40歲關心妍聲帶出血失聲 入行18年淚曬東莞騷

撰文、圖片：東方新地

關心妍落力演唱 羅力威自言當Jade係女神

巡唱第二站，Jade請來好友羅力威擔任嘉賓，平時怕怕醜醜嘅羅力威，自爆Jade一直係佢心目中嘅女神：「Jade太多歌打動我，亦影響咗我創作音樂靈感，初入行每次見到佢都心跳加速。」令在旁嘅Jade哈哈大笑話：「我嗰陣都結咗婚㗎喇，我同佢老婆（雨僑）好熟㗎！」

關心妍聲帶出血失聲 淚曬東莞騷

近個唱尾聲，Jade有感而發，皆因佢開騷前兩星期突然失聲，經醫生診斷後發現佢聲帶出血，要停止練歌，連做運動都唔得，只可以閉關休息養聲，嚇到Jade不知所措：「之前好擔心，因為一班歌迷等咗我咁多年，我真係好珍惜每一場演出，所以今 日真係一個奇蹟，可以喺咁短時間內好番！今晚唱最後一首歌先敢同大家講，如果聲帶惡化可能要臨時取消，好感恩，多謝大家嘅支持，畀我嘅動力，令我把聲無事！」說罷，Jade唱出〈關心…心妍〉，再次感動爆喊！Jade又特別感謝老公：「最慘冇得黐住個囡，連同佢玩都唔得，最怕傳染佢，呢幾個星期老公好辛苦，每日帶心心出街玩。」東莞站圓滿結束，嚟緊3月，Jade會將巡唱帶到澳洲及美加，尾站再返香港舉行。