渾身解數──凸點、漏M！要數書展騎呢事，佢真係走唔甩！當時身穿白色背心、喱士熱褲，至今大家一講起，雖然未必記得個名，不過一定仲記得佢做過咩！可見當年係幾咁爆！（見紅相就真係不了）
5.錯別字天后Stephy
Stephy鄧麗欣喺2009年書展推出首本愛情小說《陪著我走》。點知33頁嘅書入面，竟然有多達109個錯處，包括多個錯別字如「踐踏」寫成「淺踏」、「矇矓」寫成「矇濃」等，睇到人眼都凸！事後Stephy解釋因為自己用普通話拼音輸入法以致揀錯字，難怪成為當年書展中一大笑話。
6. 雪糕女王周秀娜
Chrissie周秀娜可謂香港模特兒出寫 真集嘅「先驅」，當年Chrissie更獲封為「寫 真女王」，人氣一時無兩！初期走超性感風格嘅Chrissie，2009年為咗宣傳寫真，博命出「峰」頭！喺炎熱天氣下大派雪糕益街坊，更親自餵食冧FANS，吸引大批男FANS支持！而寫真亦非常噴血有睇頭，入面大玩刷牙、滴牙膏落胸兼滴雪糕，意識大膽！不過家陣佢都向演員之路進發啦，而演技亦令人眼前一亮！
7. AD2當眾同阿伯玩遊戲
前模特兒組合「AD2」由吳婕妤（Aily）及艾美琦（Amy），喺2013年推出首本寫真集，當年佢哋更著上熱褲小背心現身灣仔天橋宣傳。以為仲當眾互咀兼互摸對方經已夠騎呢？點知之後佢哋仲捉咗個阿伯送吻兼自拍，咁騎呢幾驚阿伯頂唔順！
8.簡幗儀IG串錯小學字
網紅女神Lilian Kan（簡幗儀）在書展出過不少寫真集同散文集，2018年她為新書在社交平台密密宣傳造勢時，出了一個英文圖文Post，卻被眼利網民發現她連個好簡單的英文生字「Proud」（驕傲）都串錯做「Pround」，引起網民議論紛紛，恥笑佢咁都算係「才女」。
9. 醉愛周秀娜鄭先生
2010年時周秀娜喺書展推出寫真，一名鄭姓男子到場購買周秀娜寫真集，並接受傳媒訪問。網民認為他外表、行為有如「毒男」而熱烈討論，更將對方起底。
10. 眼睛斜視食雪糕
頭先提到周秀娜喺2009年時推出寫真，更於會展金紫荊廣場派雪糕慰勞支持者。其中一名FANS「肥堡」因獲請食雪糕，非常興奮之餘更喺鏡頭前狂盯周秀娜胸部，一望成名。之後佢亦多次參加周秀娜嘅宣傳活動，每次嘅相片都被網民改圖。
