31歲岑杏賢脫單4個月 認愛34歲圈外加籍金融才俊

撰文：東方新地 圖片：東方新地、岑杏賢IG

岑杏賢脫單4個月 男友為圈外加籍金融才俊

當年因為缺乏安全感，岑杏賢同袁偉豪終於都喺2016年宣布分手，分手後條件優厚嘅岑杏賢一直單身，好多姊妹都替佢心急，但原來佢喺4個月前已經成功「脫單」，早前情人節仲喺網上放閃，透露男友係加拿大籍香港人，叫Kelvin，今年34歲，任職金融投資，喺朋友婚禮上認識，之後一拍即合，今年係佢哋首個情人節，真係so sweet！

舊愛袁偉豪IG送祝福 網民發現早已被unfollow

舊愛袁偉豪亦有喺岑杏賢IG留言祝福，不過岑杏賢無回覆，網民仲發現原來岑杏賢一早已經unfollow咗佢，咁就啱啦，人要向前望，祝福岑杏賢同新男友可以甜甜蜜蜜，開花結果！

戲外有男友戲外有歐瑞偉扮大媽齊撐枱腳

愛情得意，事業都唔錯，入到處境劇《愛・回 家之開心速遞》，唔愁無工開。日前記者見岑杏賢喺電視城飯堂同人約埋撐枱腳，一坐低雞啄唔斷不知幾好傾，不過對方化到鬼五馬六咁，睇真啲，原來係岑杏賢喺處境劇《愛・回 家之開心速遞》中嘅另一半「KC」歐瑞偉，因為角色造型講佢扮民初婦女，貪方便，就索性大媽look踩落canteen撐枱腳囉！歐瑞偉呢啲實力派甘草演員有戲又有喜感，為效果不計形象零包袱，所以話老戲骨去到邊都咁搶手！