35歲李亞男專心做人妻 熱褲長腿索爆踢拖遊尖沙咀

撰文、圖片：東方新地

李亞男熱褲長腿 索爆踢拖遊尖沙咀

時間同事實證明一切，成功開拓大中華市場嘅祖藍愈撈愈掂，李亞男就愈活愈似闊太，再加埋個得意到暈嘅囡囡 Gabrielle，一家三口不知幾美滿幸福！

早前就見王太李亞男出巡尖沙咀 shopping，簡簡單單 T-shirt 熱褲再踢對拖鞋，一身街坊裝都掩蓋唔到佢天生麗質嘅 fit 爆身形，熱褲下一雙白滑長腿尤其養眼！今次唔見老公同囡囡喺身邊，王太買完嘢辦完事，急 call司機歸心似箭。一上車低頭望住電話，不由自主露出關愛滿足笑容，唔使講，電話熒幕上唔係老公就係囡囡啦！

最佳老公王祖藍 北上賺錢兼湊女

近年王祖藍北上發展後撈得算唔錯，賺到錢仲賺到美人，同李亞男不時放閃，二人身高差完全唔阻礙感情發展，囡囡出世後更見恩愛。呢對最萌身高差情侶的確令人再相信愛情啊。

當175cm選美冠軍遇上160cm諧星，李亞男同王祖藍呢一對排除萬難拍拖認 愛，繼而步入教堂結婚生女，用事實證明愛就是愛，身高背景外形完全唔成問題。 眨吓眼囡囡Gabrielle就快一歲，祖藍除咗勤力北上賺奶粉錢外，大部分時間都盡可能撲返屋企幫老婆手湊女。不過祖藍亦好識做，顧大又顧細，仲會抽空陪老婆 大人過吓二人世界㖭！

最萌身高差 出街唔拖手玩搭膊頭

早前本刊就曾拍到兩公婆出巡，李亞男都係著住同一對拖鞋，由司機接載齊齊拍拖去尖沙咀做facial 扮靚靚。其實身高同外形距離一直只係外人評論，當事人從未有放在心上，見佢兩公婆一落車，高出一個頭嘅亞男就搭住祖藍膊頭，順手得嚟仲好有愛，呢啲咪最萌身高差囉！