零售寒冬！56歲謝寧現身九龍城總店親自賣曲奇 兩個標緻女兒不愛幕前攻幕後
撰文、圖片：東方新地
謝寧離婚後搞曲奇生意越做越大曾計劃上市
賣餅賣到搞上市嘅謝寧，08年同兩位股東喺九龍城賣曲奇開始，依家已經喺港九新界有九間分店，前年更擬搞上市，可想而知生意有幾好。之不過後來又不了了知，但就開多一間分店，生意應該唔會太差。
力不到不為財 現身九龍城總店賣餅
近月新冠肺炎肆虐，唔少商舖都捱唔住，為咗保持生意額，謝寧輪流到不同分店助陣吸客，日前就見戴住口罩嘅謝寧喺九龍城總店現身，一開店就差不多企足大半日，完全冇見佢坐低休息過，過埋個下午茶又去第二間分店巡舖。呢日所見雖然店內有成三個員工，不過謝寧冇擺老闆款做指揮，而係全程落場一腳踢，一時企喺收銀收錢，一時點算紙袋數量，一時又企出門外吸客，相信謝寧深知力不到不為財呢個道理！
85年港姐冠軍 兩個標緻女兒不愛幕前攻幕後
謝寧是 85 年港姐冠軍，有「TVB古裝美人」之稱，1991年和岑建勳結婚，育有兩名女兒，直到05年離婚。28歲大女岑寧童曾拍攝廣告及參與ViuTv劇集，現為副導演，26歲細女岑寧樂也是從事電影製作，兩姊妹都甚有母親的影子，五官標緻。
