46歲陳煒閃嫁撻Q 同齡醫生男友同居拖婚
撰文、圖片：東方新地
陳煒與醫生男友秘密拍拖9個月
去年中，陳煒被踢爆與醫生男友陳國強熱戀，當時被指是姊弟戀，但陳煒已極速強調：「我哋係同年㗎，唔好再話我大過佢喇！」對於新戀情，煒哥百分百重視，可見男友已是她心中的Mr.Right，而每次提及對方，煒哥都甜到漏，極力保護剛滋長的愛苗。即使陳國強表示是離婚後才與煒哥開始，仍避免不了惹人閒話，果然在二人戀情曝光後，即有人向傳媒爆料指陳國強其實未離婚，還有兩名女兒，直斥煒哥是「小三」，不過當事人陳國強即挺身而出為煒哥發聲，澄清一年前與前妻早已離婚及與煒哥拍拖時已回復單身，並聲言由於兩名女兒乃與前妻共同撫養，故雙方有見面，而兩個女兒亦知道他現任女朋友是煒哥。
互相了解最重要 男友已進駐女家
與陳國強撻著後，煒哥事業愛情兩得意，成為無綫當家花旦劇接劇，與男友的生活更如魚得水，很快便發展到同居階段。據知情者透露，「煒哥同Aldous都經歷過婚姻失敗，大家都唔想再浪費時間，同埋知道溝通同了解係最重要，所以冇幾耐Aldous就搬入煒哥屋企住。女人四十仲係一枝花，再加上煒哥keep得咁好，Aldous覺得佢係一個不可多得嘅女人，亦好珍惜呢段情，不過講到要再結婚，就真係要諗諗先，始終佢仲要照顧前妻同兩個女，大女都係得十零歲，仲要供書教學多十幾年，個個月生活費都唔少嘢。Aldous覺得同煒哥一齊最緊要係心意相通，佢好識氹人，會話來日方長，佢哋又唔係急於結婚生仔，大家都視對方為終身伴侶已經好足夠。但有邊個女人唔想有名份㗎？煒哥拍拖初期曾經開到口講唔排除會閃婚，不過只係佢單方面嘅想法，好彩煒哥係個思想成熟嘅女人，亦知道呢啲嘢逼唔嚟，惟有繼續等。」
貼地拍拖形影不離 男友願花心思
與前夫顏志行相處多年，最後不捨得放手都要分開，煒哥感受至深，所以與陳國強拍拖，她認為要了解為先，熱戀9個月至今，即使二人工作有多忙，煒哥要拍劇出騷，陳國強要忙著打理兩個診所與美容中心，但他們都一定抽空外出拍拖，早前本刊多次影到煒哥與陳國強離開油塘寓所，到西沙茶座醫肚談心，兩個人加埋近百歲，走在一起仍似足初戀，陳國強不時扮可愛整鬼臉氹女友。別以為與醫生拍拖一定出入六星級酒店過奢華生活，煒哥的貼地樸素，令她更獲陳國強寵幸。另一日二人現身深水埗，煒哥落車為男友去排隊買椰汁，之後又一齊幫襯舊式平民麵店。
講到體貼，陳國強更樂於做司機管接送，早前煒哥出席電影宣傳活動，他在活動舉行期間已在附近呆等，最後夾啱時間在停車場接回煒哥，然後雙雙返家。煒哥的前夫與陳國強都是大忙人，但二人卻大不同，煒哥早前上電台做訪問，曾公開大讚男友會花心思去令她開心：「陳醫生唔算浪漫，但好細心，佢畫公仔好靚，最浪漫就係親手畫卡。以前同前夫就係佢不斷外出工作開會，返到屋企只會話好攰情願瞓覺，即使我想了解佢，佢都唔想傾，我唔會勉強人，但久而久之，就變成補救唔到嘅關係。依家我同陳醫生仍喺溝通階段，所以大家唔好催婚！」
欣賞男友是個有承擔的男人
除了為人細心識畫公仔氹煒哥一笑，陳國強對前妻與女兒的承擔，也是煒哥欣賞他的其中一個原因。知情者透露：「雖然唔再係夫妻，但Aldous係一個負責任嘅男，前妻同兩個女嘅生活依然無憂，而且大家關係仲維持得好好，佢絕對唔係一個離婚後就乜都唔理嘅老公同爸爸。煒哥亦好大方同體諒，知道佢每星期都會抽時間去見屋企人，煒哥完全唔會詐型，反而覺得一個有擔帶嘅男人一定唔會衰得去邊。」早前本刊記者在沙田撞到陳國強與前妻及女兒家庭樂，囡囡見到爸爸好興奮，而陳國強亦收起對住女友的調皮，擺出嚴父模樣，飯後前妻把一疊信件交給他，最後分車離開，陳國強返回陳煒香閨。
錯愛過一次的煒哥，汲取過去經驗，揀男人自然更慎重，陳國強醫生高大威猛、為人成熟又事業有成，最難得是對煒哥一條心，雖然未肯再婚從此被困，但睇得出誠意十足，所以煒哥等吓亦無妨，好好經營呢段關係為上。
