48歲朱茵皮光肉滑玲瓏浮凸 永遠女神凍齡靠呢招
撰文：東方新地 圖片：東方新地、朱茵微博
朱茵數年前去西藏拍新戲，冇老公同囡囡陪住，朱茵焗住玩下自拍解悶。雖然仔細睇會見到朱茵個眼袋出晒嚟，但除此之外唔算點走樣，4張幾算係咁喇！
朱茵48歲猶如少女 凍齡有法全靠保持心情靚靚
其實唔止出席活動精心打扮過至咁索，日前朱茵以淡妝街坊casual look去銀行，一樣係又靚又有星味！時刻保持靚靚心情的朱茵，對住人又friendly，雖然包到實，都畀佢個招牌露齒笑容出賣咗囉！
九龍城現身 笑對街坊心情靚靚
當日唔見老公黃貫中同囡囡黃鶯喺左近，朱茵一個人行到去九龍城某銀行處理事務，明明戴住黑超披住圍巾包到實，點解咁都認得出？佢個招牌露齒笑容，又真係好易認喎！
經典白色泳衣造型
1998年《超級學校霸王》入面身穿「白色標靶」泳衣的朱茵，亦係觀眾最難忘的其中一個性感造型：
朱茵與黃貫中（Paul）於2012年奉女成婚，同年黃鶯出世，夫婦二人視女如命對外十級戒備，拒讓囡囡正面曝光。但早前朱茵帶女撐阿Paul的音樂會，更讓囡囡上台送肉嘴畀爸爸，一反常態原來是為捧女做童星鋪路，參加內地真人騷《想想辦法吧！爸爸》。
其實多年來有不少內地電視台想打黃鶯主意，但朱茵阿Paul一直不為所動，據知今次被過千萬人仔酬勞吸引，才肯一家三口破例亮相節目。在紫霞仙子阿媽朱茵帶領下，精靈又乖巧的5歲半黃鶯必定人氣急升，至於老竇阿Paul亦會夫憑妻貴，對他開拓內地市場無往而不利。既可捧女又袋千萬，朱茵阿Paul依家先開竅亦未算遲！
朱茵母女難捨難離
內地真人騷《爸爸去哪兒》拍了五季深受觀眾歡迎，參與拍攝的明星二代全部都人氣急升，去年陳小春帶住兒子Jasper參加演出後，Jasper即成為內地炙手可熱童星，可想而知這類真人騷的入屋程度有幾勁。早前朱茵阿Paul亦解除防線，破天荒讓女兒參與由優酷製作的《想想辦法吧！爸爸》，節目名雖然只提及爸爸，但實際上卻是全家出動，朱茵才是最關鍵人物，因為參與的五位明星媽媽為了放鬆而组團外遊， 五位明星爸爸就負責帶住仔女長途跋涉去搵媽媽。
早前朱茵一家三口在北京機場出現，由於劇組要分兩隊拍攝，朱茵與其餘四位媽媽同行，爸爸亦要帶住仔女開始進行拍攝，當日朱茵到機場送別兩父女，年紀小小嘅黃鶯知道要暫別媽咪，攬實朱茵喊到收唔到聲，搞到眼腫腫鼻紅紅，十分慘慘豬，朱茵亦忍唔住跪地抱實囡囡喊，最後一家三口更擁作一團。
其實朱茵收到演出邀請後都好掙扎，思前想後先肯應承，據知情者透露，「咁多年嚟朱茵同阿Paul都堅持唔畀個女公開露面，想保護佢唔受傷害，等佢可以過普通人嘅生活，但個女開始長大，始終都要喺香港生活，避來避去都唔係辦法，佢兩公婆亦慢慢諗通，希望順其自然畀佢見多啲世面。前年朱茵孖住蔡少芬參演《偶像來了》及《王牌對王牌》等內地綜藝節目，人氣返晒嚟，工作亦接踵而來，咁啱年初內地製作人想搵香港明星家庭拍《想想辦法吧！爸爸》，幾經辛苦先游說到朱茵出嚟傾，對方好有誠意，因為要全家出動，又係Debbie(黃鶯)第一次公開出鏡，所以酬勞過千萬人仔，不過都辛苦㗎！阿Paul未試過自己對住個女咁多日，要連續24日帶住囡囡穿州過省搵阿媽，對於兩父女都係一個考驗。朱茵覺得呢個係一個好好嘅鍛鍊機會，有錢搵亦幫到阿Paul喺內地嘅知名度，最後亦應承咗，不過因為囡囡嚟緊就要考小學，暑假亦要開始準備，所以拍攝時間唔可以太長，劇組亦應承一個月內放人。」
極速與童黨混熟
黃鶯除了五官像朱茵長得標緻，亦遺傳了父親的藝術細胞，自小喜歡唱歌跳舞，由於出世後頭幾年都由朱茵全力照顧，為了不想女兒有公主病，朱茵賞罰分明絕不盲目溺愛，而黃鶯懂事自理能力又高，前年趁女兒已入讀幼稚園，朱茵開始全面復出，要工作的日子就把女兒交由外婆照顧。本刊記者曾多次目擊黃鶯跟隨朱茵阿Paul外出，只見她乖巧又聽話，而且待人亦非常有禮貌。
節目在上月中開鏡，先後在雲南及成都等地進行拍攝，阿Paul拖住囡囡穿梭多個地方，不時被野生捕獲，平時Rock到爆的阿Paul對住個女冇晒火，全天候慈父上身，形象反差非常之大。從網民放上網的照片中可見，黃鶯已忘記與母親分別的離愁，即使沒有朱茵在身旁，與其他小朋友亦打成一片玩得好開心，而阿Paul則帶女洪郎賣土耳奇雪糕又學插花，做盡以往絕不會公開做的事。猶記得25年前黃家駒在日本上綜藝節目上意外出事，Beyond其餘三子此後對參與綜藝節目都非常避忌，看來有女兒作伴，阿Paul已成功克服陰影。
學插花
賣雪糕
夫妻檔搵人仔
阿Paul父女上陣千里尋妻，反觀以朱茵為首的太太團就舒服得多，見她去完沙漠騎駱駝，又穿民俗服飾與民同樂，其中一日更與洪天明老婆周家蔚去大型超市掃玩具，不用湊女絕對是優差。其實生女後的朱茵復出後只放眼大中華，近年與阿Paul一齊簽內地經理人搵人仔，當年《西遊記》的紫霞仙子在國內依然有市場，拍劇拍電影之餘，仲代言唔少產品，去年更以天價酬勞為國內代言一種傳銷商品女性洗陰棒，為搵人仔接了不少前所未接的工作，包括今次全家亮相真人騷。
去到雲南站，朱茵穿上當地的民俗服飾拍攝，更與當地居民一起跳民族舞。
朱茵近年主力拍劇拍電影參加綜藝節目，阿Paul就繼續搞音樂開騷，論工作量與受歡迎程度，朱茵遠勝阿Paul。不過阿Paul為頭家亦發奮圖強，知情者透露：「為咗個女同頭家，阿Paul講嘢慎言咗，再唔會好似以前咁衝動，依家有內地經理人幫手，佢同朱茵都接落唔少job夫妻檔一齊上，咁樣個價高好多，喺內地知名度好重要，等個真人騷出埋街，阿Paul兩父女都會人氣爆升，到時肯定會有其他騷爭住搵佢哋做。朱茵今次捧女之餘，最大得著應該係捧埋個老公，絕對唔會計錯數！」一家三口殺入內地，錢途無限。
洪氏一家
家庭樂
趁住真人騷未開拍，早前朱茵與阿Paul帶住囡囡外出享受家庭樂，雖然當日落大雨，但有媽咪朱茵擔遮擋雨，黃鶯笑住上嗲哋車好開心。
女兒奴
一家三口在九龍城廣場飲完茶，再由阿Paul帶囡囡去室內遊樂場玩，對住可愛又跳脫的黃鶯，阿Paul明顯無力招架，畀阿女氹到心花怒放，笑瞇瞇做其私人攝影師。
婆婆身教
唔止朱茵阿Paul教女有方，就連朱茵媽咪都以身教湊孫，早前黃鶯由婆婆接放學後去公園玩，見到有小男孩跌倒受傷，黃鶯驚到攬實婆婆腳，後來在婆婆鼓勵下上前問候小男孩，非常有愛。
親力親為
自女兒黃鶯出世後，朱茵把家庭放在第一位，家中大小事務都盡量親力親為，早前她駕車到寓所附近買生果，即使有外傭跟車，但她依然親自落車親手揀，之後才返上車等，遇上本刊記者，更大方揮手打招呼。
接放學
雖然前年開始復出，但朱茵仍非常著緊女兒的校園生活，不用開工時她堅持去學校接放學，閒時又會與女兒一起砌puzzle、跳舞及唱歌，難怪黃鶯最黐媽咪。
朱茵與阿Paul為培育女兒花了不少時間與心機，阿Paul為囡囡的改變也不少，一家三口曾被本刊記者影到暢遊廸士尼。對於黃鶯想有個妹妹，已46歲的朱茵表示隨緣，不會強求。
