41歲「索腿天后」陳敏之一孕傻三年 目測50吋長腿靚相任睇
撰文、圖片：東方新地
「索腿天后」陳敏之一孕傻三年
有子萬事足係真嘅，不過一孕傻三年都唔假，有時唔排除媽媽們善忘腦閉塞情況三年後都仲未可以完全恢復。話說雷子樂2016年出世，今年剛好三歲，日前就見靚靚敏之喺電視台收工後，第一時間準備攞車走人返屋企湊仔。不過車未上，見到老友先傾幾句，眉飛色舞相逢恨晚咁樣傾足十分鐘……又話趕時間返屋企嘅？終於傾完，戲肉嚟喇，陳敏之摷吓手袋又摷衫袋，摷完衫袋又摷褲袋，車都未上結果又行色匆匆咁行番轉頭拍卡入電視城，九成九收工歸心似箭想返屋企，點知漏咗嘢唔記得拎啦，認真大頭蝦！
靚相回帶！「索腿天后」陳敏之大曬布吉水著相
陳敏之飛到泰國布吉慶祝結婚周年，一眾好姊妹如嚴淑明、《東張西望》主持容羨媛都有同行，大家周不時發佈吸睛水著相大派福利。
陳敏之指今次旅程有專業攝影師，驟眼一看，敏之的水著照不論陽光或倒影都拿捏不錯，難道攝影師就係敏之老公?
好友嚴淑明都有同行，網民大讚有肉地又吸引。
《東張西望》主持容羨媛亦都有在社交平台派福利，老公也有份參與旅程。
最令人觸目的相信是陳敏之這張照片，戴著黑超躺在大水泡上大騷長腿，加上攝影師的專業攝影手法，令敏之雙腿長上加長! 目測50吋，非常誇張，不過相信都是角色的重要性。大批網民紛紛留言大讚索媽、長腿，不過也有網民指:「對腳似乎長過龍。」
陳敏之 心情未受影響
陳敏之嫁得富貴，老公係燈具公司老闆，兩年前又生埋寶貝仔雷子樂，榮升靚媽，不過婚後陳敏之並唔甘心做幸福少奶奶，餵緊人奶已經復出拍攝《溏心風暴3》，兩年來一邊湊仔一邊拍劇，仲一邊積極參與旗下曲奇餅店工作，身兼多職。呢期幫無綫拍緊兩線劇集《鐵探》同《解決師》，又要忙住餅店中秋宣傳工作，難得萬能媽媽敏之一樣抽到時間陪阿仔，日前就被 本刊發現抱住囝囝，由司機接載到九龍城歎墨魚丸粉。
年尾囝囝就滿三歲，敏之接受本刊電話訪問時自爆係九龍城墨魚丸粉名店忠粉，當日接埋囝囝放學去朝聖：「阿仔一歲開始返playgroup，今年仲返緊兩間，我同佢都好鍾意食嗰間嘅墨魚丸粉，老闆娘又好錫佢，成日會請一碗仔畀子樂食！」至於開業三年的曲奇餅店近日都算係多事之秋，前排因為廣州分店招聘內地專才廣告搞到有網友不滿，月初再被前股東入稟高等法院申請清盤。據悉股東多擴張又極速，餅店因此有股東對於公司生意方針有異議，致搞出退股入稟風波，不過敏之只屬眾多股東之一，既然事不關己，自然仔照湊、劇照拍，繼續安守本份做好餅店生招牌，趁住中秋，梗係變身送禮勤，老友同事拍劇拍檔人人有份永不落空！
陳敏之：唔會怕咗做生意！
記者：有冇因為舖頭最近糾紛影響心情？
陳敏之：完全冇！之前都對外回應過，係其中一個股東問題，一定搞得掂，總之間舖頭就係好健康正常運作咁，我唔想講太多，因為始終股東 中我係高知名度，件事搞到上報紙，都係因為我。
記者：官司依家去到咩階段？
陳敏之：其他股東搞緊，因為唔係我問題，所以交咗畀佢哋處理，係處理中，好快搞得掂。
記者：會唔會怕咗做生意？下次搵股東要小心啲？
陳敏之：梗係唔會!唔係我錯，又唔係其他股東有問題，係其中一個人個別情況。我覺得大家都上咗一課，學到啲嘢，下次做生意有啲問題就會更小心處理、更加要搞得清楚。
記者：要拍劇要湊仔又要顧生意會唔會兼顧唔到？
陳敏之：唔會，對於做生意呢樣嘢我都仲係好有興趣。其實餅店以外我都搵緊 舖位搞緊其他嘢，等遲啲落實先至通知大家。今次精簡啲、拍檔人數少啲，希望繼續喺商場學吓嘢！
同場加映：《溏心3》同唐文龍激戰
加入無綫17年，39歲陳敏之曾於11年憑《怒火街頭》演「索腿天后」奪「最佳女配角」，再憑《親親我好媽 》有份競逐視后，而產後復出的《溏心3 》，近日更引起網民熱話，成為全劇焦點！首被安排加入《溏心3》演出，敏之唔介意做被非議的小三角色，要勾引人夫唐文龍﹐做咗人妻人母，大膽程度更勝做女嗰陣。據知情者透露：「自從舊嗰班花旦走晒，眼見阿田定欣已經上晒位，自己喺TVB已經17年，敏之覺得呢個都係好時機要突圍而出，所以有機拍《溏心3》，佢真係好搏，知道有好多情慾戲，好似同唐文龍有床戲要除剩個bra，又要被摸胸，連場激咀場面，但因為知個角色好大發揮，佢都豁出去投入去做，最緊要做到出嚟有話題夠份量夠noise去爭獎！」
冇同老公備案
不過話晒老公係圈外人，未必能接受老婆演出咁大膽，敏之事 前更冇同老公備案，就係唔想有太多顧慮。好友爆料：「最初佢都擔心老公會介意，所以事前佢都冇同老公講個角色有咁多情慾戲，依家拍完,佢先同老公講番，仲叫老公如果真係頂唔順就唔好睇！重產後兩個月，陳敏之即接拍《溏心3 》，最唔捨得當然係寶貝仔雷子樂。據知情者透露：「啱啱知道有咗就接到呢個劇本，雖然知道生完要即刻開工，但係敏之覺得難得拍到《溏心3 》呢個劇，而且個角色仲咁有發揮，佢好快就決定接拍，但話晒個仔啱啱出世冇耐，佢真係好唔捨得，加上嗰時仲餵緊人奶，開工仲已經冇覺好瞓仲要泵奶，然後搵工人送返屋企，好彩有媽咪幫佢照顧個仔，佢先至放心。」正因為產後不久就要同唐文龍埋身激戰﹐她更一度擔心會滲奶。敏之笑說：「唐文龍胸肌太勁啦！壓落嚟個心口抖唔到氣，嗰時我又谷緊奶﹐拍時幾驚會滲奶！」
未試過演得咁盡
陳敏之喺《溏心3》晚晚同唐文龍肉搏，敏之老公同唔嬲咩？敏之接受本刊記者訪問時直言老公冇睇到激情戲，敏之都勸佢唔好睇，笑言怕睇到會爆血管而非呷醋！
記：喺《溏心3》入面，你個角色好大回響，有冇信心攞奬？
陳：真係冇諗過獎嘅問題，自己亦都冇乜大信心，反而係個角色得到大家關注，自己好開心。
記：最初接到劇本，係咪已經知道有咁多情慾戲？
陳：都知嘅！但當然冇咁細緻，家豪哥好細心同我分析個角色，呢個角色係好有發揮，我未試過演出可以演得咁盡，唔單止係講情慾戲，本身個角色係有好多內心戲！鋪排帶出好多訊息！個ending大家更加唔會估到！
記：係咪一睇到劇本就決定接？
陳：我一路都好鍾意睇《溏心風暴》，冇諗過自己會有機會演出，今次係一個新加入嘅角色，好難得有一個咁多發揮嘅角色畀我，所以都好快決定接！嗰時唯一係擔心自己啱啱生完BB，狀態夠唔夠好。
記：係咪個角色都好難演？
陳：一嚟係，加上自己啱啱生完BB ,都好擔心個狀態可唔可以適應到，好彩到開拍嘅時候，自己已經坐完月，身體狀態恢復得好好，咁知道要做呢個角色，自己亦有keep fit，好彩依家出嚟效果都唔錯，唔覺自己肥！
敏之：老公冇睇，好彩老爺奶奶開通！
記：咁多情慾戲，老公有冇睇？
陳：佢有追《溏心3》嚟睇，不過嗰啲戲（情慾戲）佢都盡量避開唔睇，老公冇睇到激情戲，我都勸佢唔好睇，怕睇到會爆血管而唔係呷醋！咁啱呢兩集，佢都出咗街，咁我都怕尷尬嘅，都唔想一齊睇，都有叫佢不如出街啦！我媽咪有講笑話：『你因住畀你老爺奶奶鬧呀！』咁我就話老爺奶奶好開通㗎，好明白事理，知道我做緊戲，佢哋唔會鬧嘅！
記：拍之前係咪冇同老公備案？
陳：我哋都一齊十幾年，佢好支持我嘅工作，其實大家好有默契，唔會專登講拍啲乜嘢，好似有時啲衫性感啲，亦唔會專登講，佢覺得有唔妥就會開聲！咁佢都知道係演戲，唔係真實嘅我！
記：同唐文龍拍時有冇尷尬？
陳：一般觀眾以為床上戲好容易拍，又問會唔會尬呀！首先投入咗角色完全唔會尷尬，同埋你哋見到浴室嘅戲好凍，大家著好少衫，大家會諗點樣先拍得靚，我哋前面有好多攝影師、好多人圍住，其實唔係好似外間諗到得兩個人嘅事！其實每場戲我哋都會事先傾好先拍，因為要做到恰到好處唔可以過火，自己都好努力去揣摩角色，加上啲情慾戲都係擺到好後先拍，大家已經熟絡咗，咁我哋都好專業，唔會尷尬！
記：嗰時BB啱啱出世，會不會覺得犧牲咗湊B嘅時間？
陳：始終做咗呢行咁耐，我都習慣咗，一拍劇就會好忙，不過因為嗰時自己餵緊人奶，係會辛苦啲，因為每幾個小時就要泵一次奶，好彩監製導演同啲演員都好體諒我，而且泵完奶個人係比較攰！雖然嗰時每日只係瞓得三個鐘，但大家一齊拍戲好開心，完全唔覺辛苦！
《性在有情》 同樣大膽
事實上，近期陳敏之接拍劇集，角色大都非常大膽，人妻婚後完全冇底線同顧慮。同張兆輝合作嘅《性在有情》，要做性治療師嘅角色，為此約見真正嘅性治療師攞資料，劇中亦有多場床戲。努力沒有白費，陳敏之憑《溏心3》提名無綫頒獎禮的「最佳女配角」，又憑《親親我好媽》角逐女主角，好友透露： 「《 溏心3 》係台慶重頭劇，隨時係頒獎禮大贏家，敏之個角色楚楚可憐又多發揮，敏之最想呢個角色攞獎。」
