入行逾40年經典重溫 吳鎮宇 曾經鬈毛似憤青！
吳鎮宇 87年鬈毛憤青look
相中嘅吳鎮宇當年25歲，電咗一頭大圈鬈髮，仲要搽晒gel濕立立，側晒頭好似好不滿想開拖，成個憤青咁款。
91年孖關禮傑攞獎
吳鎮宇同關禮傑係81年無綫電視第十一期藝員訓練班同學，91年兩人同獲《壹電視大獎》「十大男藝人」，鎮宇排第四位，關禮傑就守尾門排第十，呢對同學領獎後合照留念。
92年頹廢古代殺手
無綫92年武俠劇《大地飛鷹》，再做男一嘅吳鎮宇演有「血劍浪子」之稱嘅天下第一殺手方偉，一頭亂髮加鬚根look，造型頹廢又創新。
89年《蓋世豪俠》對星爺
吳鎮宇電視反派代表作係89年《蓋世豪俠》，劇中為當武林盟主不擇手段修煉邪功，最終搞到不男不女，同演佢冇血緣弟弟周星馳展開正邪生死對決。
85年《楊家將》拍五虎
無綫18周年台慶劇《楊家將》，超豪華演員陣容空前絕後，吳鎮宇劇中演楊二郎，「無綫五虎」劉德華、苗僑偉、黄日華、梁朝偉就演鎮宇嘅細佬，湯鎮業就演八賢王，除華仔同黄日華其餘楊家將都壯烈犧牲。
94年惡搞王菲超人
TVB 94年搞笑節目《真過癮時代》環節〈皇妃超人〉，吳鎮宇扮演嘅皇妃超人，形象取材自王菲當時幾個誇張造型，如菠蘿頭、透明中褸、米白色三角底褲，齋睇造型已笑爆嘴，惡搞到極點！
97年《難兄難弟》扮謝賢
吳鎮宇92年離開無綫後曾以部頭形式返娘家，97年劇集《難兄難弟》謝源一角，語氣同身體語言鎮宇都極似謝賢，同年孖羅嘉良喺電影版《精裝難兄難弟》再演謝源同李奇。
03年《衝上雲霄》永遠Sam哥
03年香港電視史上首部以航空業為題材嘅無綫劇集《衝上雲霄》，吳鎮宇演高級副機長唐亦琛（Sam），深情型爆迷倒萬千少女同C9，十年後再演續集，翌年參演賀歲電影版《衝上雲霄》，飛機頭Sam哥形象深入民心。
96年《古惑仔》奸王𡃁坤
吳鎮宇92年加入電影圈，四年後迎嚟最大突破，喺電影《古惑仔》系列飾演大反派「𡃁坤」，為人殘忍、卑鄙毒辣，加上一把沙聲特别乞人憎，係鎮宇奸角代表作，亦係電影史上最經典反派人物之一。
99年《鎗火》奪金馬影帝
99年吳鎮宇演藝生涯去到高峰，憑杜琪峯電影《鎗火》演神經質卻重情重義阿來一角，擊敗梁朝偉勇奪第37屆台灣電影金馬獎「最佳男主角」成金馬影帝，威到盡！
其他珍貴圖片仲有⋯⋯
3歲吳鎮宇眼仔碌碌好精靈。
83年拍電視劇《射鵰英雄傳》做茄哩啡！
1992年同星爺擔任萬梓良與恬妞結婚時的兄弟團。
2003年電影《無間道II》。
2004年電影《喜馬拉亞星》。
老婆下令推真人騷 直擊吳鎮宇收火教仔
經常被指躁狂的吳鎮宇，只要對住個仔就乜火都收晒立即變慈父，下個月就滿十歲的兒子Feynman，近年長肉變得圓碌碌超可愛，再次被內地親子騷睇中；不過，自四年前拍《爸爸去哪兒2》兒子撞傷眼角要入院縫針險破相，鎮宇嫂為保護愛兒，已下令推掉真人騷唔畀兒子再捱苦，鎮宇亦樂得做慈父陪兒子放暑假享受家庭樂，日前兩父子鬧市出巡，活潑好動的Feynman跑住去買珍珠奶茶，鎮宇就緊貼身後陪跑，嚴父都被乖仔降服！
吳鎮宇 訓練阿仔獨立
近日有份主演的電影《逆流大叔》上映，吳鎮宇四出宣傳，早前到奧海城出席活動，太太王麗萍就帶埋九歲兒子Feynman低調捧場。相比14年拍《爸爸去哪兒2》，Feynman身形明顯大不同，昔日清秀輪廓變得圓碌碌好飽滿，睇落相當可愛，原來發育階段的Feynman食量驚人，平日嚴肅cool爆的鎮宇，亦曾幽默笑兒子肥到冇頸似雪人：「佢一個人可以食兩人份量，可以食晒成碟意粉同差唔多成罐午餐肉，打機時佢又縮埋條頸，我諗我要帶佢去睇骨科醫生，將條頸拉番出嚟！」
一直極之重視私隱的吳鎮宇，四年前首度畀兒子萌樣曝光，父子檔參演湖南衛視真人騷《爸爸去哪兒2》，據知情者透露，鎮宇同老婆王麗萍本身非常低調，被打動全因想給兒子留一個珍貴回憶：「咪睇鎮宇好似好嚴好惡，其實佢教仔持開放態度，佢畀好大自由度個仔，唔會迫個仔死讀書，但佢好想訓練個仔快啲獨立，佢成日話，個仔18歲嗰時，佢都快到70歲，怕自己照顧唔到個仔咁耐，所以好想個仔學會獨立，學會面對困難，所以嗰時先肯接拍親子騷;嗰次佢兩父子去咗好多地方拍攝，一齊去體驗同經歷，令佢對個仔性格了解多咗，亦想畀個仔留一個紀念，將來大個可以睇番！」
拍真人騷出意外
活潑的Feynman，亦因《爸爸2》火速爆紅，轉眼四年，原來近日再有內地親子騷力邀鎮宇父子檔回歸，不過，自從上次拍真人騷出了意外，兒子撞傷眼角受傷，留有永久性疤痕，鎮宇嫂已下令推拍。據知情者透露：「嗰次拍真人騷個仔撞咗落樓梯，撞傷眼角要入醫院縫針，鎮宇同老婆好擔心，雖然個仔最後堅強完成餘下拍攝，但返香港治療，知道係永久性創傷，連視力都有機會受影響，鎮宇真係好心痛，嗰時仲一度搵唔到製作組，冇人肯承擔責任，搞到兩公婆好勞氣，個仔又要捱苦，所以吳太已經講明，以後都唔會畀個仔再拍呢類真人騷！」
體驗自己工作
外表火爆的鎮宇，原來教仔好有心思，更明白身教最重要，除了拍《爸爸去哪兒2》，16年他亦讓兒子客串電影《脫皮爸爸》，還有由他自導自演的電影《費曼的夏天》，更同兒子父子檔做男主角，就是想兒子可體驗他的工作。據知情者透露：「以前鎮宇已經成日帶囝囝去片場，就係想阿仔可以體驗自己嘅工作，了解爸爸更多，原來呢個係佢切身感受，細個嘅時候，因為佢爸爸係點心師傅主管，半夜就會返工，佢同爸爸好少時間溝通，但有一次佢跟咗爸爸返酒樓，了解咗爸爸嘅工作性質同環境，知道爸爸有幾忙碌同辛苦，父子反而拉近咗距離。」
鬧市人盯人
近日兒子放暑假，鎮宇拍戲之外亦爭取時間湊仔，日前兩父子鬧市出巡，著住迷彩衫的鎮宇可能怕畀人認到，戴帽又戴口罩將自己包到冚，兒子則似啱啱做完運動，著住短袖T恤後頸上還攝住毛巾吸汗，兩父子一齊行去買珍珠奶茶，九歲的Feynman非常活潑，淘氣得邊行邊跑，搞到鎮宇亦要從後追住個仔，兩父子人群中追逐場面相當溫馨！
買奶茶氹仔
鎮宇曾經大爆兒子鍾意食嘢，經常食晒佢啲點心，更幽默笑兒子肥到似雪人，但對住乖仔又心軟，專登落車只為去買珍珠奶茶氹阿仔！
跑了一輪，鎮宇指示囝囝方向。為免被途人認出，戴帽戴口罩的鎮宇包到冚，同兒子相映成趣。
訓練獨立
入到舖頭，Feynman一馬當先行去買珍珠奶茶，似乎在爸長期訓練下已經非常獨立。
買完嘢飲兩父子一齊行去 街口上車。
低調撐爸爸
早前吳鎮宇為電影《逆流大叔》出席宣傳活動，太太王麗萍帶埋兒子混入人群低調捧場，不過最終都被記者發現，早有過唔少演出經驗的Feynman，面對鏡頭亦表現大方唔太抗拒。
9歲胖嘟嘟
5歲秀氣出位
五歲Feynman首度亮相《爸爸去哪兒2》，外表清秀性格溫柔，火速爆紅吸納唔少粉絲。
太太退出湊仔
本身是新加坡模特兒的鎮宇太太王麗萍，婚後退出幕前專心湊仔，是鎮宇背後賢內助。
上陣不離父子兵
父子檔探訪
鎮宇教仔著重體驗生活，上年就同兒子一齊擔任奧比斯大使，變胖的Feynman睇落更加活潑可愛。
東京宣傳
鎮宇好想兒子體驗其工作，除咗會帶兒子去片場睇拍戲，16年自導自演的《費曼的夏天》就父子檔上陣，後更一齊去東京做宣傳。
連拍二片
先後拍過兩部電影的Feynman，在《脫皮爸爸》演古天樂童年。
