【容祖兒演唱會】入行20年成樂壇天后 Joey初出道與xx齊奪《勁歌》新人獎
撰文：東方新地 圖片：新傳媒圖片、張栢芝微博
容祖兒入行20年 憑實力成樂壇天后
容祖兒將於下星期一（5日）在紅館舉行《PRETTY CRAZY演唱會》，共開18場，刷新Joey入行以來的演唱會場數紀錄，一如以往，Joey除了準備新歌在個唱上為大家演繹，也不少得大唱經典歌。Joey表示：「呢次加場唔係為咗單單要破紀念，而係一個挑戰，都讓我嘅體力可以好好分配，因為每場都係用一樣體力去應付，唔好因為太興奮而用力太多，搞到之後冇體力，咁就對唔住我啲歌迷。」
黃偉文為個唱起名紀嘉良拍攝海報
而今次演唱會海報，Joey找來初入行20歲第一次開紅館演唱會合作過的國際知名攝影師Leslie kee 紀嘉良合作，之前她更特意飛去東京影演唱會宣傳海報，為貼切演唱會「Crazy」主題，Joey透露演唱會名字「PRETTY CRAZY」是由好友黃偉文（Wyman）為她度身而設，更大讚個名真係起得好︰「呢20年嚟無論喺工作上、不同經歷上，一路走嚟都真係PRETTY CRAZY！『PRETTY CRAZY』呢兩個字，既可以代表到我哋對工作上面嘅CRAZY，又可以代表到我哋一直努力追求嘅優雅，簡單兩個字形容咗我呢20年，Wyman真係勁﹗」
為演唱會有最好嘅表現同演出，祖兒密鑼緊鼓地操練，早排因而更操到病，但Joey堅持帶病亦繼續操Fit，令一眾粉絲大感心痛。不過要成功一定要付出努力，祖兒也深明此道，樂壇天后絕非浪得虛名。
Joey不經不覺出道20年，她曾11次獲得「叱咤樂壇女歌手」金獎，12次獲得TVB「最受歡迎女歌星」及14次獲得RTHK「最優秀流行女歌手」，前無古人，後無來者，也是實力的最佳證明。
容祖兒、張栢芝成《勁歌》新人奬「雙冠軍」
不過唔講唔知，與Joey同期出道的另一位玉女歌手新人，甫出道也人氣極高！講緊嘅係張栢芝，當年她和Joey都係人氣極旺嘅新人﹐各自大批Fans擁護，二人於樂壇頒奬禮上也鬥得叮噹馬頭，其中在無綫舉行的《一九九九年十大勁歌金曲頒獎禮》上，「最受歡迎女歌手新人獎」竟然爆出了「雙冠軍」﹐由當時得令的張栢芝、容祖兒一起奪得，真係破天荒之舉。
雖然張栢芝擁有一把鵝公喉，唱功和歌喉都麻麻，但她憑清純形象而吸納大批少男fans，首張專輯《任何天氣》一出已經有白金銷量，對於一個新人嚟講，已經係非常之好嘅成績，而同年底栢芝乘勝追擊推出大碟《Destination》，同樣係擁有白金銷量。而喺年底嘅樂壇頒獎禮，張栢芝亦憑《任何天氣》、《星語心願》歌曲掃橫幾個頒獎禮嘅新人獎，同期嘅容祖兒一度被力壓。不過，Joey憑住紮實的唱功和努力，登上樂壇天后的殿堂，她的成功正好告訴大家﹐成功非僥倖。
睇番張栢芝之前喺微博上載自己嘅舊照，輯相係佢99年推出嘅首張EP《任何天氣》嘅封面照，張栢芝發文表示：「任何天氣 立夏」。當年得19歲嘅張栢芝，既青澀又清純。
