【容祖兒演唱會】重溫頭三場精華｜祖兒免費請觀眾再睇騷

撰文：東方新地 圖片：新傳媒圖片、IG

容祖兒演唱會 個唱開鑼機件故障

為遷就部分遲到嘅歌迷，首場演唱會延遲至9時15分先開騷。著上一件LED雪花裙，企喺好似星球嘅升降機上唱住〈 空港 〉登場，之後祖兒換上 one-piece 緊身衫大晒長腿，鬼咁性感！唱〈 逃 〉嗰陣，祖兒被男 dancers 抬起，氣勢十足，祖兒除下披肩話：「 歡迎到場嘅觀眾朋友，多謝你哋！」然後同大班 dancers 又跳又唱一連串快歌，令現場氣氛 high 爆。不過頭場演出舞台機件頻頻發生故障，中央台板未能合上出現一個巨窿，十分牙煙，工作人員甚至要合力將鋼琴搬上台，祖兒哽咽向觀眾道歉：「 真係萬分抱歉，有好多技術上嘅不足。」

歌神張學友做嘉賓撐場

雖然美中不足,但祖兒特別為頭場觀眾送驚喜,請來「 歌神 」張學友任表演嘉賓。二人唱出〈這麽近那麽遠〉,令全場起哄!學友笑笑口話:「 我要多謝祖兒 就真,呢首歌係我寫,佢唱就幫我增加版稅,其實我哋差一輩。」祖兒接話:「邊 度係?我讀中學就聽你嘅歌!你啲歌冇年齡界限。」搞到學友大笑話祖兒好畀面:「 通常啲人都會話係小學聽我唱歌,或者父母聽我嘅歌大。咁你唱多啲我嘅 歌,下次我再嚟做你演唱會嘉賓!」

著上一件LED雪花裙，企喺圓形升降機上唱住〈空港〉氣勢登場，為個唱揭開序幕。

之後祖兒又自爆曾揸車撞花學友架車,學友笑笑口話記得呢件事,又講起英皇老闆楊受成喺祖兒入行初期時有介紹畀佢認識,可 惜大家一直都冇機會合作,學友話:「 我係一個好挑剔嘅人,唔容易讚人,但我覺得 祖兒係現今樂壇具備晒所有條件嘅歌手,佢對唱歌好有熱誠、謙虛、努力,佢會挑剔 自己,又敢於挑戰。睇佢以前嘅訪問,佢自認跳舞硬手硬腳,好似講緊我咁,我跳舞 都似一嚿木,依家佢跳舞,大家對眼係離唔開佢,佢係我嘅後輩,佢好值得佢嘅後輩 向佢學習。」全場 Fans 聽到拍爛手掌!

期間見有數名工作人員突然上台幫祖兒調整耳機，祖兒內疚表示：「呢個係我人生最crazy嘅演唱會，真係萬分抱歉，有好多技術上嘅不足，但我會更加努力繼續做落去！」

祖兒一連唱出多首經典名曲包括〈再見我的初戀〉、〈天之驕女〉、〈逃避你〉、〈搜神記〉,有唔少粉絲亦跟住一齊唱。

祖兒免費請觀眾再睇騷

去到尾聲,祖兒一臉歉意表示:「今晚真係好抱歉!之前因為打風,加上個台嘅複雜程度,遠超之前嘅演唱會,第一晚就出現咗啲唔想見到嘅事,好多謝大家陪我做full dress rehearsal,我好感激、珍惜,大家咁有義氣,我決定下星期一,8月12號我本來係放 假,今晚在場嘅朋友,我想邀請大家再嚟紅館,睇一個我為你哋精心準備嘅Pretty Crazy演唱會好唔好呀?」全場頓時起哄尖叫、掌聲四起!祖兒又話:「大家記住唔好掉咗張飛,否則入唔到場,睇過覺得夠,就畀飛姨媽睇,咁大家喺呢度,不見不散!」

祖兒笑指周年演唱會先可以出動學友做嘉賓,等於收到佢入行 年來最 大份嘅花紅,學友聞言即向坐喺觀眾席上嘅英皇老闆楊受成「追數」,講笑 話 :「咁你要出花紅畀我喇!」

由於機件故障,幾經波折要工作人員合力將鋼 琴搬上台,但完全冇損祖兒演出水準。

第二場

第一場因為舞台機件故障，演唱會很多舞台效果都未能一一盡現觀眾眼前，昨晚所有機件恢復正常，整個千萬制作演唱會終於順利呈現，大跳大唱第一part後，祖兒跟觀眾說：「歡迎大家來到….我應該講係第2場定點呢？尋日呢場你哋無睇真係嘥晒，特別嚟架，我都未試過嚮紅館齋唱歌、剩係跳咗少少舞，咁我就收工喇，但最奇怪係乜呢，所有觀眾都睇得好開心，聽到佢哋話咁樣已經值9百幾忟喇！甚至乎山頂的朋友都話好正呀，但係如果今晚你哋睇完呢個演唱會，有齊晒所機關喇、舞蹈喇，所有嘅嘢，我會話比你哋聽，9千幾忟你哋都話抵呀，仲覺得平添呀！」語畢引來全場拍掌歡呼。

第一場因為機件故障，舞台不能升降，祖兒苦練了鋼琴升不到台中央半空唱〈啜泣〉，一度忍不住台上啜泣，昨晚終於順利升出鋼琴，讓她可以可在半空中為大家自彈自唱，舞台機關回復正常，樂手和舞蹈員全部都可上台表演，二十多個，由韓國，香港舞蹈藝人及中國雜技團組成的凌空人肉牆，高空中不斷變換身體形態做出漂亮舞蹈效果，令觀眾看到嘩嘩聲，祖兒開心道：「我哋今晚好開心，因為總算係我哋想呈現比大家嘅製作，真實咁準備咗比大家，希望大家鍾意。」

祖兒個騷今次為了山頂的觀眾，特別安排了高空吊車，繞山頂一圈，祖兒笑謂，未試過咁勁咁近見山頂的朋友，真係近到連鼻毛都見到，她更邊吊著巡迴紅館，邊叫工作人員給「咪」觀眾，請歌迷跟她一同對唱，氣氛超熱鬧開心，昨晚祖兒在空中見到站pannel位支持的張敬軒(軒仔)，即要求對方合唱，唱完說：「I love you，多謝你張敬軒，佢除咗做火龍果，平時都好好，我呢支咪、呢隻耳仔(機)，可以唱得咁舒服，佢係早過我哋到紅館，幫我哋set好晒成套嘢，我未見過咁好嘅人，大家比啲掌聲佢，佢幾多嘢忙呀，又要開餐廳，又要自己開演唱會，都搞我啲嘢，好喇，我比火龍果個機會喇，搵晚做嘉賓喇！」此外，祖兒繼而親自收觀眾送嘢禮物收到火龍果時，她就掟向台下的朋友堆中，向Kenny說：「大家比啲掌聲關智斌，佢來咗呀，2、3個星期後就到佢架喇！」

鄭伊健做表演嘉賓

第二場表演嘉賓是鄭伊健，祖兒跟伊健屬同門師兄妹，皆六兩人都是羅文愛徒，伊健上台，兩人先是合唱《一生愛你一個》後，祖兒就馬上講：「多謝晒，大家比啲掌聲–大佬！」伊健說：「我唔係你大佬，係你師兄啫，大家知唔知點解我會嚟做嘉賓呀？(祖兒問係咪因為我靚呀？)唔使講喇，但仲有個原因我估大家唔係咁清楚，就係我哋係同門師兄妹，係羅文嘅徒弟，有羅記獅子山下嘅精神。因為我哋嘅老師令我哋可以嚮樂壇、演藝事業繼續做落去，因為有佢教導嘅嘢、同埋精神。」祖兒說：「仲有樣嘢，佢同我講過無論嚮個舞台上有幾多人睇你或者幾少人睇你都好，你都要覺得你就係呢個舞台嘅主持人，所以呢我尋日自己嚮呢個舞台上係有啲迷惘，但我腦裏面諗住佢，如果係佢又會點樣處理呢？所以可能今日佢已經唔嚮我哋身邊好耐，但佢嘅精神係好重要。」伊健說：「仲有係佢帶比我哋嘅能量，我希望同大家分享，有無興趣接收呀。」語畢二人再合唱羅文快歌《在我生命裡》向已逝的師父致敬。

第三場楊千嬅做表演嘉賓

容祖兒pretty crazy演唱會踏入第三場，是晚祖兒請來曾經在樂壇被視為競爭對手的楊千嬅來當嘉賓，兩人合唱了「可惜我是水瓶座」及「連續劇」，令全場觀眾開心到飛起，聽出耳油。

祖兒介紹千嬅出場時表示，「人生像一場競技賽，我的跑道上有很多同我一齊跑的跑手，有一些跑手同你矩離特別近，大家都叮噹… 一時你跑快D,一時我跑快D，今晚嘉賓佢同我一路跑住，係我歌唱生涯上，如果我沒有遇上佢，我未必有這樣的速度跑咁快。今日我同佢雙劍合璧，希望曾經有一刻我都比過佢好大動力，令佢跑得快d。希望大家用最大掌聲，歡迎我今晚嘉賓: 楊千嬅。繼而兩人一同合唱:「可惜我是水瓶座」。歌畢，千嬅話 :「多謝你請我來這個二十周年party。」祖兒:「這個是我的願望。」

千嬅 : 「你差d整喊我！你依家講野叻左喎。好開心係工作路上遇到你，我可以見証你每個階段的進步，同埋睇住你一路成熟。你學懂更加點表達你自己，其實一個歌手最想做到，就係將自己唱的歌，如果用心去表達到比大家知道，而大家又接收到。由其雙子座，好介意人地明唔明白佢…無人知道但我知…..」祖兒，「係呀係呀…..你點解會咁知架？」千嬅 :「因為我個仔係雙子座呀。」

接著千嬅又繼續說，「作為一個歌手，二十年不長不短，二十年更加係一個女人最緊要時間，我都好感謝你路上比到好多動力我，以前我地唔係好多機會相處，好多野我都冇同你分享過，見面成日都係「 HI, BYE」 ，但係最近個十年，大家見面機會多左，溝通時感受到大家都互相成熟左，人生路上難得遇到好對手，會令自己進步！所以你唔好多謝我，我應該多謝你先真。以前我地係頒獎禮、叱咤台上台下，真係有好多好令人懷念片段。好開心分享你這一分鐘成功。」祖兒聽到千嬅這番說話，一直口啞啞接不上來，笑道，「你睇千嬅真係好勁，佢係到我係唔駛講野…..」然後祖兒又話，聽講有首歌你都好like，所以我地特別揀來唱，大家真係要多謝千嬅，唔係佢真係聽唔到呢首歌。千嬅就接住話: 「我like , 唔like 我唔會來啦！人生就好似連續劇，雖然無人能編自己劇本，但我好開心今晚，同祖兒一同編寫這首歌的回憶，送比大家「連續劇」。

此外昨晚祖兒坐飛船升上半空跟山頂觀眾大唱K時，見到自己細佬坐山頂， 即叫工作人員比個咪細佬，兩人一同開心大合唱，祖兒更開心大叫 : 「我終於又完成我另一個心願，係紅館同我細佬大合唱呀！」

頭場有唔少圈中好友撐場,包括好姊妹蔡卓妍、張敬軒、陳慧嫻、Wyman、鍾舒漫、泳兒、蔡一智、蔡一傑、蘇施黃和金燕玲等等。

英皇老闆楊受成與太太陸小曼及兒子楊政龍總動員支持祖兒演出。

第二晚到場嘉賓包括楊受成和太太、就快做老豆的兒子楊政龍、鍾欣潼、鄭希怡和女兒梁浸浸、關智斌（Kenny）和張敬軒。菊梓喬、林二汶、岺寧兒，擔任服裝設計的黃偉文等等。

第三晚到場的圈中友好包括有: 楊受成，祖媽，丁子高、衛詩雅、陳家樂、 李靖筠 、伍富橋， 陳穎彤，另外張敬軒昨晚繼續來支持，綵排時已經現身為祖調音，又帶祖兒上山頂聽聲，祖兒昨晚台上話，「軒仔晚晚都來幫我較靚d 聲，耳機呀咁，真係好感動，無以為報，唯有搵晚比佢扮火龍果！」