《C9特工》高海寧5劇連播、甩拖上位內幕 性感回顧「御用狐狸精」
撰文、圖片：東方新地
高海寧5劇連播 黃金時段晚晚見高Ling
同唔少花旦一樣透過選美入行的高海寧（高 Ling），其34D火辣身材令她極速受關注，不過，多年來靠拋胸賣弄身材演出，即使被封性感女神，高Ling有段時間，卻被定型演狐狸精、壞女人角色，性感拋胸已成慣性附帶演出，唔想局限框框，幾年前高 Ling開竅，決定封胸唔再刻意露肉，不過收起最煞食武器，亦要捱過低潮。
連播5劇唔驚觀眾睇到悶？高海寧回應：《C9特工》都試過被抽起
《三十而已》客串兩集勁搶戲
近日高 Ling就霸佔無綫黃金時段兩線檔，劇集《殺手》、《迷網》、《反黑路人甲》輪住上，就連首次拍內地劇《三十而已》亦在這期間播出，人氣中港兩地高企。在《三十而已》雖然只是客串兩集，但劇中演被未婚夫背叛角色的她，一場掌摑小三戲份，正印氣場拿捏到位，演技令人刮目相看，獲網民激讚演出超班，令她成功在內地起步。據知情者透露：「喺《三十而已》高Ling只係得兩集戲，話晒有咗知名度，好多藝人會嫌戲份少唔肯客串，但高Ling好信任公司，從來都唔揀嘢做，最初接到角色，知道內容涉及正印同小三開火，佢亦冇話怕劇情敏感諸多扭擰，一切聽從公司安排，亦因為珍惜機會，今次終於冇白費心機，佢一出場已經搶晒戲，演出好多人談論，唔少內地網民大讚佢做得好，客串都有咁好反應，連佢自己都預計唔到！」
大方祝福前度鄧智偉
事業博出成績，高Ling對感情事處理得體亦贏盡支持。今年六月，前度鄧智偉爆出桃色糾紛，高Ling回應事件時未有因被對方背叛而踩多腳，反而擔心對方受事件影響，氣量表現令她加晒分。據知情者透露：「鄧智偉爆出桃色醜聞，高Ling都被拖落水，好多人都剝住花生等睇件事點發展，分手雖然令高Ling好傷心，不過佢堅持感情事要低調，分開咗更加唔想落井下石，為免被人再追問先至喺社交網交代幾句感情已畫上句號，出嚟回應件事仲大方祝福對方，好多人都讚佢夠厚道，公司亦認為高Ling處理件事好得體，最重要係氣量好有大姐風範，令佢升晒呢！」
甩拖高海寧上位內幕封胸擴戲路
受盡情傷的高Ling，一早開竅事業為上，肯博肯捱之外，更出名聽教聽話，深得無綫高層痛錫，為擴闊戲路嘗試不同類型角色，近日接拍新劇《七公主》演麻甩司機，更紮胸求突破變粗線條在所不計，演出脫胎換骨！
