今次真係禾稈冚德尊！盤點6個非富則貴的《都市閒情》主持

盤點6個非富則貴的《流行都市》主持

1. 彭慧中

彭慧中以前喺英國讀市場學，2010年參加港姐而入行，因為經常喺節目展示靚腿而開始有觀眾留意。

有傳佢嘅家族係開時裝貿易公司，喺中港兩地設有多間廠房。

有指彭慧中爸爸喺2008年時用2,100萬買入大埔康樂園獨立屋畀屋企人住，而佢自己平時就揸價值60幾萬房車出入。平時佢喺IG都Post好多遊山玩水相，睇落都幾有千金小姐感覺。

2.蘇晉霆

蘇晉霆 （Marty) 初加入TVB時都係拍電視劇為主，主要都係做路人、官兵、記者等角色，直到2012年開始就加入《都市閒情》大家庭。

Marty 出身於富裕家庭，家族物業超過4,000萬，出道無耐就自己一個人住喺半山900幾呎嘅豪宅，平時出入仲有跑車代步！

3.劉彩玉

原來劉彩玉一開始以歌手身份出道，仲出過三張個人專輯！1995年就開始主持《都市閒情》，可謂經驗老到。

劉彩玉2000年下嫁香港壁球代表隊兼香港體育學院壁球總教練蔡玉坤，而老公喺2016年時更升職為香港體育學院副院長，喺體壇真係無邊個會唔識！

4.姚嘉妮

姚嘉妮由亞視轉過去無綫，主要係拍劇同埋做主持，自2013年開始入加《都市閒情》。

嘉嘉同林祖輝喺2013年合力搞童裝生意，而家已經有六間分店，其中一間分店仲超過一千呎！有指早前更加透露有意上市，一邊做藝人一邊做老闆娘，真係豬籠入水。

5.宋芝齡

自從幾年前韓國風氣愈吹愈熱，識韓文兼細個喺韓國生活過嘅宋芝齡就經常擔任主持訪問韓星，就係嗰陣開始多咗好多人識佢，之後加入《都市閒情》更加令佢人氣爆燈。

早前宋芝齡被人拍到出街有3個工人服侍，揸過百萬名車兼養名種狗，韓文語言學校又已經擴充到六間，生意比TVB人工多十幾倍。

6.安德尊

人稱「大王」嘅安德尊喺TVB都有一定地位，多年前譚小環大爆大王多年嚟喺元朗買落大批地皮起樓，平時經常戴鑽戒又請同事食飯。不過大王就透露只係喺元朗合資買地建舍。

有傳大王家族生意非常龐大，除咗香港，喺加拿大都有物業揸手添！