《大時代》10大必儲金句cap圖…「係技術性調整 唔使驚」！

圖文：東方新地

2020新增！金句講中港人抗疫心聲

神劇真係名不虛傳，來到2020，全世界都為武漢肺炎搞到雞毛鴨血，人人都要社區隔離，有網友翻出《大時代》丁蟹由台灣潛逃回港後的一段來說出香港人的「抗疫」心情：

值得留意係，呢一幕後續，就係丁蟹講阿媽唔忍心個仔被「隔離」，帶佢走去見阿玲，結果就釀成劇集後半段方家與丁家法庭對決，以及方家滅門的大悲劇⋯⋯

返回主題！重溫神劇《大時代》10大必儲金句cap圖…

唔止觀眾將《大時代》視作為經典，《無間道》編劇及導演莊文強甚至向記者透露自己「每年都會重溫一次《大時代》」，更表示所有學寫劇本的人都應該看一遍《大時代》，劇中人物刻劃深刻，金句歷久不衰，依家精選10大金句，讓大家回味一番！cap圖粉記得存起佢！

01｜「18年後又一條好漢！」

第一集演丁蟹嘅秋官帶住4個仔丁孝蟹、丁益蟹、丁利蟹、丁旺蟹站於天台上，因炒股失利，由身家50億變成負債數十億，於是有呢幕跳樓都唔掂嘅震撼畫面！而丁蟹激動咁向兒子狂呼「唔好衰俾人睇」、「18年後又一條好漢」，為無膽自殺嘅兒子壯膽，認真癲！

02｜「畀次機會吖，老細」

方進新俾丁蟹打到手腳殘咗，惟有去疊報紙，點知俾老細嫌手腳慢，為免被炒向老闆跪求：

「我被人打壞個腦，做得唔好。今日做唔好，唔要錢，聽日做唔好，唔要錢。」

事隔廿年睇番都眼濕濕呀陰公！

03 ｜「人善人欺天不欺」

滿腦子歪理嘅丁蟹嘅做人左右銘，自認為係好人，即使親手殺死方進新(劉松仁飾)都死不悔改，更認為係對方迫他才釀成悲劇！

04 ｜「係技術性調整 唔使驚」

結局「大奇跡日」，丁蟹5父子輸到破產都唔掂，天地不怕嘅丁蟹於崩潰一刻，仲識得自我安慰！而「技術性調整」更成為日後好多股市專家嘅口頭禪！

2015年《100毛》雜誌封面曾經邀請陶傑重演這個畫面，變成「技術性抽水」⋯⋯

05 | 「咁多人死、唔見你死！」

陳萬賢對於丁蟹死纏感到好唔耐煩，於是鬧走對方，就拋出呢句超級經典金句，點知錯有錯着，丁蟹以為係股市必勝之法，喺股市大好形勢下，人哋買升佢買跌，最後就咁發達。

06 | 「趁地腍（淋）啦！」

「趁地腍」指土地鬆軟，引伸為容易掘地埋屍！陳萬賢為打發丁蟹而亂噏嘅說話，表面醒佢貼士，其實想跣丁蟹，點知傻人有傻福，反而令丁蟹一夜暴發！
 

07 ｜「一個人要成功 就一定要找自己世界」

葉天教徙弟方展博第一招，並非咩投資法，而係呢句說話！查實此金句極之適合現今80、90後用，勉勵大家要有夢想，否則同條鹹魚冇分別！

08｜股票之道在於人棄我取

丁蟹向股壇大鱷陳萬賢(江毅飾)取經，陳萬賢為hea走對方，求祈拋出金句。而呢幾句由韋家輝創作嘅神級對白，成為現實股票投資心法，更係好多網上股票論壇至hit cap圖！

09｜「我方展博要發達」

好似罰抄咁寫低無限句自我鞭策自我催眠式說話，再不斷同自己講，唔知係咪呢場戲，往後好多保險人都有樣學樣，對住塊鏡同自己講我一定掂呢？！

10｜「貪心輸錢贏」

人人皆都愛錢，尤其個個都想趁股市上升時撈番筆！劇中股神、方展博嘅師父葉天(羅樂林飾)臨終時，將股票必勝訣傳授俾徒弟。其意指玩股票嘅人愈貪最後只會輸得愈甘，而炒股嘅網民經常cap番呢段經典對白，叫人及早斬攬！

未完，丁蟹金句仲有以下呢啲⋯⋯